Iwas-COVID-19… Magho-holding hands at maghahalikan in public, lagot!

ni Lolet Abania | March 10, 2021

Umapela ang Philippine National Police (PNP) sa publiko na iwasan ang pagpapakita ng tinatawag na ‘physical, social and romantic relationships’ o public display of affection (PDA) dahil taliwas ito sa health protocols na ipinatutupad habang nasa gitna ng COVID-19 pandemic ang bansa.

"The virus may be right before them. Infection happens to families, it can happen to anyone, anywhere," pahayag ni PNP Spokesman Police Brigadier General Ildebrandi Usana ngayong Miyerkules.

Ayon kay Usana, dahil sa pagtaas ulit ng mga bagong kaso ng COVID-19, dapat na ang publiko ay nananatiling maingat mula sa pagkalat ng virus.

"And if you love your spouse, your children, you have to be conscious of the minimum health and safety protocols," ani Usana.

Naniniwala naman si Usana na susunod ang publiko sa ipinatutupad na protocol, lalo na kapag nasa mga commercial at recreational establishments kahit pa walang pulis na nakabantay.

"Sila na po ang magkusang maghiwalay properly in public," sabi ng opisyal.

Sinabi pa ni Usana na binigyan ng direktiba ang mga pulis na tawagin ang atensiyon ng mga taong nagsasagawa ng ‘kissing, holding hands or hugging in public’.

Gayunman, ayon kay Usana, “This appeal is for couples, close friends, who are very dear to each other, family clans and group of people.”

Sa 24-oras lang… 'Pinas, top 1 sa dami ng may COVID-19

ni Lolet Abania | March 9, 2021

Naitala ang Pilipinas na may pinakamataas na bilang ng bagong kaso ng COVID-19 sa loob lamang ng 24-oras sa Western Pacific Region, ayon sa data ng World Health Organization (WHO).

Base sa datos ng WHO, nanguna ang bansa sa listahan na may 3,351 bagong kaso ng COVID-19, kasunod ang Malaysia na may 1,529 at Japan na mayroong 679.

Ayon sa Department of Health (DOH), nitong Lunes, ang dagdag na 3,356 bagong infected ng virus ay nakapagtala sa buong bansa ng kabuuang bilang na 597,763 cases habang 545,912 ang nakarekober at 12,521 ang namatay dahil sa COVID-19.

Ipinakita rin sa data na ang Pilipinas ang nai-report na may pinakamaraming kabuuang bilang ng tinamaan ng COVID-19 sa Western Pacific countries na may 597,763 kaso.

Kasunod ang Japan na may 440,671 cases at Malaysia na may 314,989 kaso.

Samantala, ang Republic of the Marshall Islands at Samoa ang may pinakakaunting bilang ng COVID-19 cases na may apat lamang bawat isa, kasunod ang Lao na may 47 cases.

Pulis, binentahan, 2 arestado… P108 M shabu sa pakete ng tsaa, buking!

ni Lolet Abania | March 9, 2021

Arestado ng mga awtoridad ang isang magtiyuhin matapos makakumpiska sa kanila ng tinatayang P108 milyong halaga ng hinihinalang shabu na nasa pack ng Chinese tea sa Barangay West Rembo, Makati City kagabi.

Sa ulat, isang buy-bust operation ang isinagawa ng mga awtoridad nu'ng Lunes nang gabi kung saan isang pulis ang nagpanggap na buyer na nakabili ng isang kilo ng hinihinalang shabu mula sa mga suspek.

Agad na hinuli ng mga operatiba ng Philippine National Police ang mga suspek na nasa sasakyan at tumambad sa kanila ang isang maleta na may lamang 16 kilo ng hinihinalang shabu na naka-vacuum seal habang ang iba pa ay nasa packaging ng Chinese tea.

Aabot sa P108 milyon ang street value ng nasabat na kontrabando. Tumangging magbigay ng detalye ang pulisya sa pagkakakilanlan ng magtiyuhing suspek dahil sa isasagawa nilang follow-up operation upang matukoy ang nagsu-supply sa mga big-time pusher.

Depensa naman ng isa sa mga naaresto, pinagmaneho lamang niya ang kasama dahil sa sideline niya ito, subalit kung alam niyang ilegal na droga ang laman ng sasakyan, hindi niya ito ipagmamaneho.

Inihahanda na ang kasong isasampa laban sa mga suspek.