Pagbabakuna kontra-COVID-19 sa mga estudyante sa paaralan, plano ng gobyerno – DOH

ni Lolet Abania | May 3, 2022

Pinag-iisipan na ng pamahalaan na magpatupad ng COVID-19 vaccination program sa mga paaralan para sa mga estudyante na magbabalik sa face-to-face classes habang patuloy ang bansa sa pagbabakuna sa mas marami pang indibidwal.

Ayon kay Department of Health (DOH) Secretary Francisco Duque III, ang COVID-19 vaccination program para sa mga estudyante ay ipapatupad na katulad sa ibang vaccines para sa measles at polio na iniaalok at isinasagawa sa mga estudyante.

“We have already articulated this to [Department of Education] Secretary [Leonor] Briones so that we can ramp up the relatively low vaccine coverage for the students in the basic education sector,” pahayag ni Duque kay Pangulong Rodrigo Duterte sa isang taped meeting na ipinalabas ngayong Martes.

Nagmula ang suhestiyong ito kay Pangulong Duterte na nagpanukala na payagan ang mga estudyante na mag-attend ng in-person classes kung ang mga vaccination programs ay naisagawa na sa kanila ng gobyerno.

Kasama sa planong programa ay mga minors na nasa pagitan ng mga edad 5 at 11, at nakipag-usap na kay vaccine czar Carlito Galvez, Jr. sa mga academic institutions.

Samantala, sa latest data mula sa DOH, lumabas na nakapag-administer na ang bansa ng kabuuang 147.117 milyon doses ng COVID-19 vaccines hanggang nitong Mayo 1. Kabilang dito ang 65.719 milyon first doses, 67.911 milyon second doses, at 13.487 milyon booster doses, kumpara sa estimated population ng bansa na 110 milyon.

Ayon naman kay presidential adviser on COVID-19 response Vince Dizon, available na ang mga suplay ng bakuna na ilalaan sa mga paaralan, kung saan may 15 milyon doses para sa mga kabataan ay nasa bansa na, habang nasa 10 milyon naman ang kasalukuyang stock nito.

“The IATF, I think, in its next meeting, will issue such a strong endorsement or strong encouragement for private schools in particular to go back to face-to-face classes,” ani Dizon sa parehong meeting.

Sinabi ni Dizon na halos nasa 60% ng mga pampublikong paaralan sa buong bansa ang nagbalik na face-to-face classes, at patuloy pang dumarami ang lumalahok dito.

Iwas-COVID-19... Magpa-booster shots, bago bumoto sa Election Day – P-Du30

ni Lolet Abania | May 3, 2022

Hinimok ni Pangulong Rodrigo Duterte ang publiko na magpabakuna na ng COVID-19 booster shots bago bumoto sa May 9 elections upang maprotektahan ang sarili sa posibleng impeksyon sa mga polling precincts na dadagsain ng mga botante.

“‘Yung booster shots ninyo, it’s still available at anybody can have it because it’s election time. There will be crowding again of people congregating and it would be good to have the booster shots before you go out and mix with the crowd,” sabi ni Pangulong Duterte sa kanyang Talk to the People na ipinalabas ngayong Martes nang umaga.

Paliwanag ng Pangulo, maaaring ang booster shots ay hindi 100% guarantee na wala o hindi tatamaan ng COVID-19 infections lalo na sa mga mahihina ang immune systems, subalit puwede itong makatulong na protektahan ang sinuman laban sa viral disease.

“If normal ka lang, hindi ka masakitin, it can protect you and you can vote there without any… sans the worry about getting the infection again,” ani Pangulo.

Una nang ipinaalala ni Pangulong Duterte sa mga botante na sumunod sa mga minimum public health standards sa mga polling precincts sa Election Day upang maiwasan ang isa pang COVID-19 surge sa bansa lalo na’t kinokonsidera, sa hiwalay na babala ng Department of Health (DOH) at OCTA Research, ang posibleng pagtaas ng COVID-19 infections.

“Still, we’re in the COVID-19. Complacency is really the… it would be the enemy of the matter of preventing again or allowing the COVID-19 to come back. Sabagay, it would not be as serious like before, kasi bakunado tayo,” saad ni Pangulong Duterte.

Nitong Lunes, ipinahayag ng DOH na nasa mahigit 67.9 milyong indibidwal o 75.45% na target population ng gobyerno ang fully vaccinated na kontra COVID-19 sa ngayon, habang nasa 13.2 milyong Pilipino naman ang nakatanggap ng kanilang booster shots.

DOH: Kaso ng dengue sa ilang rehiyon, tumaas

ni Lolet Abania | May 2, 2022

Nakapagtala ang Department of Health (DOH) ng pagtaas ng bilang ng mga kaso ng dengue sa bansa.

Sa isang media briefing ngayong Lunes, sinabi ni DOH Undersecretary Maria Rosario Vergerie na ang pagtaas ng mga dengue cases ay nai-record sa Regions 2, 3, 7, 9, at CAR.

“When we say pagtaas, we compare the number of cases today with the previous time period, the same time period last year. Para masabi natin if they are going or nearing the epidemic threshold na tinatawag,” paliwanag ni Vergerie.

“Sa ngayon mino-monitor natin closely ang mga areas na ito. Nakapagbigay na tayo ng assistance and guidance to these areas,” dagdag ng opisyal.

Noong nakalipas na buwan, idineklara ang dengue outbreak sa Zamboanga City, kung saan ang mga kaso ay umabot sa 893, kabilang dito ang 11 nasawi, sa panahon ng Enero 1 hanggang Abril 2. Hanggang nitong Abril 16, nakapag-record ang Zamboanga City ng 1,135 cases na may 14 na namatay.

Ayon kay Vergeire, para mapigilan ang posibleng epidemya ng dengue, kailangan aniyang i-activate ang mga dengue fast lanes at magbigay ng logistical assistance para sa mga apektadong lugar.

Paalala rin sa publiko ng opisyal na iobserba ang “four-S” para mapigilan ang mga dengue cases gaya ng search and destroy mosquito-breeding sites, seek early consultations, self-protection measures, at support spraying/fogging.

“So, we do the four-S – kailangan po natin maglinis ng ating mga paligid, ating likuran. Linisin po natin ang lahat ng nakakaipon ng tubig, lahat po ng mga kuyagot. Let’s do the four S every 4 pm,” giit ni Vergeire.

“We advised all local governments also to activate and mobilize their dengue brigades. Para po mapigilan natin ang further na pagkalat at pagtaas ng sakit na ito,” sabi pa niya.