MGCQ sa MM, malabo pa rin — P-DU30

ni Lolet Abania | February 28, 2021

Pinag-iisipan ni Pangulong Rodrigo Duterte ngayong Linggo nang gabi ang pagluluwag ng quarantine status sa Metro Manila at isailalim sa modified general community quarantine (MGCQ) para matugunan ang krisis sa ekonomiya ng bansa.

“I am considering it… Our economy is really down, as in down so the earlier na mabilisan itong vaccine, the better,” ani Pangulong Duterte sa isang press conference.

Balak ng Pangulo na tuluyan nang buksan ang ekonomiya kapag nakakuha na ng sapat na vaccine doses ang bansa.

“If the vaccine is available to anybody for one reason or another, sa mga probinsiya, na-distribute na ‘yan… estimate nila, about 40 million, kung maka-hit tayo ng 40 million, ‘pag nandiyan na ang vaccine, maski may mga 20 tayo o 30 (million), buksan ko na dahil sa economy,” ani P-Duterte.

“People have to eat. People have to work. People have to pay… And the only way to do it is to open the economy and for business to regrow… Without that, patay talaga. Mahihirapan tayo,” sabi pa ng Pangulo.

AstraZeneca, kulang sa supply, next week pa — DOH

ni Lolet Abania | February 28, 2021

Maaantala ng isang linggo ang pagdating ng 525,600 AstraZeneca COVID-19 vaccines ng COVAX facility na nakatakda sana bukas, Marso 1, ayon kina Department of Health (DOH) Secretary Francisco T. Duque III at Vaccine Czar Carlito Galvez dahil anila sa limitadong supply nito.

“Hindi matutuloy (ang pagdating ng AstraZeneca). Ang sabi ng WHO, nagkakaproblema sila sa supply, maaantala pa raw ng mga isa pang linggo,” ani Duque sa isang interview matapos ang pagdating ng 600,000 doses ng Sinovac COVID-19 vaccine na donasyon ng Chinese government sa bansa ngayong Linggo ng hapon.

“Nakita naman natin na itong AstraZeneca ay pinag-aagawan sa Europe at developing countries. Naiintindihan naman natin, makakapag-antay pa tayo,” sabi naman ni Galvez.

Nakapag-isyu na ang Food and Drug Administration (FDA) ng emergency use authorization (EUA) sa parehong AstraZeneca at Sinovac. Base sa isang FDA evaluation, ang AstraZeneca ay may efficacy rate na 70% matapos ang first dose, at ang rate ay madaragdagan matapos naman ang second dose na maibigay makaraan ang apat hanggang 12 linggo.

Sa Sinovac, lumalabas na ang efficacy rate nito ay 65% hanggang 91% para sa mga malulusog na indibidwal na edad 18 hanggang 59.

Gayunman, ayon sa FDA, hindi nila inirerekomenda ang paggamit ng Sinovac sa mga health workers dahil sa ang efficacy rate nito ay umabot lamang sa 50.4% para sa naturang grupo.

Pagbabakuna ng COVID-19 sa Metro Manila bukas, kasado na

ni Lolet Abania | February 28, 2021

Ikinasa na ang pagsisimula ng pagbabakuna ng COVID-19 vaccines sa bansa na nakatakda bukas, Marso 1, sa mga COVID-19 referral hospitals sa Metro Manila matapos na dumating ngayong Linggo ang donasyon na 600,000 doses ng CoronaVac vaccine ng Chinese company na Sinovac.

Ayon sa Philippine Information Agency (PIA), isasagawa ang ceremonial vaccination bukas sa Philippine General Hospital (PGH), Lung Center of the Philippines, Dr. Jose N. Rodriguez Memorial Hospital, Veterans Memorial Medical Center, Philippine National Police General Hospital at V. Luna General Hospital na dadaluhan ng mga opisyal ng gobyerno.

Magiging simultaneous ang programa na magsisimula nang alas-9:00 ng umaga. Inaasahan ang pagdalo sa UP-Philippine General Hospital nina Vaccine Czar Carlito Galvez, Presidential Spokesperson Harry Roque at Food and Drug Administration (FDA) Director General Eric Domingo.

Kabilang din sa mga dadalo sa programa sina MMDA Chairman Benhur Abalos, Manila Mayor Isko Moreno at Dr. Maria Paz Corrales, assistant regional director ng DOH-NCR.

Sa advisory ng PIA, sina PGH Director Dr. Gerardo Legaspi at PGH Spokesperson Dr. Jonas del Rosario ang magbibigay ng welcome address sa nasabing programa.

Sa Lung Center of the Philippines inaasahan namang pumunta sina Department of Health (DOH) Secretary Francisco Duque III, MMDA General Manager Jojo Garcia, Quezon City Mayor Joy Belmonte at Dr. Corazon Flores, regional director ng DOH-NCR.

Inaasahang dumalo sa Dr. Jose N. Rodriguez Memorial Medical Center and Sanitarium (Tala) sina Testing Czar Vince Dizon, Caloocan City Mayor Oscar Malapitan, MMDA Chief of Staff Michael Salalima at DOH Asec. Elmer Punzalan.

Maliban sa mga referral hospitals, nakatakda ring magkaroon ng programa sa Veterans Memorial Medical Center, kung saan inaasahang pupunta sina Department of National Defense (DND) Secretary Delfin Lorenzana at DOH Director Napoleon Arevalo.

Kabilang din ang Philippine National Police General Hospital na inaasahang dadaluhan nina Department of Interior and Local Government (DILG) Usec. Bernardo Florece, PNP Chief Debold Sinas at DOH Director Aleli Annie Grace Sudiacal.

Samantala, alas-10:00 ng umaga naman ang programa sa V. Luna Medical Center. Inaasahang pupunta sina AFP Chief of Staff Cirilito Sobejana, Surgeon Gen. Nelson Pecache, Quezon City Mayor Joy Belmonte at Dr. Corazon Flores, regional director ng DOH-NCR.

Dumating nang alas-4:10 ngayong hapon ang COVID-19 vaccine na Sinovac ng China sa Villamor Airbase na sinalubong ni Pangulong Rodrigo Duterte. Kasunod nito, dadalhin sa DOH cold storage facility sa Marikina City ang mga naturang bakuna.