Para malapit sa DepEd office... OVP, ililipat ni VP Sara sa Mandaluyong City

ni Lolet Abania | July 7, 2022

Hindi na mag-oopisina pa si Vice President Sara Duterte sa Quezon City Reception House sa New Manila, kung saan naroon ang Office of the Vice President.

Batay sa source, posibleng ilipat ni VP Sara ang OVP sa isang lugar sa Mandaluyong City, isang lokasyon na mas malapit sa opisina ng Department of Education (DepEd) na siya ang secretary.

Una rito, nakipagpulong na si VP Sara sa mga DepEd officials nitong Miyerkules at tinalakay nila ang budget ng kagawaran para sa 2022 at ang mga proposed allocations para sa susunod na taon.

Ang DepEd ang may pinakamalaking funding sa 2022 national budget, habang ito ang may pinakamaraming bilang ng mga empleyado na mayroong higit sa isang milyon.

Samantala, sinabi ni Atty. Reynold Munsayac, spokesperson ni VP Sara, na sinimulan na ng OVP ang pagbibigay ng mga social services, kabilang na ang medical at burial assistance, sa pamamagitan ng kanilang satellite offices.

2 tropical cyclones, posibleng pumasok sa PAR – PAGASA

ni Lolet Abania | July 7, 2022

Dalawang tropical cyclones ang maaaring pumasok sa Philippine Area of Responsibility (PAR) sa susunod na mga araw, ayon sa PAGASA ngayong Huwebes.

Sa Laging Handa public briefing, sinabi ni PAGASA Administrator Undersecretary Vicente Malano na sa susunod na tatlong araw, wala silang na-forecast na tropical cyclone na papasok sa PAR.

Gayunman, dalawang tropical cyclones ang kanilang namataan na papasok sa bansa makalipas ang tatlong araw.

“Ayon po sa ating mga datos na nakikita sa ngayon, wala po tayong nakikitang mga sama ng panahon o bagyo sa susunod na tatlong araw. Mayroon tayong inaasahan, after three days... may mangyayari na inaasahan po natin na may bagyo, tropical cyclone na papasok sa ating Philippine Area of Responsibility,” pahayag ni Malano.

“Ang characteristics po nitong dalawang bagyo na nakikita po natin ay kamukha po ng nakaraang dalawang bagyo na pumasok dito sa Philippine Area of Responsibility itong si Caloy at Domeng na si Domeng papuntang Norte at ‘yung isa naman nanggaling sa West Philippine Sea at pumunta po siya ng China area,” dagdag ni Malano.

Ayon sa PAGASA, “Intertropical Convergence Zone (ITCZ) will bring inclement weather over Southern Luzon, Visayas, and Mindanao.”

Ang Metro Manila at ang natitirang bahagi ng bansa ay magiging bahagyang maulap hanggang sa maulap na papawirin na may isolated na mga pag-ulan o thunderstorms, ayon pa sa state weather bureau.

167 bagong kaso ng BA.5, BA.2.12.1 at BA.4 Omicron subvariants — DOH

ni Lolet Abania | July 7, 2022

Nakapagtala ng 140 karagdagang kaso ng Omicron subvariant BA.5 ng COVID-19 mula sa iba’t ibang rehiyon, ayon sa Department of Health (DOH) ngayong Huwebes.

Sa DOH briefing, sinabi ni DOH Undersecretary Maria Rosario Vergeire na 99 indibidwal ay mula sa Western Visayas, 21 sa National Capital Region (NCR), 7 sa Calabarzon, at 5 mula sa Ilocos Region.

Naka-detect naman ng tig-isa ng BA.5 mula sa Central Luzon, Bicol Region, Central Visayas, Eastern Visayas, Northern Mindanao, Mimaropa, at Cordillera Administrative Region (CAR).

Habang isang returning overseas Filipino (ROF) ay nagpositibo rin sa test sa naturang Omicron variant.

Samantala, ayon kay Vergeire, nakapag-record din ng 20 dagdag na BA.2.12.1 cases sa bansa, kung saan karamihan sa lahat sa kanila ay nakarekober na.

Sa mga bagong kaso nito, 5 indibidwal ay mula sa NCR, tig-4 naman mula sa Western Visayas at Calabarzon, at 2 mula sa CAR.

Isang kaso mula sa Ilocos Region at 4 na ROFs ang nagpositibo sa test sa BA.2.12.1.

Gayundin, ayon sa DOH, mayroong 7 karagdagang BA.4 cases na na-detect sa bansa at lahat sila ay nakarekober na.

Anim sa naturang kaso ay mula sa Bicol Region at isa na galing sa NCR.