2 patay, 2 sugatan sa bumagsak na elevator sa isang gusali sa Makati

ni Lolet Abania | July 8, 2022

Dalawa ang patay matapos na isang elevator na nire-repair ang bumagsak sa gusali ng Burgundy Corporate Tower sa Gil Puyat, Barangay Pio del Pilar, Makati City, ngayong Biyernes ng umaga, ayon sa National Capital Region Police Office (NCRPO).

Base sa paunang report ng NCRPO, isang elevator car ang nahulog mula sa 38th floor sa basement ng naturang gusali habang ang mga biktima na kinilalang sina Manuel Linayao at Rey Miguel Gilera ay kinukumpuni ang elevator na nasa sixth floor bandang alas-2:55 ng hatinggabi.

Ayon sa pulisya, dalawa pang elevator installers ang nasaktan sa insidente.

“The abovementioned victims/deceased and with two other elevator installers... were fixing an elevator at 6th Floor when suddenly an elevator [coming] from 38th Floor accidentally fell to basement that resulted [in] the death of herein victims and injured two others,” pahayag ng pulisya.

Base sa report ng Bureau of Fire Protection (BFP), ang Special Rescue Force ng Makati ay rumesponde sa lugar bandang alas-3:46 ng madaling-araw habang may karagdagang ambulansya ang idineploy bandang alas-6:44 ng umaga.

Agad ding rumesponde ang dalawang rescue trucks ng SRF ng Makati at Disaster Risk Reduction and Management (DRRM) team, gayundin ang tatlong ambulansiya sa lugar.

Nagsagawa naman ng rescue at retrieval operation sa lugar, kung saan unang naiulat ng BFP na may isang namatay sa insidente, subalit isa pang bangkay ang narekober ng mga awtoridad bandang alas-9:18 ng umaga.

Patuloy ang imbestigasyon ng mga awtoridad sa insidente.

Ex-Prime Minister Shinzo Abe, binaril — Japan gov’t

ni Lolet Abania | July 8, 2022

Walang ipinakikitang vital signs si dating Japanese Prime Minister Shinzo Abe matapos na mabaril sa isang campaign event sa Nara region ngayong Biyernes, ayon sa report ng local media.

Kinumpirma ito ng Japanese government na si Abe ay binaril subalit ang kanyang kondisyon anila, “currently unknown.”

“Former Prime Minister Abe was shot at around 11:30 am in Nara. One man, believed to be the shooter, has been taken into custody. The condition of former prime minister Abe is currently unknown,” pahayag ni Chief Cabinet Secretary Hirokazu Matsuno sa mga reporters.

Ayon sa national broadcaster NHK at ang Kyodo news agency, nagde-deliver ang dating lider ng kanyang speech sa isang event, bago pa ang upper house elections sa Linggo, nang biglang makarinig ang mga naroon ng mga putok ng baril.

Ang 67-anyos na si Abe ay nag-collapse habang dumudugo na ang kanyang leeg, sabi ng isang source mula sa kanyang ruling party na Liberal Democratic Party (LDP) sa Jiji news agency.

Alinman sa LDP o sa local police ay nagawang ikumpirma agad ang nakalap na mga reports.

Iniulat din pareho ng NHK at Kyodo na isinugod si Abe sa ospital habang makikitang ito ay sumailalim sa cardo-respiratory arrest na ang ibig sabihin, “a term used in Japan indicating no vital signs, and generally preceding a formal certification of death by a coroner.”

Maraming media outlet naman ang nag-report na lumalabas na si Abe ay binaril mula sa kanyang likuran na posibleng gumamit ng isang shotgun.

Iniulat naman ng NHK na isang lalaki ang hinuli ng mga awtoridad, subalit wala nang iba pang detalye na ibinigay tungkol sa insidente.

Si Abe, na siyang longest-serving prime minister ng Japan, ay nanungkulan taong 2006 sa loob ng isang taon at muling nagsilbi mula 2012 hanggang 2020.

Samantala, isang lalaki ang inaresto ng pulisya dahil sa attempted murder matapos na atakihin si Abe.

Ayon sa public broadcaster NHK, batay na rin sa police sources, ang lalaki ay nasa edad na 40s habang isang baril ang nakumpiska ng mga awtoridad .

Hindi naman nabigyan ang mga local police ng komento nang tawagan ang mga ito ng Agence France-Presse (AFP).

Sa EO 1 ni P-BBM PACC at Office of the Cabinet Secretary, inabolish

ni Lolet Abania | July 7, 2022

Nilagdaan ni Pangulong Ferdinand “Bongbong” Marcos Jr. ang Executive Order No. 1, hinggil ito sa pag-abolish o pagbuwag ng Presidential Anti-Corruption Commission (PACC) at ng Office of the Cabinet Secretary.

May petsang Hunyo 30, nakasaad sa EO 1, “the Marcos administration endeavors to achieve a comprehensive and meaningful recovery through a just allocation of resources and a simplified internal management and governance of the Office of the President and its immediate offices and common support system.”

“In order to achieve simplicity, economy, and efficiency in the bureaucracy without effecting disruptions in internal management and general governance, the Administration shall streamline official processes and procedures by reorganizing the Office of the President proper and the various attached agencies and offices, and by abolishing duplicated and overlapping official functions,” batay sa EO.

Ayon kay Pangulong Marcos kaugnay sa kanyang EO, ang kapangyarihan o powers at functions ng PACC ay ililipat na sa Office of the Deputy Executive Secretary for Legal Affairs.

Sa ilalim ng EO, ang naturang opisina ang gagawa ng mga rekomendasyon sa mga usapin na nangangailangan ng kanilang aksyon sa Executive Secretary para sa approval o adoption o modification ng Pangulo. Gayundin, ito ang magpapahayag ng rules of procedure sa mga administrative cases sa ilalim ng kanilang hurisdiksyon.

Samantala, ang umiiral na Cabinet Secretariat ay isasailalim na sa direct control at supervision ng Presidential Management Staff (PMS) kasunod ng abolition ng Office of the Cabinet Secretary.

Nakasaad din sa EO na ang Cabinet Secretariat ang mag-a-assist sa Pangulo sa paglulunsad ng mga agenda topics para sa deliberasyon ng Cabinet o magpa-facilitate sa talakayan ng mga Cabinet meetings.

Gayunman, sa ilalim ng EO 1, binuo ang Office of the Presidential Adviser on Military and Police Affairs, kung saan ito ay sasailalim sa pangangasiwa ng Office of the Special Assistant to the President.

Ayon din sa EO, ang Office of the Special Assistant to the President, ang Presidential Advisers and Assistants at ang Presidential Management Staff ay dapat makipag-ugnayan sa Executive Secretary para sa pagbibigay ng staff support sa Pangulo.