Konduktor nakaaway, bus sinilaban ng pasahero, 2 patay, 4 sugatan

ni Lolet Abania | January 3, 2021

Dalawa ang namatay at apat ang nasugatan nang magliyab ang isang bus sa Fairview, Quezon City ngayong Linggo.

Ito ang kinumpirma ng Bureau of Fire Protection (BFP) ng Quezon City, kung saan isang pampasaherong bus ang bumabagtas sa Pearl Drive corner Commonwealth Avenue nang mangyari ang insidente pasado alas-12:00 ng tanghali.

Sa inisyal na ulat ng QC-BFP, ang nasawi ay si Amelene Sembana, konduktora ng nasabing bus at isang hindi pa nakikilalang lalaki. Apat naman ang nasugatan sa insidente.

Sa salaysay ng drayber ng bus na si Valentino Obligasion, 45-anyos, may isinaboy ang isang lalaking pasahero sa kanyang konduktora at pagkatapos ay sinindihan ito na naging dahilan ng pagliyab ng bus.

"May nakaaway po ‘yung konduktor na pasahero... Nu’ng nakita na lang po, tumatakbo na ‘yung konduktor ko, sinindihan siya nu’ng pasahero... Du’n na po nag-umpisa ang sunog," sabi ni Obligasion.

Ayon sa mga pasahero, nagkaroon ng pagtatalo ang konduktor at isang lalaking pasahero hanggang sa nagkainitan ang dalawa. Biglang binuhusan ng suspek ng hinihinalang gasolina na nakalagay sa maliit na botelya ang konduktor saka niya sinindihan ito.

Agad na binuksan ng drayber ang pinto nang magliyab ang loob ng bus subalit mabilis na kumalat ang apoy dahil sa mga plastic barrier.

Binasag ng ilang pasahero ang mga bintana para makalabas sa nasusunog na bus.

Idineklara namang fire out nang 1:20 ng hapon ang nagliyab na bus.

Patuloy ang imbestigasyon ng awtoridad sa nangyari.

3 nasawi, 34 naospital sa diarrhea outbreak

ni Lolet Abania | January 3, 2021

Tatlo ang nasawi at 34 ang naospital matapos mai-report ang pagkakaroon ng diarrhea outbreak sa munisipalidad ng Jose Abad Santos sa Davao Occidental.

"May 34 ang nadala sa district hospital namin at tatlo ang namatay (sa diarrhea outbreak)," sabi ni Roger Deloy ng Municipal Disaster Risk Reduction and Management Office (MDRRMO) ng Jose Abad Santos ngayong Linggo.

Ayon kay Deloy, mula sa Barangay Butuan ang 34 residenteng isinugod sa ospital habang hindi naman binanggit ang pagkakakilanlan ng tatlong nasawi.

"’Yung 34 (na dinala sa ospital) ay diyan lang sa isang barangay sa Butuan Jose Abad Santos, Davao Occidental," ani Deloy.

Hinala ng MDRRMO, ang kalidad ng tubig sa lugar ang posibleng dahilan ng diarrhea outbreak, subalit patuloy itong sinusuri ng regional health unit.

"Sa tubig ata, pero still ine-evaluate pa ng mga taga-RHU namin," sabi ni Deloy.

Personal namang binisita ni Jose Abad Santos Vice-Mayor James John Joyce ang 34 residenteng naospital sa Tomas Lachica District Hospital at kasalukuyang inoobserbahan ang kanilang kondisyon.

SAF, Ipinakalat na sa bansa para sa New Year

ni Lolet Abania | December 31, 2020

Nagtalaga ng mga miyembro ng Special Action Force (SAF) sa maraming lugar sa bansa upang madagdagan ang mga police personnel na nagmo-monitor sa seguridad ng mga mamamayan kasabay ng pagpapatupad ng minimum health protocols.

Ayon kay Philippine National Police (PNP) spokesperson Police Brig. Gen. Ildebrandi Usana, ang mga nasabing kawani ay naka-duty na para sa New Year’s Eve.

“Madaragdagan pa nga po ng puwersa ang ating mga kapulisan galing po sa Special Action Force,” ani Usana.

“Ang layunin naman po, hindi lang po sa seguridad at public order and safety, pati na rin po doon sa mga mamamayan na pumupunta-punta sa mga matataong lugar,” dagdag ng opisyal.

Sinabi pa ni Usana na nag-deploy din ng tinatawag na social distancing patrollers para matiyak na sumusunod ang publiko sa itinatakdang health protocols upang makaiwas sa pagkalat ng COVID-19.

Una nang sinabi ni Joint Task Force COVID-19 Shield commander Police Lt. Gen. Cesar Hawthorne Binag na nagsagawa na ang organisasyon ng doubled deployment ng mga pulis para sa panahon ng Kapaskuhan.

Nakatutok nang husto ang pulisya sa mga lugar tulad ng palengke, simbahan, malls, ports, terminals, at iba pa na inaasahang dinadagsa ng mga tao.