Tanggal-lisensiya sa mga doktor na nagturok ng ilegal na COVID vaccine

ni Lolet Abania | January 4, 2021

Naglabas ng babala ang Department of Health (DOH) na maaaring mawalan ng lisensiya ang sinumang doktor na mapapatunayang sangkot sa pagtuturok ng hindi rehistradong COVID-19 vaccines.

Sa Laging Handa public briefing ngayong Lunes, sinabi ni DOH Secretary Francisco Duque III na nakikipag-ugnayan na ang ahensiya sa Professional Regulation Commission (PRC) para talakayin ang liability ng mga doktor na madadawit sa ilegal na pagbabakuna.

“Tama ho kayo,” sabi ni Duque tungkol sa isyu ng pag-a-administer ng mga doktor sa unregistered COVID-19 vaccines. “Makikipag-ugnayan po ang Departamento ng Kalusugan sa PRC para tingnan kung ano po ba ang mga kalalabasan ng investigation, kung sino po ba ang mananagot,” dagdag ng kalihim.

Ayon kay Duque, ang magiging hakbang ng mga ahensiya ay nakadepende pa rin sa resulta ng imbestigasyon ng Food and Drug Administration (FDA).

Matatandaang ibinulgar ni Pangulong Rodrigo Duterte na may ilang miyembro ng militar ang naturukan na ng COVID-19 vaccine mula sa Chinese pharmaceutical company na Sinopharm.

Ipinaliwanag naman ni PSG commander Brigadier General Jesus Durante na natanggap ng kanyang mga tauhan ang COVID-19 vaccine nang libre, subalit itinanggi ang pagkakakilanlan ng donor.

Ipinagtanggol din ni Durante ang nangyaring pagbabakuna. Aniya, “President Duterte’s close-in-security detail needs to ensure that they are not themselves a threat to the President's health and safety.”

Ayon pa kay Durante, ang military personnel ang nag-inject ng nasabing vaccines sa kanilang sarili at wala sa labas ng military ang sangkot sa vaccination.

9k katao, delikado sa baha at landslides – NDRRMC

ni Lolet Abania | January 3, 2021

Umabot sa kabuuang 9,158 indibidwal o 2,409 pamilya ang apektado ng mga pagbaha at landslides dahil sa tail-end ng isang frontal system, ayon sa report ng National Disaster Risk Reduction and Management Council (NDRRMC) ngayong Linggo.

Mula sa 70 barangay sa MIMAROPA, Region V at Region VI ang labis na naapektuhang residente.

Sa kabuuang bilang nito, 2,067 indibidwal o 562 pamilya ang nananatili sa 13 evacuation centers,

habang 1,224 indibidwal naman o 450 pamilya ang piniling manatili na lamang sa kanilang mga kamag-anak.

Una rito, naitalang dalawa ang namatay at apat ang nawawala na nanggaling sa Region V.

Ayon sa NDRRMC, 30 insidente ng pagbaha ang nai-report mula sa Region II (Cagayan), MIMAROPA (Palawan at Oriental Mindoro), Region V (Camarines Sur, Sorsogon) at Region VI (Capiz).

Palawan, babayuhin ng malakas na pag-ulan – PAGASA

ni Lolet Abania | January 3, 2021

Itinaas na sa orange rainfall warning ang buong katimugang bahagi ng Palawan kabilang ang Kalayaan Group of Islands ngayong Linggo, ayon sa PAGASA.

Sa heavy rainfall advisory ng PAGASA, ngayong alas-2:00 ng hapon, nagbabala ang ahensiya ng posibleng mga pagbaha sa mga mabababang lugar, gayundin ang maaaring landslides.

Pinapayuhan ng PAGASA ang publiko, maging ang Disaster Risk Reduction and Management Council, na patuloy na mag-ingat at mag-monitor ng kasalukuyang lagay ng panahon.

Ang inilabas na warning ay base sa kasalukuyang radar trends at meteorological data ng PAGASA.

Una nang naglabas ng advisory ang PAGASA ngayong alas-onse ng umaga ng Linggo, na ang tail-end ng isang frontal system ang nakakaapekto sa buong Southern Luzon, kung saan magdudulot ng malakas na pagbuhos ng ulan sa tinatayang 10 lugar sa bansa, kabilang ang Bicol Region, Quezon at Polillo Islands.

Makararanas din ng kalat-kalat na mahina hanggang sa katamtamang pagbuhos ng ulan sa buong Metro Manila, MIMAROPA, Visayas, Mindanao, Aurora, Nueva Ecija, Bulacan at ilang bahagi ng CALABARZON.