P24-M, donasyon ng US sa ‘Pinas para sa measles, rubella at polio vaccine

ni Lolet Abania | January 29, 2021

Nagbigay ang United States ng mahigit sa P24 million donasyon sa Pilipinas para sa immunization program laban sa measles, rubella, at polio.

Sa isang statement ng US Embassy na inilabas ngayong Biyernes, ang gobyerno ng Amerika sa pamamagitan ng US Agency for International Development (USAID) katuwang ang ating pamahalaan at iba pang development partners ay naglunsad ng ikalawang bahagi ng Measles-Rubella and Oral Polio Vaccine Supplemental Immunization Activity.

Ang MR OPV SIA Phase 2, ay follow-up sa isinagawa ng gobyerno na Phase 1 immunization campaign noong nakaraang taon, kung saan nakabilang dito ang buong Visayas, Metro Manila, Central Luzon, at rehiyon ng CALABARZON.

Target ng pamahalaan na mabakunahan ang 4.8 milyong mga bata na nasa 5-anyos laban sa polio, at 5.1 milyong mga bata naman sa pagitan ng siyam at 59-buwang-gulang laban sa measles at rubella.

Sa pakikipagtulungan ng UNICEF, kasama ng USAID assistance ang technical expertise, logistics support at community engagement para sa kampanya ng vaccination.

Kaisa si USAID Philippines Mission Director Lawrence Hardy II at mga representatives mula sa gobyerno tulad nina Department of Health (DOH) Secretary Francisco Duque III, Cavite Rep. Luis Ferrer IV at General Trias Mayor Antonio Ferrer sa paglulunsad ng pambansang kampanya ng immunization program sa General Trias City Medicare Hospital sa Cavite ngayong January 29.

“Vaccination saves lives and prevents disabilities from such diseases. These vaccines can give our vulnerable children a good start at life so they can grow into healthy and productive adults. Above all, no child should be left behind,” ani Duque.

Samantala, nanawagan si Hardy sa mga local leaders na suportahan ang isinasagawang immunization programs at himukin ang mga magulang at guardians ng mga bata na pabakunahan ang mga ito laban sa nakamamatay na sakit.

“Our efforts to protect Filipino children from these diseases will enable them to attend school, participate in community activities, and contribute fully to society,” ani Hardy.

Simbahan at iskul sa QC, oks gamitin para sa COVID vaccination

ni Lolet Abania | January 28, 2021

Inaprubahan na ng Department of Health (DOH) ang 24 vaccination sites sa Quezon City, ayon kay Mayor Joy Belmonte.

"As of today's presentation, we have secured 24 sites so all of these sites, I just want to emphasize, kailangan kasi ng DOH approval kasi may flow 'yun, eh. Marami kaming ipine-present sa DOH na iba't ibang mga sites and then the DOH tells us which is appropriate and not appropriate," sabi ni Belmonte sa press briefing ngayong Huwebes.

"So at the moment, ito 'yung mga inaprubahan ng DOH and these are the ones with sure staff and personnel available," dagdag ng alkalde.

Bukas pa rin ang lokal na pamahalaan na magdagdag ng mga inoculation center para sa vaccination program ng lungsod.

Ayon kay Belmonte, ang mga simbahan at academic institutions gaya ng Ateneo De Manila University at Sienna College ay nag-alok ng kanilang pasilidad para gamitin bilang vaccination centers.

Ang Quezon City ay isa sa mga local government units na pumirma sa tripartite agreement sa AstraZeneca at sa national government patungkol sa pagkuha ng COVID-19 vaccines.

Sinabi rin ni Belmonte na ang pagbabakuna sa mga empleyado na nag-oopisina sa Quezon City ay kinokonsidera nilang isama.

Pinayuhan naman si Belmonte ng vaccine czar na si Secretary Carlito Galvez, Jr. na makipag-ugnayan ang lungsod sa mga private sectors para sa pagkuha ng mas maraming COVID-19 vaccines na ibibigay sa mga empleyado.

"This has been considered very seriously and as soon as we get the proper guidance as to how to go about with this, definitely Quezon City is very open to doing this," sabi ni Belmonte.

Intelligence Major General Luna, sinibak sa palpak na listahan ng mga napatay na NPA

ni Lolet Abania | January 28, 2021

Sinibak na sa puwesto ni Department of National Defense (DND) Secretary Delfin Lorenzana si Deputy Chief of Staff for Intelligence Major General Alex Luna dahil sa lumabas na maling listahan ng mga NPA na napatay ng militar.

Epektibo ngayong araw, Enero 28, 2021, ang pagtanggal sa posisyon kay Luna.

Sinabi ni Lorenzana na sa opisina ni Luna sa J2 nanggaling ang maling listahan ng mga rebeldeng napatay ng militar. Ipinaliwanag ng kalihim na isa itong kapabayaan sa trabaho na hindi maaaring palagpasin kaya nararapat lamang na siya ay managot sa napakalaking pagkakamali.

Matatandaang umani ng matinding batikos ang AFP matapos lumabas ang mali-maling listahan ng mga NPA na napatay ng militar kung saan mali ang pangalan na nakalagay habang ang iba naman ay buhay pa talaga.

"I am relieving MGen Alex Luna from his post as Deputy Chief of Staff for Intelligence, J2, effective today (28 Jan 2021). The publication of an erroneous list, originating from his office OJ2, of alleged NPA killed by the military is an unforgivable lapse. His negligence only shows a lackadaisical attitude towards his job resulting to confusion and damage to reputation. We do not take these offenses lightly and I want to hold the people involved accountable,” ayon kay Lorenzana.