P1.36-M halaga ng ecstasy, nasabat; 1 patay

ni Lolet Abania | January 8, 2021

Patay ang isang suspek habang nakatakas ang isa pa matapos ang isinagawang anti-illegal drugs operation ng Philippine National Police (PNP) sa Ermita, Manila ngayong Biyernes nang umaga.

Ayon kay PNP Chief Police General Debold Sinas, ang nasawing suspek ay kinilala sa tawag na "Kuya," na armado ng isang caliber .45 pistol at nakipagbarilan sa mga kawani ng PNP Drug Enforcement Group para takasan ang pag-aresto kanya ng mga ito.

Kinilala naman ang isa pang suspek na si Ish Aguilar, kasamahan umano ni Kuya, na nagawang makatakas kaya pinaghahanap na rin ng awtoridad,

Sinabi ni Sinas na ang mga suspek ay distributor umano ng ilegal na droga sa Metro Manila at sa kalapit na probinsiya.

Aniya pa, nakukuha ng mga ito ang supply ng drugs mula sa mga dayuhan at ilang Pinoy na kaibigan.

Nakumpiska ng mga awtoridad ang 800 tableta ng hinihinalang ecstasy na nagkakahalaga ng P1,360,000; dalawang plastic sachets ng hinihinalang shabu na P340,000 ang halaga; isang caliber .45 pistol; at buy bust money na P5,000.

Ayon kay PNP-DEG Chief Police Brigadier General Ronald Lee, sina Kuya at Aguilar ay nakatakas sa unang operasyon ng awtoridad noong Huwebes ng hapon nang ni-raid nila ang isang kitchen-type shabu laboratory sa Cainta, Rizal.

Gayunman, ang live-in partner ni Aguilar na si Khrystyn Almario Pimentel ay naaresto sa nasabing operasyon. Nasabat kay Pimentel ang 2,000 tableta ng hinihinalang ecstasy na P3,400,000 ang halaga; 10 maliliit na pakete ng hinihinalang marijuana na P60,000 ang halaga; at hinihinalang shabu na nagkakahalaga ng P6,800,000.

Nasabat din ng pulisya ang ilang laboratory equipment na ginagamit para sa pagpoproseso ng shabu.

Mag-utol na edad 10 at 20, patay sa sunog sa Kyusi

ni Lolet Abania | January 8, 2021

Dalawa ang kumpirmadong namatay sa sunog na naganap sa Quezon City ngayong umaga ng Biyernes, ayon sa Bureau of Fire Protection.

Base sa report ng BFP officials, isang 20-anyos na babae at 10-anyos niyang kapatid na babae rin ang nasawi sa sunog.

Sa inisyal na imbestigasyon, naganap ang sunog bandang alas-6:00 ng umaga sa isang bahay sa Matahimik Street sa Barangay Malaya ng nasabing lungsod.

Ayon sa BFP, umabot lamang sa unang alarma ang sunog at tumagal nang 30 minuto. Sa salaysay ng kapatid na lalaki ng mga biktima, natutulog ang mag-ate sa mezzanine ng bahay nila habang sa ibaba naman siya natutulog at kanilang tatay nang mangyari ang sunog.

Sinubukan pa niyang iligtas ang dalawang kapatid na na-trap sa itaas matapos mailabas ang kanilang tatay sa nasusunog na bahay, subalit lumaki na ang usok at apoy kaya hindi na siya makapasok.

Batay pa sa ulat ng BFP, apat lamang ang nakatira sa nasabing bahay. Patuloy na inaalam ng awtoridad ang naging dahilan ng sunog na nagsimula sa hagdan ng bahay.

Mga LGUs, naglaan na ng pondo para sa COVID-19 vaccine

ni Lolet Abania | January 7, 2021

Inilabas na ng ilang lokal na pamahalaan ang halaga ng ilalaang pondo sa COVID-19 vaccine na gagamitin para sa kani-kanilang nasasakupan.

Marami sa mga lungsod ang ibibigay nang libre ang nasabing vaccine para sa mga residente habang prayoridad ng iba ang mga sektor na irerekomenda ng World Health Organization.

Narito ang mga local government units (LGUs) at kanilang inilaang pondo para sa COVID-19 vaccine:

• Antipolo City, Rizal - ₱300 million

• Cainta, Rizal - ₱150 million

• Caloocan City - ₱125 million

• Cebu City - ₱400 million

• Iloilo City - ₱200 million

• Makati City - ₱1 billion

• Malabon City - ₱200 million

• Mandaluyong City - ₱200 million

• Manila City - ₱250 million

• Marikina City - ₱82.7 million

• Muntinlupa City - ₱170 million

• Navotas City - ₱20 million

• Parañaque City - ₱250 million

• Pasay City - ₱250 million

• Pasig City - ₱300 million

• Puerto Princesa, Palawan - ₱500 million

• Quezon City - ₱1 billion

• San Juan - ₱50 million

• Taguig City - ₱1 billion

• Valenzuela City - ₱150 million

• Zamboanga City - ₱200 million

Para kina Mayor Arthur Robes at Rep. Florida Robes, sasagutin ng lokal na pamahalaan ang pagbabakuna sa lahat ng residente ng San Jose, Del Monte sa Bulacan, subalit hindi nila binanggit ang ilalaang pondo para sa vaccine.

Ayon naman kina Caloocan Mayor Oscar Malapitan at Makati Mayor Abby Binay, libreng matatanggap ng kanilang constituents ang COVID-19 vaccine.

Ibibigay din ng Taguig City government nang libre para sa lahat ng residente ng lugar ang vaccine.

Sa Malabon, ₱200 milyon ang inilaan ng lokal na pamahalaan para sa 20 porsiyento hanggang sa 30 porsiyento ng populasyon ng siyudad.

Libreng vaccination din ang matatanggap ng 300,000 residente ng Parañaque City at prayoridad pa rin ang mga health workers at senior citizens.

Bukod dito, sinabi ni Mayor Edwin Olivarez na naglaan pa sila ng ₱1 billion para sa pagkuha ng vaccine na pamamahalaan ng awtoridad.

Sa Pasig City, uunahing mabigyan ng COVID-19 vaccine ang mga health workers at senior citizens.

Prayoridad din ng Quezon City government ang mga health workers, senior citizens at iba pang sektor na irerekomenda ng WHO.

Sa ngayon, siniguro na ng lungsod ang 750,000 doses ng AstraZeneca vaccine.