1,106 checkpoints habang lockdown

ni Lolet Abania | March 28, 2021

Mahigit sa 1,000 quarantine control points (QCPs) ang ilalatag sa Metro Manila at karatig lalawigan habang ang mga lugar na ito ay nakasailalim sa isang linggong enhanced community quarantine (ECQ), ayon sa Philippine National Police (PNP) ngayong Linggo.

Ayon kay Joint Task Force COVID Shield commander Police Lieutenant General Cesar Hawthorne Binag, may kabuuang 1,106 checkpoints habang 9,356 law enforcers ang nakatakdang italaga mula alas-6 ng gabi ngayong Linggo sa mga lugar na nasa ilalim ng mas mahigpit na lockdown. "At 6 p.m. they will be pre-positioned, but the implementation will start 12:01 a.m. [Monday]," ani Binag.

Sa inilabas ng PNP, ang mga inilatag na checkpoints at itinalagang PNP personnel sa bawat rehiyon ay ang mga sumusunod:

1. NCRPO (National Capital Region Police Office) - 929 QCPs, 2,297 police personnel

2. Police Regional Office - 3 (Central Luzon) - 162 checkpoints, 982 police personnel

3. Police Regional Office - 4A (Calabarzon) - 15 checkpoints, 498 police personnel Isinailalim ng gobyerno ang Metro Manila, Bulacan, Rizal, Cavite at Laguna sa mas mahigpit na quarantine mula March 29 hanggang April 4 matapos na makapagtala ng mahigit 9,000 bagong kaso ng COVID-19 sa isang araw.

Sinabi rin ni Binag na ang mga dating checkpoints sa panahon ng general community quarantine (GCQ) ay kabilang sa 1,106 kabuuang checkpoints na bubuhayin nila ngayong ECQ.

Ayon pa kay Binag, magtatalaga rin ng mga PNP personnel sa mga lugar na matatao gaya ng palengke, groceries at ibang establisimyento na nagbibigay ng basic services dahil marami ang mamimili ng mga essential goods.

Senado, naka-lockdown hanggang Holy Week; Congress, sarado rin

ni Lolet Abania | March 22, 2021

Mananatiling naka-lockdown ang Senado hanggang Holy Week dahil sa patuloy na banta ng pandemya ng COVID-19, ayon kay Senate President Vicente Sotto III.

Sa isang interview kay Sotto, sinabi nitong pinapayagan na niya ang mga empleyado na hindi na mag-report kapag Holy Week, subali't mayroon pa ring skeletal staff na nagtatrabaho sa Senado.

"Eto [ngayon] walang skeletal, lockdown talaga ito.... After Holy Week, pagdating ng Pasko ng Pagkabuhay, 'yung Lunes na 'yun, naka-skeletal ang Senate," ani Sotto ngayong Lunes.

Wala ring isinagawang session ngayong Lunes sa Senate, matapos na ang buong gusali nito ay isinailalim sa lockdown hanggang Martes nang gabi. Magbabalik naman ang mga session sa Senado sa Miyerkules.

Gayunman, ayon kay Sotto, dalawa hanggang tatlong miyembro mula sa Secretariat at sa Office of the Sergeant at Arms, at ilan lamang mga senador kabilang na siya, ang maaaring dumalo physically sa Senado sa Miyerkules.

Samantala, inanunsiyo rin ng House of Representatives ngayong Lunes na suspendido ang kanilang operasyon simula Martes (March 23) hanggang Miyerkules (March 24) dahil pa rin sa patuloy na pagtaas ng COVID-19 infections sa Metro Manila.

Sa inilabas na memorandum, magbabalik ang plenary session sa Congress sa Huwebes, March 25.

Gayunman, ang mga opisina gaya ng Office of the Secretary General, Finance and Engineering Departments, at Office of the Sergeant-at-Arms o ang Legislative Security Bureau ay mananatiling may skeletal forces para patuloy ang serbisyo sa kani-kanilang departamento.

2 linggong lockdown sa ilang simbahan sa QC

ni Mary Gutierrez Almirañez | March 21, 2021

Dalawang linggong ila-lockdown ang mga simbahang sakop ng Dioceses of Novaliches at Cubao sa Quezon City dahil sa patuloy na pagtaas ng COVID-19, ayon sa inanunsiyo nina Bishop Roberto Gaa ng Diocese of Novaliches at Bishop Honesto Ongtioco ng Diocese of Cubao ngayong araw, Marso 21.

Batay sa ulat, boluntaryong magla-lockdown ang Dioceses of Novaliches at Cubao simula bukas, Marso 22 hanggang sa ika-3 ng Abril at magbabalik ang misa sa Abril 4, bilang paggunita sa Easter Sunday.

Anila, patuloy pa ring ipapatupad ang health protocol upang mapigilan ang hawahan ng COVID-19 sa bawat Katolikong magsisimba.

Ayon pa kay Bishop Ongtioco, "Voluntarily closing our places of worship at the highest point of our liturgical year is heartbreaking. But we also open our eyes to a situation that puts many of our faithful at risk. Numbers are surging and scientific data show that unless drastic interventions are done, these numbers will not decline anytime soon."

Giit naman ni Bishop Gaa, “Given this fact, it would appear that the only way for us to control the further upsurge of Covid cases is to restrict the movements of people, including those movements by the same people from their work places and their homes into and out of our churches.”

Kaugnay nito, inihayag ni Interior Undersecretary Jonathan Malaya ang gaganaping pagpupulong bukas ng National Task Force (NTF) Against COVID-19 hinggil sa bagong protocol na ipapatupad sa Holy Week.

Aniya, "As of now, wala pa tayong lockdown, ngunit maghanda siguro tayo. As I said, let's postpone all non-essential travel especially sa pagtaas ng mga kaso."

“‘Yan ang pag-uusapan namin bukas. Kasi kung magdedesisyon ang IATF and the NTF na maghigpit, wala tayong choice kundi maghigpit para mag-stay at home na muna ang ating mga kababayan ngayong panahon ng pagtataas ng kaso up to the Holy Week period."