Child Car Seat law at private motor vehicle inspection, stop muna – P-Duterte

ni Lolet Abania | February 11, 2021

Ipinag-utos ni Pangulong Rodrigo Duterte ang pagpapatigil ng implementasyon ng Child Car Seat law at ang mandatory private motor vehicle inspection, ayon kay Presidential Spokesperson Harry Roque, Jr..

“'Yan po ang desisyon ng Presidente, binalanse po niya dahil nga sa pinagdaraanan na krisis na COVID-19,” sabi ni Roque sa Palace briefing ngayong Huwebes.

Nauna nang inanunsiyo ng Department of Transportation (DOTr) ang pagpapaliban ng Child Car Seat law, kung saan ipinatigil muna ng ahensiya ang polisiya para sa pagkakaroon ng car seat sa mga batang edad 12 at pababa na nakasakay sa mga pribadong sasakyan dahil sa naantalang mga guidelines kung paano ipatutupad ito sa gitna ng COVID-19 pandemic.

Ayon sa mga industriya ng automotive, tinatayang nagkakahalaga ang child car seat ng P3,000 hanggang sa P30,000.

Nanawagan din ang mga senador para sa pagbasura sa na-roll out na 138 private motor vehicle inspection centers (PMVIC) sa buong bansa na mayroong ipinatutupad na inspection fee na P1,800 mula sa mga sasakyan na may bigat na 4,500 kgs o mas mababa pa rito.

Sakaling ang isang behikulo ay hindi makapasa sa test, kinakailangang sumailalim sa mga angkop na repairs ang sasakyan saka muling babalik sa private inspection centers, kung saan ang isang motorista ay magbabayad ng dagdag na P900 reinspection fee para makakuha ng clearance. Kinuwestiyon naman nina Senadora Grace Poe at Senador Ralph Recto ang integridad ng naturang sistema. Anila, dagdag na pahirap ito sa marami dahil sa hindi malinaw na proseso, labis na bayad na kaduda-duda at ang pagpapatupad ng polisiya na walang tamang konsultasyon sa publiko.

600K doses ng Sinovac vaccine, darating sa Feb. 23 – Malacañang

ni Lolet Abania | February 11, 2021

Mahigit sa kalahating milyong doses ng COVID-19 vaccine mula sa Chinese pharmaceutical firm na Sinovac ang nakatakdang dumating sa bansa sa February 23, ayon sa pahayag ng Malacañang.

Sa isang press briefing ngayong Huwebes, sinabi ni Presidential Spokesperson Harry Roque na ang 600,000 doses ay darating sa naturang petsa, kabilang din ang 100,000 doses na donasyon ng Chinese government para sa Department of National Defense.

"Ang bakuna po ng Sinovac na galing China, nakaukit na po sa bato ang pagdating. Sa 23 ng Pebrero darating ang Sinovac," sabi ni Roque.

Gayunman, hindi pa nakapag-isyu ng emergency use authorization (EUA) para sa Sinovac ang Food and Drug Administration, isang requirement ito sa isang vaccine para legal na makapag-administer sa bansa.

Ang efficacy rate ng Sinovac ay lumabas na 50%, 65% at 91% mula sa isinagawang mga human trials sa Brazil, Indonesia at Turkey.

COVID vaccine na ituturok kay P-Du30, depende sa payo ng doktor

ni Lolet Abania | February 9, 2021

Naglabas ng pahayag ang Malacañang na ang brand o klase ng COVID-19 vaccine na maaaring ibigay kay Pangulong Rodrigo Duterte ay depende sa advice ng kanyang doktor.

Ito ang naging tugon ni Presidential Spokesperson Harry Roque nang tanungin kung si Pangulong Duterte, na 76-anyos na ngayong buwan, ang unang tatanggap ng Pfizer-BioNTech vaccine na kabilang sa prayoridad na mabakunahan sa elderly sector.

Ang unang batch ng Pfizer-BioNTech vaccine sa ilalim ng COVAX facility ay inaasahang darating sa bansa ngayong buwan, na mas una kaysa sa nais ng Pangulo na Chinese at Russian vaccines.

“This issue will have to be discussed by the President with his physician,” ani Roque sa isang briefing.

“He is under the advice of his physician,” dagdag niya.

Samantala, ang Food and Drug Administration (FDA) ay nakapag-isyu na ng emergency use authorizations (EUA) sa dalawang COVID-19 vaccines at ito ang Pfizer-BioNTech at AstraZeneca.

Ayon sa FDA, ang Pfizer-BioNTech ay may efficacy rate na 92% hanggang 95% habang ang AstraZeneca ay may 70% efficacy rate matapos ang unang dose subalit tataas ito makaraang ma-administer ang ikalawang dose mula apat hanggang 12 linggong lumipas.

Tiniyak naman ng Palasyo na si P-Duterte ay matuturukan ng COVID-19 vaccine upang magkaroon ng tiwala ang publiko sa bakuna.

Gayunman, ayon kay Roque, gagawin ang pagbabakuna sa Pangulo nang pribado dahil sa kagustuhan nitong maturukan sa kanyang puwet.