550k taga-kyusi, unang tuturukan ng COVID vaccine

ni Lolet Abania | January 12, 2021

Isinasagawa na ng lokal na pamahalaan ng Quezon City ang renovation ng mga vaccination centers sa lungsod bilang bahagi ng inoculation program para sa COVID-19.

Ayon kay Mayor Joy Belmonte sa isang panayam ngayong Martes, "We have already identified 24 here in Quezon City with the help of the third party. We are now in the process of renovating these centers and we have also identified a cold storage facility for the vaccinations."

May kabuuang 1.1 milyong AstraZeneca vaccines ang tiyak na makukuha ng city government para sa mga residente ng lungsod.

Ayon pa kay Belmonte, inaasahang mabebenepisyuhan ng nasabing vaccine ang tinatayang 550,000 residente.

Aminado naman si Belmonte na mayroong takot at pagdududa mula sa mga residente tungkol sa COVID-19 vaccines. Kinakailangan lang daw na ipaliwanag sa kanila nang husto ang pagiging epektibo ng bakuna laban sa sakit.

"They're undecided based on fear. If you can just reassure them on the safety and efficacy of the vaccines, I think it will change their minds," ani Belmonte.

Isa ang Quezon City sa lokal na pamahalaan ng Metro Manila na nakasama sa tripartite agreement ng national government at AstraZeneca upang makakuha ng vaccines na gagamitin para sa kanilang nasasakupan.

25,000 vaccinators, isinailalim na sa training

ni Lolet Abania | January 12, 2021

Tinatayang nasa 25,000 ang isinailalim sa training para mag-administer ng COVID-19 vaccines sa mga Pinoy kasabay ng nalalapit na pagsisimula ng gagawing pagbabakuna sa bansa, ayon kay Vaccine Czar Secretary Carlito Galvez Jr.

Ayon kay Galvez, pinagsama-sama na rin ng mga local government units (LGUs), partikular ang National Capital Region (NCR), ang listahan ng mga kasali sa vaccination.

“We are training more or less 25,000 vaccinators,” ani Galvez sa isang interview.

“'Yung ating mga LGUs lalo na dito sa NCR nagko-consolidate na sila ng mga master list ng mga magpa-participate sa nationwide vaccination,” dagdag niya.

Target ng gobyerno na mabakunahan ang 50 hanggang 70 milyong Pinoy kontra COVID-19 ngayong taon.

Sinabi ni Galvez na tinatayang 50,000 Pinoy ang inaasahang mababakunahan laban sa coronavirus nitong Pebrero ng Sinovac vaccines.

Ito ang magsisilbing panimula para sa gagawing pagbabakuna, ayon kay Galvez.

“Magkakaroon tayo ng national rollout. So ito 'yung tinatawag natin na rehearsal para matuto 'yung ating mga vaccinator at para makita natin 'yung assimilations kung paano natin gagawin ang nationwide rollout,” ani Galvez.

Binanggit ni Galvez na ang mga nasabing vaccinators ay nakadalo na rin sa mga isinagawang lectures tungkol sa pagbabakuna at itong ‘rehearsal’ ang magsisilbing ‘practical exercise’ nila.

Dagdag ni Galvez, kapag dumating na sa Pebrero ang 50,000 doses ng Sinovac vaccines sa bansa, marami pang nakatakdang i-deliver nito sa mga susunod na buwan.

“So 'yung pagbibigay ng Sinovac, we will have 50,000 for February, 950,000 for March, 1 million for April, 1 million for May and then 2 million for June and 3 million for July and so on and so forth,” aniya.

“'Yan ang dapat malaman ng mga kababayan natin kapag nag-order tayo ng vaccine. It will be in tranches,” sabi ng kalihim.

Gayunman, ayon kay Galvez, posibleng maunang gamitin ang COVID-19 vaccines na mula sa Pfizer sa ilalim ng COVAX Facility bago ang Sinovac vaccines kasabay ng plano ng gobyerno para agarang pagbabakuna sa bansa.

Taas-hulog sa SSS, hinarang

ni Lolet Abania | January 11, 2021

Hiniling ng mga manggagawa at grupo ng mga employers sa gobyerno na ipagpaliban muna ang pagtataas ng kontribusyon para sa lahat ng miyembro ng Social Security System (SSS).

Sa isang forum, ayon kay Sonny Matula, chairperson ng isang labor group na Nagkaisa, maaaring magbigay ang pamahalaan ng kanilang contribution sa SSS base sa Section 20 ng Social Security Act of 2018.

“'Yung national government ay ni-require na magbibigay ng appropriations sa SSS annually pero hindi ito sinusunod ng ating gobyerno mula noong naitayo itong SSS,” sabi ni Matula.

“Ang nagko-contribute lang ay ang employer at workers mula 1957 maliban sa naunang P500,000 seed money ng SSS na nagmula sa gobyerno,” dagdag ng labor leader.

Ipinunto naman ng Philippine Chamber of Commerce and Industry (PCCI) chairperson at pangulo ng Employers Confederation of the Philippines (ECP) na si Sergio Ortiz-Luis na hirap makabangon ang marami sa mga negosyante dahil labis na naapektuhan ng COVID-19 pandemic.

Ayon pa kay Luis, ang magiging dagdag na kontribusyon ng mga miyembro ng SSS ay napakahalaga sa kanila lalo na sa mahihirap.

“Marami sa mga tao natin, nawalan ng trabaho. Alam naman natin, 98% ng enterprises natin, eh, mga micro industries. Kalahati noon, halos nagsara. ‘Yung iba, nag-iisip pa kung magbubukas o hindi,” sabi ni Luis.

“Napakahalaga kahit na piso eh, dito sa time na 'to dahil kulang na kulang 'yung pera ng tao. Although, sasabihin na maliit lang naman ‘yan, eh, para naman doon sa talagang isang kahig, isang tuka, malaki 'yan, malaking bagay 'yan,” dagdag ni Luis.

Ang Social Security Act of 2018, na naipasa para matiyak ang long-term viability ng SSS' fund life, ay may mandato ng 1% dagdag sa kontribusyon ngayong taon na aabot ng monthly contribution rate na 13%.

Matatandaang noong January 4, ipinag-utos ni Pangulong Rodrigo Duterte ang pagpapaliban ng 2021 contribution hike para sa lahat ng miyembro ng PhilHealth. Noong January 6 naman, ang House Makabayan bloc ay naghain ng House Bills 8310 at 8311 para isaayos ang mga probisyon sa batas na may mandato ng awtomatikong pagtataas ng kontribusyon sa SSS at PhilHealth.

Gayundin noong January 7, inihain ni Speaker Lord Allan Velasco ang House Bills 8316 at 8317 na magbibigay ng awtoridad sa pangulo upang isuspinde ang nakatakdang pagtataas sa PhilHealth at SSS contribution rates sa panahon ng national emergencies.