2 beses naturukang OFW, nag-positive pa rin... COVID vaccine, ‘di pa sure na epektib – DOH

ni Lolet Abania | February 18, 2021

Sa kabila ng nabakunahan na, isang overseas Filipino worker (OFW) na dumating sa bansa mula sa United Arab Emirates ang tinamaan pa rin ng COVID-19, ayon sa isang opisyal ng Department of Health (DOH).

Sa interview ngayong Huwebes kay DOH Spokesperson Mary Jean Loreche, binanggit niyang ang OFW ay umuwi sa bansa noong January 5 matapos na maturukan ng dalawang COVID-19 vaccine doses noong December 12, 2020 at January 2, 2021.

Ang OFW ay nagpositibo sa test sa COVID-19 makaraang sumailalim sa standard quarantine at testing procedures para sa mga returning overseas Filipino.

Lima naman sa pitong miyembro ng pamilya ng OFW ang nagpositibo rin sa test sa coronavirus na isinailalim na sa isolation.

“Alam naman po natin ang isang tao kahit nabigyan na ng bakuna, hindi naman po ito garantiya na ikaw ay magkakaroon na ng immunity,” ani Loreche.

“Ang epekto ng bakuna ay to prevent a severe disease. Kung ikaw ay nabakunahan at magkakaroon ka man ng COVID, hindi po ikaw magiging grabe. Hindi ka ipapasok sa intensive care unit,” dagdag ni Loreche.

Ayon kay Loreche, binibigyang-importansiya nila ang “tagumpay” ng COVID-19 vaccines sa nangyari sa nasabing OFW dahil walang naging masamang epekto ito sa kanya matapos na mabakunahan.

“Wala rin po siyang sintomas from the time na dumating to the time na-swab at lumabas ang resulta. Hanggang ngayon, wala pong nararamdaman ang ating kababayan,” saad ng spokesperson.

Gayunman, dagdag ni Loreche, nananatiling wala pang patunay kung mapipigilan ng COVID-19 vaccines ang transmission.

“Sa mga datos ng mga bakuna natin… It can prevent severe disease, it can prevent clinical disease, pero to prevent transmission, hindi po clear cut ‘yan kaya hindi po natin masasabi na ikaw, kung nabakunahan ka, hindi ka na makakahawa,” sabi pa niya.

2 bills para maprayoridad ang COVID vaccine, pinirmahan na ni P-Digong

ni Lolet Abania | February 18, 2021

Dalawang panukalang batas ang sinertipikahan bilang urgent ni Pangulong Rodrigo Duterte na layong magtakda ng isang vaccine indemnity fund at agarang pagkuha ng vaccine sa gitna ng COVID-19 pandemic, ayon sa vaccine czar na si Secretary Carlito Galvez, Jr..

Sa press briefing ngayong Huwebes, sinabi ni Galvez na pirmado na ni Pangulong Duterte ang dalawang panukala, ang Senate Bill No. 2057 at ang House Bill No. 8648 na certified as urgent.

“Pinirmahan na po ng ating mahal na Pangulo ang pagsertipika ng panukalang batas as urgent. Nag-usap po kami kanina, kasama po si Senator Bong Go, at magandang balita po na talagang napirmahan niya na po ‘yung mga Senate bill na makakatulong po sa atin,” ani Galvez.

Ang Senate Bill 2057 ay naglalayong mapabilis ang pagkakaroon at rollout ng COVID-19 vaccines, at pagtatakda ng P500-million indemnification fund habang ang House Bill 8648 ay layong mag-awtorisa sa mga local government units (LGUs) para magbigay ng paunang bayad sa gagamiting COVID-19 vaccines.

Kapag ang isang panukala ay nasertipikahan bilang urgent, pinapayagan ang Kongreso na aprubahan ito sa ikalawa at ikatlong pagbasa sa parehong araw.

Matatandaang binanggit ni Galvez na ang kawalan ng tinatawag na indemnification agreement ang nagpapaantala sa pagdating ng unang batch ng 117,000 doses ng COVID-19 vaccines sa ilalim ng COVAX facility.

Ang COVAX facility ay isang pandaigdigang pagsisikap na tanging layunin ay makapagbigay ng access sa COVID-19 responses, kabilang dito ang mga vaccines, na pinangunahan ng World Health Organization (WHO), Gavi Vaccine Alliance, at ang Coalition for Epidemic Preparedness Innovations.

Ayon kay Dr. Rabindra Abeyasinghe, ang WHO representative ng Pilipinas, inaasahan ng mga vaccine makers na popondohan ng gobyerno ang indemnification agreement dahil ang COVID-19 vaccines ay nananatiling nasa ilalim ng emergency use authorization na ang ibig sabihin ay hindi ito ginagamit para sa commercial use.

98 pagyanig naitala, mga taga-Taal, pinalikas na

ni Lolet Abania | February 16, 2021

Nagpatupad na ng forced evacuation ang Municipal Disaster Risk Reduction and Management Office (MDRRMO) ng Agoncillo, Batangas sa isla ng Taal Volcano matapos maiulat ang pagdami ng seismic activities sa paligid ng nasabing lugar.

“Puwersahan pong pinalilikas ang mga taong nasa pulo at mahigpit pa rin pong ipinagbabawal sa ating mga kababayan ang paglapit at manatili sa mismong isla dahil sa nakaambang panganib,” pahayag ng Agoncillo MDRRMO sa Facebook post.

“Pinapayuhan pa rin po ang publiko na ibayong pag-iingat at maging alerto, handa sa lahat ng oras. Ipagdasal po natin na sana ay huwag nang lumala pa ang sitwasyon at kalagayan ng ating mahal na Bulkang Taal,” dagdag pa ng ahensiya.

Ayon kay Easha Mariano, media liaison officer ng National Disaster Risk Reduction and Management Council, nakatanggap sila ng impormasyon na ang mga residente mula sa dalawang sitio sa bayan ng Talisay ay pinalilikas na.

“We received initial info na ongoing ang evacuation sa mga residenteng nasa Taal Volcano mismo na dapat no man's land kaya kailangan silang palikasin. Ang mga pinapalikas ay mula sa dalawang sitio ng Municipality of Talisay,” ani Mariano sa mga reporter.

“This order is for precautionary measure done in line with the recent activities of the volcano pero hindi 'nag-aalburoto' po ang Taal,” sabi pa ni Mariano.

Nananatili naman na nasa Alert Level 1 ang Taal Volcano.

Ayon naman sa Philippine Coast Guard spokesperson na si Commander Armand Balilo, ang mga kawani ng Coast Guard Batangas, Talisay Police at MDRRMO ay nasa lugar na upang siguruhin ang kaligtasan ng mga residente.

“Upon signal from the Municipal Administrator of Talisay, Batangas, joint elements of PNP Talisay, MDRRMO and personnel of Coast Guard Batangas onboard five PCG water assets,” saad ni Balilo.

Dagdag niya, ang mga awtoridad ay nagbigay na rin ng advisory habang patuloy ang inspeksiyon sa lugar at pagsundo sa mga residente mula sa Taal Volcano Island para ilikas.

Samantala, nakapagtala ang Philippine Institute of Volcanology and Seismology (PHIVOLCS) ngayong Martes ng 98 tremor activities sa nakalipas na 24 oras sa Taal Volcano.

Gayundin, ang volcanic earthquakes ay tumagal nang 5 hanggang 12 minuto habang ang main crater ay nakapagbuga naman ng steam-laden plumes na umabot sa 5 metro ang taas.