P10-K insurance kada baboy, alok ng DA

ni Lolet Abania | January 21, 2021

Iminungkahi ng Department of Agriculture (DA) sa backyard at commercial na mga hog raisers na tiyaking makakuha ng insurance package para sa kanilang mga alaga upang masigurong makakarekober agad sakaling maapektuhan ng African Swine Fever (ASF).

“As the Department of Agriculture (DA) intensifies efforts to encourage hog raisers to get back to business and, ultimately, help pork production rebound, availing of an insurance coverage is a prudent safety net for existing raisers and for those in ASF-free areas who will venture into this business,” ani Agriculture Secretary William Dar sa isang statement ngayong Huwebes.

“Insurance offers stronger security in protecting one’s investments,” dagdag ni Dar.

Sinabi ni Dar na dapat samantalahin ng mga tagapag-alaga ang libreng livestock insurance na iniaalok ng Philippine Crop Insurance Corporation (PCIC) ng DA.

“Regain your businesses and protect your livelihood,” aniya pa.

Ayon sa pangulo ng PCIC na si Atty. Jovy Bernabe, isinama ng DA-PCIC, nag-iisang agricultural insurance firm sa bansa, ang ASF sa mga iko-cover ng livestock insurance na sinimulan noon pang nakaraang taon nang kumalat ang nasabing sakit sa mga hayop sa mga probinsiya.

Ang PCIC ay magbibigay ng P10,000 insurance na sakop kada isang baboy at ang premium payment ay aabot lamang ng 2.25% o P225.

Para sa maliliit na backyard hog raisers, bibigyan sila ng libreng insurance kung sila ay nasa listahan ng Registry System for Basic Sectors in Agriculture (RSBSA).

Paliwanag ni Bernabe, ang insurance coverage ay iba sa tinatawag na ASF indemnification claims, kung saan ang mga benepisyaryo ay karapat-dapat na mabigyan ng P5,000 assistance kada baboy na na-culled.

Sinabi rin ni Bernabe na sa mga hog raisers na nais kumuha ng nasabing insurance, maaaring mag-online sa DA-PCIC website, o pumunta sa alinmang 13 regional offices, 58 provincial extension offices at 20 service desks.

Maaari ring humingi ng assistance sa provincial, city o municipal agricultural officer o sinumang opisyal ng kanilang lokalidad.

Suspensiyon sa taas-hulog sa SSS, aprub na sa Kamara

ni Lolet Abania | January 21, 2021

Inaprubahan na ang panukalang suspensiyon sa pagtataas ng contribution rate ng Social Security System (SSS) sa committee level ng Kamara ngayong Huwebes.

Sa isang virtual hearing, naaprubahan ng House of Representatives Committee on Government Enterprises and Privatization ang hakbang na ipagpaliban muna ang pagpapatupad ngayong buwan ng pagtataas ng buwanang kontribusyon ng mga miyembro ng SSS na nanggagaling sa kanilang mga sahod, na gawing 13% mula sa dating 12% lamang.

Maraming panukala ang naihain sa Kamara kung saan pinagsama-sama ito upang mabuo ang House Bill 8317 na inihain ni House Speaker Lord Allan Jay Velasco na magbibigay kapangyarihan sa Pangulo upang suspendihin ang nakatakdang pagtataas ng SSS contribution rates.

"We are witnesses to the negative impact of the COVID-19 outbreak. Under this pretext, the sovereign government must be given the prerogative to bend the rules of the social security law in favor of the greater good," ayon sa nakasaad na paliwanag ng panukala.

"Increasing the rate of contributions of SSS members will strikingly undermine the recovery effort of everyone suffering from job losses, wage reduction, business closures, and health-related issues," dagdag pang pahayag.

Sa ilalim ng Social Security Act (SSA) of 2018, nakatakdang mag-increase ang SSS sa monthly contribution ng lahat ng miyembro nito upang masiguro ang long term viability ng pension fund at dagdag pang benepisyo na isusulong.

Depensa ng SSS, kinakailangan na dagdagan ang contribution rate ngayong taon, subalit ayon sa kanilang pangulo at chief executive officer na si Aurora Ignacio, susunod ang ahensiya sakaling ipag-utos ng Malacañang ang pagpapaliban ng pagtataas nito.

Nakasaad sa mandato ng SSS na dapat na itaguyod ng ahensiya ang social justice at pagbibigay ng proteksiyon sa mga miyembro at pamilya nito sa maaaring mangyari tulad ng disability, sickness, maternity, old age, death, at iba pa na posibleng magresulta sa kawalan ng income o anumang pinansiyal na suliranin.

Matatandaang ipinag-utos din ni Pangulong Rodrigo Duterte ang pagpapaliban ng 2021 contribution hike sa mga miyembro ng Philippine Health Insurance Corp. (PhilHealth) dahil sa nararanasan ng bansa sa pandemya ng COVID-19.

63-anyos na lola patay sa sunog

ni Lolet Abania | January 20, 2021

Isang 63-anyos na babae ang namatay sa sunog matapos na ma-trap sa kuwarto ng kanyang bahay sa Barangay Pasong Tamo, Quezon City ngayong Miyerkules nang umaga.

Ayon kay Bureau of Fire Protection (BFP) Station 6 commander Fire Captain Aloysius Borromeo, walang elektrisidad sa nasabing bahay at tanging kandila lamang ang nagbibigay-liwanag dito.

Naapula ang sunog bandang alas-7:33 ng umaga. Patuloy ang isinasagawang imbestigasyon ng mga awtoridad sa naging sanhi at halaga ng pinsala ng sunog.