2nd booster shots, ibinigay sa mga non-immunocompromised... Ospital sa NCR, siniyasat – DOH

ni Lolet Abania | April 26, 2022

Inaalam na ng Department of Health (DOH) ang tungkol sa mga reports na isang ospital sa National Capital Region (NCR) ang umano’y nag-administer ng second COVID-19 booster shots sa mga health workers at senior citizens na hindi mga immunocompromised.

Sa isang statement ngayong Martes, sinabi ng DOH na ang pamunuan ng ospital na sangkot sa isyu ay nagpaliwanag na hindi nila sinasadyang mali ang pakahulugan o “unintentionally misinterpreted” ang mga guidelines na inilabas ng DOH hinggil sa second booster inoculation.

“The DOH and NVOC are currently coordinating with the relevant Health Care Facilities and Vaccination sites to prevent further instances of these events. The facilities in question have now since returned to administering boosters to ICPs (immunocompromised) only,” anila.

Nitong Abril 25, sinimulan ng gobyerno ang pagbabakuna ng second booster shot sa NCR, subalit para lamang ito sa immunocompromised population, na rekomendasyon ng Health Technology Assessment Council (HTAC).

Ang emergency use authorization (EUA) para sa second booster shot ay inaprubahan ng Food and Drug Administration (FDA) para sa mga immunocompromised, senior citizens, at frontline health workers.

Gayunman, ayon sa DOH, nire-review pa ng HTAC ang mga evidence kaugnay dito na para sa mga matatanda at health workers.

Sa naunang advisory, binanggit ng DOH na ang maaaring mga nakatanggap na ng second booster sa ilalim ng immunocompromised category ay iyong mga may immunodeficiency, HIV, active cancer, indibidwal na nakatanggap ng transplants, mga umiinom ng immunosuppressive drugs gaya ng steroids, at mga pasyenteng bedridden na.

Ang mga vaccine brands naman na ibibigay sa kanila para sa second booster shot ay AstraZeneca, Moderna, Pfizer, Sinovac, at Sinopharm.

Nitong Lunes, nakapagtala ang DOH ng tinatayang 12.9 milyong Pilipino na nakatanggap ng kanilang unang booster shots.

Ayon pa sa DOH, mahigit sa 67.4 milyon indibidwal o 74.98% ng target population ng gobyerno ang fully vaccinated na laban sa COVID-19.

Local absentee voting para sa 2022 elections, start na sa Abril 27 – Comelec

ni Lolet Abania | April 26, 2022

Nakatakdang magsagawa ng absentee voting para sa mga indibidwal na naka-duty sa araw mismo ng eleksyon, Mayo 9, 2022, na magsisimula sa Miyerkules, Abril 27.

Ayon sa Commission on Elections (Comelec), nasa 84,357 botante ang pinayagang maka-avail ng local absentee voting (LAV), na tatagal hanggang Biyernes, Abril 29. Subalit, hindi naaprubahan ang mga aplikasyon ng 9,341 indibidwal dahil sila ay hindi nakarehistro o kaya naman ay deactivated na ang mga ito.

Batay sa Comelec, may kabuuang 93,698 military, police, government at media personnel ang nag-apply sa LAV para sa 2022 elections.

Ang mga local absentee voters naman ay manual na boboto para sa national positions: pangulo, bise presidente, mga senador at party-list.

Ayon kay Comelec Commissioner George Garcia, ang pagboto ng mga military, police at government personnel ay isasagawa ng head ng kani-kanilang mga opisina.

“He will be the one to distribute to the local absentee voters their ballots, then the voters will accomplish the ballots,” saad ni Garcia.

Kapag natapos nang i-fill up ang balota, ibabalik ng voter ang balota sa office head. Ang office head ang naatasang magkolekta ng lahat ng envelopes na naglalaman ng accomplished ballots at ita-transmit ito sa Comelec Election Contests Adjudication Department (ECAD).

Samantala, sinabi ni Garcia na ang mga media personnel na nag-avail ng LAV ay boboto sa Regional Election Director-National Capital Region (RED-NCR).

Ang mga LAV votes ay bibilangin kasama ng mga boto na gagawin sa Mayo 9.

“The counting and canvassing of votes on May 9 at 7 p.m. will be done by the CLAV (Committee on Local Absentee Voting) at the 3rd & 4th floors of the Bureau of Treasury sa Palacio del Gobernador,” ani Garcia.

“All candidates will be notified so they can send their watchers to observe,” sabi pa ng opisyal.

Sina Comelec Chairperson Saidamen Pangarungan at Commissioner Aimee Neri ay kabilang sa mag-a-avail ng LAV. Sila ay boboto sa Comelec main office sa Intramuros, Manila.

20 private armed groups, nabuwag ng PNP

ni Lolet Abania | April 26, 2022

Humigit-kumulang sa 20 private armed groups (PAG) ang nalansag ng Philippine National Police (PNP) bago pa ang May 2022 elections.

Sa isang interview ngayong Martes, sinabi ni PNP spokesperson Police Colonel Jean Fajardo na karamihan sa 20 PAGs ay mula sa Bangsamoro at bahagi ng local terrorist groups.

“More or less nasa 20 na po ‘yung ating na-dismantle, na-disband, at na-delist po doon sa listahan natin ng mga private armed group,” sabi ni Fajardo.

Ayon kay Fajardo, ilang mga politicians ang umano’y nagha-hire ng naturang PAG members kaugnay sa isinasagawa ng mga ito sa eleksiyon.

Kung may sapat na silang ebidensiya, sinabi ni Fajardo na magsasampa ang PNP ng mga reklamo laban sa mga nasabing politicians na nag-e-employ ng mga PAGs.

Binanggit pa ni Fajardo na ang National Task Force for the Disbandment of Private Armed Groups ay nakatakdang mag-isyu ng official resolution para i-delist ang tatlong natitirang aktibong pre-identified PAGs.

Matatandaan noong Abril 18, nagbabala si Pangulong Rodrigo Duterte sa mga kandidato sa 2022 elections na ang pagkakaroon ng mahigit sa dalawang body guards, aniya, ay nangangahulugan na bumubuo ng pagpapanatili ng private army, kung saan salungat ito sa election laws ng bansa.

“We have decided and have communicated this with the Cabinet... The rule should really be followed… that more than two bodyguards would be considered a private army,” saad ni Pangulong Duterte.

“And if you think there is danger to your person, a certain place or person, ipatawag ng RD ‘yan, ipatawag ng chief of police at kausapin. Maiwasan ‘yung away lalo na ang paggamit ng armas,” dagdag ng pangulo.