Plastic straw at coffee stirrer, bawal na — DENR

ni Lolet Abania | February 3, 2021

Ipinahayag ng Department of Environment and Natural Resources (DENR) na ang mga plastic straws para sa mga softdrink at coffee stirrers ay posibleng ipagbawal na sa bansa.

Sa isang statement, sinabi ng DENR na ang mga produktong ito ay nakabilang na sa listahan ng non-environmentally acceptable products (NEAP) na pinag-aralan ng National Solid Waste Management Commission.

Sa ilalim ng Ecological Solid Waste Management Act of 2000 o Republic Act 9003, anumang items na nakabilang sa listahan ng NEAP ay ipagbabawal, ayon sa itinatakda ng Commission.

"I am elated that after 20 years since the birth of RA 9003, the NEAP listing has now commenced,” sabi ni DENR Undersecretary Benny Antiporda.

“This is long overdue and we need to catch up with the demand of solid waste management in our country,” sabi pa ni Antiporda.

Ayon sa DENR, ang resolusyon ay pinasa sa kabila ng mga oposisyon mula sa ilang miyembro ng commission gaya ng Department of Trade and Industry (DTI), at ang mga sektor ng manufacturing at recycling industries.

“We have long been fighting for and we are committed in having a NEAP list to comply with the law to combat environmental damage,” saad ni Antiporda.

"The prohibition on these two single-use plastic items may be small steps in the NEAP listing, but it is a big leap when it comes to compliance with the provisions of RA 9003," dagdag ng kalihim.

4 construction workers, nabagsakan ng steel bars

ni Lolet Abania | February 2, 2021

Apat na construction workers ang nasugatan matapos na mabagsakan ng steel bars sa Blumentritt, Manila kahapon ng hapon.

Tatlo sa kanila ay nagtamo ng minor injuries at pinayagan nang makauwi habang ang isa ay sumailalim pa sa medical tests at hinihintay ang X-ray results, ayon sa NLEX Corp.

“Particularly ‘yung isa, nadaganan siya sa area ng kanyang dibdib at tiyan. May ilang mga bakal po ang dumagan sa kanya, estimately po, mga tatlo, apat,” sabi ni Francisco Vargas, OIC ng Raha Volunteer Fire Department.

Nangyari ang insidente sa isang construction site kung saan 20 metro ang layo mula sa LRT-1 Blumentritt station, pahayag ng Light Rail Manila Corporation.

Ayon sa Blumentritt Police Precinct chief na si Lt. Ferdinand Cayabyab, ang steel bars ay galing sa isang foundation para sa ginagawang NLEX-SLEX connector road sa nasabing lugar. Bumigay ang mga kable na gamit sa pagkakabit ng steel bars na siya namang bumagsak sa apat na construction workers.

Sa isang statement ng NLEX Corp., nangako ang kumpanya na magbibigay sila ng lahat ng kailangang assistance para sa mga naturang workers na naaksidente.

"The company is committed to upholding safety standards on all its projects, and will be conducting a full investigation of the incident," ayon sa statement.

Patuloy ang imbestigasyon ng mga awtoridad sa insidente.

Magalong, tuloy bilang contact tracing czar hangga't oks kay P-Du30

ni Lolet Abania | February 2, 2021

Matapos magpasa ng irrevocable resignation bilang contact tracing czar kaugnay ng dinaluhang kontrobersiyal na party kung saan nalabag ang COVID-19 health protocols, nilinaw ni Baguio City Mayor Benjamin Magalong na mananatili siya sa naturang posisyon kung nanaisin ni Pangulong Rodrigo Duterte.

Nauna nang sinabi ni Presidential Spokesperson Harry Roque na hindi tinanggap ng Malacañang ang kanyang pagbibitiw at ayon kay Magalong, magkakaroon sila ng pagpupulong ni Secretary Carlito Galvez Jr. at Deputy Chief Implementer Secretary Vince Dizon tungkol sa kanyang resignation.

Aniya, "I'm due to meet with Secretary Galvez this week together with Secretary Vince and again I would like to reiterate that my resignation is irrevocable. I will continue to help in the contact tracing.”

Inamin naman ni Magalong na hindi niya mahihindian si P-Duterte kung ito na mismo ang magsasabi sa kanya na manatili sa puwesto bilang contact tracing czar ngunit umaasa siya na hindi na ito makarating pa sa pangulo.

Aniya, "It is a situation that no one can refuse if the President tells you to stay and perform your job. I cannot refuse the President. Pero hindi naman na siguro aabot 'yan kay Presidente, sa dami ng problema ng Presidente. Siguro at the level ni Secretary Galvez, makapagdesisyon na.”

Samantala, sa ngayon ay pinangungunahan pa rin ni Magalong ang contact tracing efforts sa Bontoc at La Trinidad.

Aniya pa, "I continue to perform my job as contact tracing lead, in fact mina-manage pa rin namin 'yung situation doon sa Bontoc and La Trinidad and I just met with Asec. France Laxamana yesterday of DOH and we are due to meet with her team on Wednesday para nga turuan namin ng aming analytical tools, especially on the aspect of link analysis.”