Mga sundalo, naturukan na ng bakuna laban sa COVID...

FDA Dir. Gen. Domingo: Wala pa rin kaming nahuhuli sa mga raid

ni Lolet Abania | December 27, 2020

Ibinulgar ni Pangulong Rodrigo Duterte na maraming Pinoy, kabilang na rito ang ilang sundalo, ang nagpaturok na ng COVID-19 vaccine mula sa Chinese pharmaceutical company na Sinopharm kahit na wala pang approval mula sa Food and Drug Administration (FDA).

"Sabihin ko sa iyo, marami na ang nagpa-injection dito sa Sinopharm... Halos lahat ng sundalo natusukan na," ani Pangulong Duterte kay FDA Director-General Eric Domingo sa naganap na pulong ng mga Cabinet officials kagabi.

"I have to be frank and I have to tell the truth. I will not foist a lie. Marami nang nagpatusok and lahat," dagdag ng punong ehekutibo.

Gayunman, tugon ni Domingo sa pangulo, aarestuhin pa rin nila ang sinumang indibidwal na masasangkot sa pag-a-administer umano ng nasabing vaccine sa mga kababayan.

"Wala nga po kaming mahuli. Naka-tatlong raid na po kami sa Makati at saka sa Binondo, pero wala naman po kaming nahuli pa," sabi ni Domingo kay Pangulong Duterte.

Matatandaang nais ni P-Duterte na ang pulisya at military ay kasama sa unang makatatanggap ng COVID-19 vaccine kapag mayroon na nito sa bansa dahil aniya, kailangan ng mga itong maging malusog.

Ayon sa Pangulo, nananatili siya sa ganitong desisyon.

"Gusto ko mauna sila because I do not want a sickly armed forces and a sickly police. The reason why is that they have to be in good health all the time because they are responsible for the law and order of this country," ani P-Duterte sa meeting.

Naitalang mahigit sa isang milyong katao na ang kumuha ng Sinopharm para sa emergency use, ang experimental vaccine na dinebelop ng China National Pharmaceutical Group at naaprubahan din sa ibang bansa gaya ng Bahrain.

2 LPAs, magdudulot ng pagbaha at landslides – NDRRMC

ni Lolet Abania | December 27, 2020

Naglabas ng babala ang National Disaster Risk Reduction and Management Council ngayong Linggo sa posibleng pagbaha at landslides sa northern Luzon dahil sa dalawang low-pressure areas (LPAs) na namataan sa bansa.

Sa isang advisory ng NDRRMC, pinapayuhan ang publiko na maging handa anumang oras, lalo na sa mga lugar na mabilis ang pagbaha at mga landslide-prone areas, kahit pa ang dalawang LPAs na mino-monitor ng ahensiya ay hindi magiging tropical depressions.

"Communities located in flood-and landslide-prone areas, especially in the river basins, must remain vigilant and undertake all necessary precautions to ensure their safety," sabi ni NDRRMC Executive Director at Undersecretary Ricardo B. Jalad.

"We know we are in the holiday season but we must continue to be prepared for any emergency," dagdag ni Jalad.

Alas-9:00 ng umaga ngayong Linggo, December 27, namataan ang isang LPA sa layong 140 kilometers west-northwest ng Puerto Princesa, Palawan habang ang isa pa ay nasa 35 kilometers northeast ng Adet, Camarines Norte.

Katamtaman hanggang sa malakas na pag-ulan ang mararanasan sa buong Eastern Visayas, Bicol Region, Quezon, Aurora, Bulacan, Rizal, at Mindoro provinces.

Habang mahina hanggang sa katamtaman at paminsan-minsang malakas na pag-ulan ang inaasahan sa malaking bahagi ng Cagayan Valley, Metro Manila, natitirang bahagi ng Visayas, northern Mindanao, Zamboanga Peninsula, at natitirang bahagi ng central Luzon, CALABARZON, MIMAROPA, at CARAGA.

"Even though the weather systems are just LPAs, the public should not be complacent... LPAs bring heavy rains which cause floods and landslides," ani Department of Science and Technology (DOST) Undersecretary Renato Solidum Jr.

Foreigners, bawal sa Japan dahil sa bagong virus

ni Lolet Abania | December 27, 2020

Pansamantalang ipinagbawal ang mga non-resident foreign nationals na makapasok sa Japan kasabay ng paghihigpit ng kanilang mga borders dahil sa isang bago at matinding variant ng coronavirus.

Magsisimula ang pag-ban sa mga nasabing travelers bukas, December 28 hanggang sa January, 2021, ayon sa emailed statement ng gobyerno ng Japan.

Ang mga Japanese citizens at foreign residents naman ay papayagang makapasok subalit kailangang magpakita ng patunay na negatibo sa coronavirus test nang 72 oras bago dumating sa Japan at dapat na mag-quarantine ng dalawang linggo pagdating sa nasabing bansa, ayon pa sa statement.

Kamakalawa, nai-report sa Japan ang unang mga kaso ng isang fast-spreading variant sa mga pasaherong dumating mula sa Britain.

Ayon sa Nippon TV kahapon, ang new variant ay na-detect sa isang lalaki na bumisita sa UK at isang miyembro ng pamilya, kung saan ang unang mga kaso ng infected sa virus ay nadiskubre sa labas ng airport check.

Gayundin, ang new strain ay nakadagdag ng pag-aalala sa karamihan sa posibleng pagtaas ng cases habang ang Tokyo ay nakapagtala ng isa pang record ng pagdami ng kaso ng COVID-19 kahapon.