2 kandidato, nagkumpirma sa presidential at VP panel interviews – Comelec

ni Lolet Abania | April 28, 2022

Dalawa pa lamang na kandidato sa ngayon ang nagkumpirma ng kanilang partisipasyon sa presidential at vice presidential panel interviews na isasagawa ng Commission on Elections (Comelec) kapalit ng kinanselang town hall debates.

Tumanggi naman si Comelec Commissioner George Garcia na banggitin ang mga pangalan ng mga kandidato na nagpahayag na dadalo sila sa panel interview.

“Meron na pong nag-confirm sa ating dalawa subalit hindi muna natin ire-reveal ‘yung mga pangalan po nila,” ani Garcia sa Laging Handa public briefing ngayong Huwebes.

Ayon kay Garcia, tuloy pa rin ang panel interview kahit pa ilan lamang sa mga kandidato ang makikilahok dito.

“Kahit lahat sila ay um-attend at kahit ang iba ay hindi maka-attend ay tuloy na tuloy na ipapalabas natin ang interview sa kanila, kahit ‘yun ay 3 lamang, 4 lamang, tuloy po para fair sa lahat,” saad ng opisyal.

“Binigyan po namin sila hanggang ngayong araw na ito alas-singko ng hapon upang magbigay ng kanilang pagsang-ayon na sila ay available sa atin pong forum na gagawin,” sabi pa ni Garcia.

Matatandaan na ibinasura na ng Comelec ang kanilang town hall debates, na dapat sana ay huling bugso ito ng mga serye ng mga debate para sa May 9 elections, matapos na ang kanilang private partner, ang Impact Hub Manila ay mabigo umanong i-settle ang kanilang dues sa Sofitel Philippine Plaza Manila, ang naging venue para sa mga naunang debates.

Ayon kay Garcia, “The Comelec will send the panel to the location of the candidates to conduct the interview. Each candidate will be given an hour to discuss their insights and platforms.”

Ang pretaped interviews, na isasagawa sa tulong ng Kapisanan ng mga Brodkaster ng Pilipinas (KBP), ay ipapalabas mula Mayo 2 hanggang 6.

Sa mga kandidato, tanging si Ferdinand “Bongbong” Marcos Jr., na tatakbo sa pagka-pangulo, ang nagpahayag ng katiyakan na hindi niya magagawang mag-participate sa naturang panel interview.

Sinabi ng tagapagsalita ni Marcos na si Vic Rodriguez, Marcos “opted to conclude the entire 90-day campaign period with visits to his supporters and compliances with previous commitments for political events, like town hall meetings and political rallies.”

Hirit kay P-Du30... May 9, ideklarang special non-working holiday

ni Lolet Abania | April 28, 2022

Hiniling ng Commission on Elections (Comelec) kay Pangulong Rodrigo Duterte na ideklara ang Mayo 9, 2022, bilang isang special non-working holiday dahil sa nakatakdang national at local elections.

Sa isang media briefing, sinabi ni Comelec Chairperson Saidamen Pangarungan na nilagdaan ng Comelec en banc ang Resolution No. 10784, na humihiling sa Pangulo para ideklara ang Mayo 9 na gawing special non-working holiday sa buong bansa.

“We signed resolution no. 10784 requesting President Rodrigo Roa Duterte to declare May 9, 2022 a special non-working holiday all throughout the country in connection with the national and local elections,” saad ni Pangarungan.

Kaugnay nito, nauna nang isinagawa ang local absentee voting (LAV) para sa mga indibidwal na naka-duty sa Mayo 9, simula nitong Miyerkules, Abril 27 at tatagal hanggang Biyernes, Abril 29.

Ayon sa Comelec, may kabuuang 84,357 botante ang pinayagang mag-avail ng local absentee voting na tatagal hanggang bukas, Abril 29.

Sa Election Day... Voters na may COVID-19 symptoms, manatili sa bahay – DOH

ni Lolet Abania | April 28, 2022

Nanawagan ang Department of Health (DOH) sa mga botante na nakikitaan ng sintomas ng COVID-19 na manatili na lamang sa kanilang tirahan at iwasan na ang lumabas lalo na sa araw mismo ng eleksyon sa Mayo 9.

Sa isang interview ngayong Huwebes, sinabi ni DOH Undersecretary Maria Rosario Vergeire na simula pa lamang ng pandemya ng COVID-19, lagi nang ipinapayo ng DOH na iyong may mga sintomas ng sakit ay mag-self-regulate sa pamamagitan ng pananatili sa kanilang tirahan upang maiwasan na maipasa sa iba o kumalat ang virus.

“We all know that elections and voting would be very important for every Filipino. Gusto natin i-exercise natin ‘yung right na ‘yan. Pero kapag tayo ay may sintomas na, hindi po natin pwedeng ipilit kasi you might be infecting other people,” ani Vergeire.

Subalit nilinaw ito ni Vergeire, “I just want to be clear on that. The DOH is advising people, if you have symptoms, do not go out and go to your precincts baka po kasi tayo magkaro’n ng pagkakahawa-hawaan diyan.”

Binigyan-diin pa ni Vergeire ang kooperasyon ng taumbayan hinggil dito, kung saan maaaring dumagsa ng mga botante sa mga polling precincts sa araw ng eleksyon.

Una nang ipinaalala ni Pangulo Rodrigo Duterte sa mga botante na sumunod sa minimum public health standards kapag nasa mga polling precincts sa araw ng eleksyon para hindi na magkaroon ng isa pang COVID-19 surge sa bansa, habang kinokonsidera naman dito ang hiwalay na babala ng DOH at OCTA Research sa posibleng pagtaas ng COVID-19 infections.

Gayunman, nitong Abril, sinabi ni Commission on Elections (Comelec) Commissioner Aimee Torrefranca-Neri na pinaplano ng poll body na mag-set up ng tinatawag na “isolation polling places” para sa mga botanteng nakikitaan ng sintomas ng COVID-19 sa Election Day.