Mag-mask kahit sa loob ng sasakyan — Palasyo

ni Lolet Abania | February 5, 2021

Pinanindigan ng pamahalaan ang itinakdang polisiya na kailangang nakasuot ng face mask ang lahat ng nasa loob ng sasakyan kahit pa magkasama sa bahay o hindi ang nakasakay dito.

Sa isang joint statement, ayon sa Department of Transportation (DOTr) at sa Department of Health (DOH), dapat na sundin at ipatupad ang sumusunod na guidelines sa pagsusuot ng face mask sa loob ng sasakyan:

• Kung mag-isa lamang bumibiyahe, maaaring tanggalin ng driver ang kanyang face mask.

• Kung ang driver ay may kasamang pasahero o mga pasahero, mandatory na lahat ng indibidwal na nasa loob ng sasakyan ay maayos na nakasuot ng face mask, kahit pa magkasama sa isang bahay ang nakasakay dito.

Ang polisiya ay alinsunod sa naging desisyon ng Inter-Agency Task Force on Emerging Infectious Diseases (IATF-EID).

Sa isang Viber message naman ni DOTr Assistant Secretary Goddess Libiran, sinabi nitong ang mga policy-makers ang siyang magpapaliwanag kung paano maayos na ipatutupad ang policy at kung ano ang mga fines and penalties na ipapatupad sa mga pasaway.

Nakapaloob sa joint statement ng DOH-DOTr na ang hakbang ay nabuo sa koordinasyon at pagtutulungan sa pagitan ng Land Transportation Office (LTO), Land Transportation Franchising and Regulatory Board (LTFRB), Metropolitan Manila Development Authority (MMDA), Inter-Agency Council for Traffic (IACT), Philippine National Police-Highway Patrol Group (PNP-HPG), iba pang law enforcement agencies, at local government traffic offices/units, na ayon pa sa statement, “Concerning the proper implementation of the Resolution, and the imposition of appropriate fines and penalties for violations thereof, in accordance with existing laws, rules and regulations.”

116K health workers, unang sasampulan ng COVID-19 vaccine

ni Lolet Abania | February 5, 2021

Tinatayang nasa 116,000 health workers ng National Capital Region (NCR) ang sumailalim na sa pre-registration para makatanggap ng COVID-19 vaccine, ayon sa Department of Health (DOH).

Ayon kay Dr. Razel Nikka Hao, Deputy of COVID-19 Surveillance and Quick Action Unit, ang 116,000 health workers ay kabilang sa inisyal na listahan pa lamang habang nagpapatuloy ang registration para sa coronavirus vaccine.

“At this point, we are in the process of master listing for group A1 or all of the workers in frontline health care services. Since January this year, we have reached out health care facilities and local governments, to determine sino magpi-fit sa mga criteria, sino itong mga eligible... We are getting the numbers which will guide our operational plans,” ani Hao sa isang online briefing ngayong Biyernes.

Sa ilalim ng COVID-19 vaccination program ng gobyerno, ang mga empleyado na nasa frontline health services ang una sa priority list na mabakunahan.

Gayunman, dahil limitado ang supply ng COVID-19 vaccine, kinokonsidera nilang bawasan ang mga nasa listahan base sa kaso ng COVID-19 sa lugar, ang kapasidad ng isang local government unit (LGU) na magkaroon nito at kayang ipamahaging vaccines, maging ang exposure at peligro sa dami ng namamatay na mga indibidwal.

Batay sa records ng pamahalaan, ang NCR ay nananatiling epicenter ng COVID-19 pandemic sa bansa kung saan may 4,602 bagong coronavirus cases na naitala sa loob lamang nitong dalawang linggo.

Sinabi naman ni Manila Vice-Mayor Honey Lacuña na tinatayang 80,000 residente ng Maynila ang nakapagpa-pre-register na para sa COVID-19 vaccination program ng lungsod.

“Iyong non-Manila residents po na naka-dorm (sa Manila) kasi frontliners, we suggest na iyong gamitin nilang residential address ay iyong kanilang place of work,” ani Lacuña.

Walang putol sa kuryente, aprub na ni P-Duterte

ni Lolet Abania | February 4, 2021

Inaprubahan na ni Pangulong Rodrigo Duterte ang rekomendasyon ng Department of Energy (DOE) na ipagpatuloy ang pagpapatupad ng polisiya ng no disconnection sa mga customers na may mabababang buwanang konsumo sa elektrisidad.

Ayon kay Presidential Spokesperson Harry Roque, ang implementasyon ng no disconnection policy ay para sa buong buwan ng Pebrero. Ang mga distribution utilities ay kailangan ding magbigay ng opsiyon para sa installment payment na gagawin ng mga customers.

Sakop ng polisiya ang mga customers na kumokonsumo ng 100 kph at mas mababa pa rito kada buwan. Sa isang news conference, kinumpirma ni Cabinet Secretary Karlo Nograles ang naging desisyon ni Pangulong Duterte sa pulong ng mga gabinete kagabi.

“The President readily agreed given that electricity is a basic necessity our countrymen cannot live without,” ani Nograles.

“Makakahinga na po nang maluwag ang ating mga kababayan na mababa o walang kita. Hindi po kayo mapuputulan ng kuryente,” dagdag niya.

Matatandaang ipinag-utos ng Energy Regulatory Commission (ERC) sa mga power distribution utilities na huwag magpatupad ng anumang disconnection sa mga account na hindi pa nabayarang bills hanggang December 31, 2020 ng mga consumers na may buwanang konsumo na tinatawag na “not higher than twice the ERC maximum lifeline consumption level.”

“According to the DOE, while lifeliners comprise 32% of the customer base, they only account for 3% of electricity sales. So, this is very doable,” saad ni Nograles.

Ayon pa kay Nograles, hinimok din ni P-Duterte ang Kongreso na palawigin ang pagkakaroon ng subsidy para sa mga marginalized power consumers sa loob ng 30 taon o mula 2021 hanggang 2051. “[This is] because of the pandemic and sa computation ng DOE, hindi naman ito mabigat para sa ating mga distribution utilities. Kayang-kaya naman po,” sabi pa ni Nograles.

Inaprubahan naman ng Senado noong nakaraang buwan ang extension nito ng 10 taon.

Tinugon naman ng Manila Electric Company (Meralco) ang direktiba ng pamahalaan na palawigin pa ang no-disconnection policy para sa mga customers na may mabababang buwanang konsumo ng kuryente.

"We will comply with the government's directive and will wait for the specific guidelines from the Department of Energy. We would like to assure our customers that we will continue to assist all of them in addressing their billing issues,” ayon sa pahayag ni Joe Zaldarriaga, spokesperson ng Meralco.