2nd booster shots para sa immunocompromised sa Abril 25 na – DOH

ni Lolet Abania | April 22, 2022

Nakatakda ang pagbabakuna ng second COVID-19 booster para sa immunocompromised na mga indibidwal sa Abril 25 sa buong bansa, ayon sa Department of Health (DOH).

Sa ginanap na media forum ngayong Biyernes, sinabi ni DOH Undersecretary Maria Rosario Vergeire na mga immunocompromised individuals lamang na edad 18 pataas ang papayagan na makatanggap lang ng kanilang second booster shot nang maaga sa tatlong buwan matapos ang kanilang first booster.

“Magtuturok na po tayo ng second booster shots para sa mga 18 years old and above na immunocompromised. Nationwide po ang ating rollout na nakadepende sa kahandaan ng kani-kanilang lokal na pamahalaan,” saad ni Vergeire.

Ang mga brands na gagamitin sa second booster shot ay AstraZeneca, Moderna, Pfizer, Sinopharm, at Sinovac.

Una nang sinabi ni DOH Secretary Francisco Duque III na inaprubahan na niya ang pagbabakuna ng second COVID-19 booster para sa mga immunocompromised na mga indibidwal.

Ayon kay Duque, kabilang sa mga nasabing pasyente ay 'yung may cancer, recipients ng organ transplants, at HIV/AIDS patients, at iba pa.

Giit naman ni Duque na ang mga frontline healthcare workers at senior citizens ay hindi pa covered ng inaasahang rollout ng second booster shots sa susunod na linggo.

6 patay sa dengue sa Davao region

ni Lolet Abania | April 22, 2022

Nakapagtala ang Department of Health (DOH) ng anim na nasawi dahil sa sakit na dengue sa Davao region mula Enero hanggang Abril 2022.

Ang tatlong indibidwal na nai-record na namatay sanhi ng dengue ay mula sa Davao del Sur, habang tig-iisa sa Davao City, Davao del Norte, at Davao Occidental.

Subalit sinabi ng DOH na sa parehong panahon noong nakaraang taon, lima lamang ang nai-record na nasawi sa naturang sakit.

Tumaas ang mga kaso ng dengue sa rehiyon na nasa 1,308 mula noong Enero hanggang Abril ngayong taon, kung ikukumpara sa 1,255 cases sa parehong period noong 2021.

Ayon kay Dr. Gerna Manatad, DOH XI assistant regional director, ang Regional Epidemiology and Surveillance Unit ay malalimang nakikipag-ugnayan sa local government unit (LGU) upang ma-monitor ang mga barangay na maaaring nakakapag-ambag sa pagtaas ng mga kaso ng dengue.

“We are monitoring the number of dengue cases because it has really a potential to cause an outbreak,” ani Manatad.

Paliwanag ng DOH, “Dengue virus is transmitted by day-biting Aedes aegypti and Aedes albopictus mosquitoes and is the fastest spreading vector-borne disease in the world, which is endemic in 100 countries.”

Hinimok naman ng DOH Region XI ang publiko na panatilihing palaging malinis ang kanilang kapaligiran at itapon na ang mga stagnant water na posibleng maging breeding sites ng mga lamok.

Dahil sa isyu sa Sofitel... VP at presidential townhall debates, ipinagpaliban — Comelec

ni Lolet Abania | April 22, 2022

Inianunsiyo ng Commission on Elections (Comelec) ngayong Biyernes na ang vice presidential at presidential townhall debates na nakaiskedyul ng Abril 23 at Abril 24, 2022, base sa pagkakasunod, ay kanilang ini-reschedule.

Sa isang press briefing, sinabi ni Comelec Commissioner George Garcia na ang mga debates ay ini-reschedule dahil sa ilang mga pangyayari o “circumstances”.

“We will not be able to proceed with the debate for tomorrow and Sunday. Hindi po natin ito matutuloy pero hindi po siya cancelled. Reset lang po by next week, by April 30 and May 1,” ani Garcia.

Ayon kay Garcia, ang Kapisanan ng mga Brodkaster ng Pilipinas (KBP) ang magiging partner ng Comelec sa ini-reschedule na mga debate. Aniya, ang KBP ay nag-alok ng tulong para sa isasagawang mga debate nang “libre”.

Na-postpone ang mga debates matapos na mai-report nitong Huwebes na ang contractor ng Comelec, na Impact Hub Manila, ay hindi pa naibigay ang full payment sa Sofitel Garden Plaza, ang official venue ng event, kung saan nag-udyok sa Philippine Plaza Holdings, Inc. (PPHI), ang owner ng Sofitel, para magbanta ito na i-pull out ang kanilang agreement.

Batay sa mga reports, nag-demand na ang PPHI ng payment matapos na ang mga tseke na inisyu ng Impact Hub ay tumalbog.

Sinabi ni Garcia na nabatid lamang ng poll body ang tungkol dito nang ang mga representatives mula sa Sofitel ay personal na nagpunta sa Comelec para ipaalam sa kanila ang tungkol sa mga bouncing checks na galing sa kanilang event partner.

“Nalaman namin ‘yung problemang ‘yan noong mga nakaraang araw lamang. Personal na pumunta rito ‘yung representatives ng Sofitel upang sabihin na may mga tseke nga raw na nag-bounce sa kanila ng aming partner,” paliwanag ni Garcia.

Sinabi pa ng opisyal na humingi na ang mga Sofitel representatives ng assistance mula sa Comelec para makolekta nila ang bayad mula sa kanilang partner.

Ayon naman kay Commissioner Aimee Ferolino, sa pareho ring briefing, ang Comelec ay hindi isang tinatawag na party to the contract sa pagitan ng Impact Hub at PPHI. Binanggit din ni Ferolino na ang venue para sa susunod na mga debates ay mababago na.

Humingi naman ng paumanhin si Comelec Commissioner Rey Bulay sa mga kandidato dahil sa pagpapaliban ng mga townhall debates.

“Humihingi kami ng paumanhin sa mga kandidato. Sa maikli na ngang panahon na allowed mangampanya, hindi pa namin nasabi kaagad na hindi matutuloy ang 'yung debates, tomorrow and Sunday,” saad ni Bulay.

“Naintindihan namin na na-set n'yo na ‘yan sa inyong kalendaryo sa pangangampanya at humihingi po kami ng paumanhin,” dagdag ni Bulay.

Para sa agreement sa KBP, ayon kay Garcia, ang Comelec na ang mag-iimbita sa mga kandidato upang dumalo sa rescheduled debates, kung saan ito ang huling pagsabak ng mga ito bago ang May 9 elections.

“Sa kasalukuyan, ongoing ang aming pakikipag-ugnayan sa ating mga kandidato sa pamamagitan ng kanilang representante,” sabi ni Garcia.