Omicron, pinaka-dominant COVID-19 variant na sa ‘Pinas — PGC

ni Lolet Abania | April 29, 2022

Iniulat ng Philippine Genome Center (PGC) na ang pinaka-dominant o nangungunang COVID-19 variant sa ngayon sa bansa ay ang Omicron.

“Masyadong mababa ang ating mga kaso kaya konti rin po ang mga samples na sinu-submit sa amin sa PGC. Starting po ng end ng December 2021 up to the present the most dominant variant in the Philippines is not Delta, it is already Omicron,” ani PGC executive director Dr. Cynthia Saloma sa Laging Handa briefing ngayong Biyernes.

Ayon kay Saloma, mula sa mga Omicron variants, ang pinakamaraming bilang ng mga kaso na na-detect ay ang BA.2.3 Omicron sublineage, base ito sa resulta ng latest sequencing na kanilang ginawa.

“Among the Omicron variants ang pinakamarami po talaga sa ating bansa ay itong BA.2.3. Ito pong BA.2.3 po sa ating latest sequencing results for the months of March at saka April siya po ‘yung mga 95% of our sequenced cases are in the BA.2.3 sublineage po,” paliwanag ni Saloma.

Batay sa mga reports, ang Omicron BA.2.3 strain ay nabatid na kumakalat na sa ibang mga bansa kabilang na ang Denmark, Japan, at China.

Sinabi naman ni Saloma na kakaunti na lamang ang Delta cases na na-detect sa pagitan ng Marso at Abril.

“From time to time nakikita pa rin po namin may mga pa-ilan-ilang mga Delta sequences sa iba’t ibang bahagi ng Pilipinas. But these are very, very minor if I remember correctly between March and April we only detected about four cases in the Southern Philippines,” saad ni Saloma.

Una nang inanunsiyo ng Department of Health (DOH) nitong Miyerkules na na-detect ng health authorities ang unang kaso ng Omicron BA.2.12 sa Baguio City.

Ang bagong sublineage BA.2.12 ay na-detect mula sa isang 52-anyos na babaeng Finnish national na dumating sa bansa mula Finland noong Abril 2.

Base sa kasalukuyang contact tracing, ang pasyente ay nagkaroon ng 44 close contacts kabilang na iyong nasa Quezon City, 5 sa Benguet, at 30 indibidwal na nakasama niya sa eroplanong sinakyan patungo sa Manila.

100K trabaho, naghihintay sa Labor Day job fairs – DOLE

ni Lolet Abania | April 29, 2022

Inianunsiyo ng Department of Labor and Employment (DOLE) ngayong Biyernes na libu-libong oportunidad sa trabaho ang naghihintay para sa mga jobseekers sa Labor Day, Mayo 1.

Kasabay ng pagdiriwang ng ika-120th Labor Day, ilulunsad ng DOLE ang Trabaho, Negosyo, Kabuhayan Job and Business Fairs na lalahukan ng 900 employers sa buong bansa.

Sa isang statement, sinabi ni DOLE Secretary Silvestre Bello III na nasa 102,426 local at overseas employment opportunities ang nakalaan sa mga jobseekers sa naturang fairs.

Ayon kay Bello, ang partisipasyon ng mga employers sa gaganaping May 1 job fairs ay isang patunay na nagbunga na ang ginagawang pagsisikap ng gobyerno para sa employment recovery ng bansa na matinding tinamaan ng pandemya.

“This job fair is one of the employment recovery strategies to restart economic activities, restore consumer and business confidence, upgrade and retool the workforce, and facilitate labor market access,” saad ni Bello.

Aniya, karamihan sa mga vacancies para sa 26 job fair sites ay iyong nasa manufacturing, business process outsourcing, at retail/sales industries.

Sinabi ni Bello, para sa mga naghahanap ng trabaho sa local employment, naghihintay sa kanila ang 73,671 jobs gaya ng production operators/machine operators, customer service representatives, collection specialists, retail/sales agents/promodisers, at sewers na iniaalok ng 817 employers.

Samantala, nasa 28,755 overseas jobs naman mula sa Kingdom of Saudi Arabia, United Arab Emirates, Qatar, Kuwait, Germany, Poland, the United Kingdom, Japan, Taiwan, at Singapore, ang iniaalok ng 73 recruitment agencies.

Ang top overseas vacancies ay para sa mga nurse/nurse aide; carpenter, foreman, at welder; food server; household service worker; at auditor.

Binanggit naman ni Bello na ang site para sa main job fair sa Mayo 1 ay gaganapin sa Kingsborough International Convention Center sa San Fernando City, Pampanga, kung saan mahigit sa 10,000 trabaho ang iniaalok ng 90 employers.

Ayon pa sa DOLE chief, karamihan sa mga bakanteng trabaho ay production operators, skilled sewers, customer service representatives, production helpers, call center agents, helpers, staff nurses, at collections specialists.

2 kandidato para sa acting PNP chief, isinumite kay P-Du30 – DILG

ni Lolet Abania | April 29, 2022

Ipinahayag ni Department of Interior and Local Government (DILG) Secretary Eduardo Año ngayong Biyernes na naisumite na niya kay Pangulong Rodrigo Duterte ang mga pangalan ng dalawang kandidato para sa posisyon ng acting Philippine National Police (PNP) chief.

Sa isang radio interview, sinabi ni Año na kinonsidera niya rito ang seniority at kakayahan ng mga ito sa pagpili ng mga kandidato para sa posisyon. Subalit, hindi niya tinukoy ang mga pangalan ng dalawang police officials.

“Nakapag-submit na ako ng aking recommendation last Tuesday sa ating Pangulo,” ani Año.

“Two senior police officials ang pangalan na ibinigay namin at maaaring mamili ang pangulo kung sino ang itatalaga niya dito pero ito ay in an acting capacity lang o OIC lang,” dagdag ng opisyal.

Batay sa Article 7 Section 15 ng Constitution, ayon kay Año, ang presidente ay maaari lamang mag-atas ng temporary appointments sa loob ng 60 araw bago ang national elections.

Binanggit din ni Año, na kay Pangulong Duterte na kung ikokonsidera nito ang kanyang rekomendasyon.

Nauna rito, tiniyak ng PNP sa publiko na maaari nilang i-secure ang 2022 elections, kahit na magpalit pa ng kanilang pamumuno isang araw bago ang Election Day.

Kaugnay nito, nakatakdang magretiro si PNP chief Police General Dionardo Carlos sa Mayo 8, 2022, isang araw bago ang national at local elections, kung saan umabot siya sa kanyang mandatory retirement age na 56.

Si Carlos ay na-appoint bilang PNP chief, ang ika-7 sa ilalim ng Duterte administration, noong Nobyembre 12, 2021.