Biyahero, nagpositibo sa COVID, Western Australia, 3-day lockdown

ni Mary Gutierrez Almirañez | April 24, 2021

Isinailalim sa 3-day lockdown ang ilang bahagi ng Western Australia dahil sa mabilis na community transmission ng COVID-19, kung saan ang itinuturong carrier ay isang biyahero na unang nagnegatibo sa virus ngunit kalauna’y nagpositibo matapos makalabas sa Perth quarantine hotel, ayon kay Australian Medical Association (AMA) President Omar Khorshid ngayong araw, Abril 24.

Aniya, "Everything that can be done in hotel quarantine needs to be done right now and, unfortunately, in Western Australia as in some other states, that is not the case."

Kabilang ang Australia sa mga bansang may mabababang kaso ng COVID-19, kung saan lumabas sa datos na halos 29,500 ang lahat ng nagpositibo at tinatayang 910 ang mga pumanaw mula nang magka-pandemya.

Sa ngayon ay tanging mga essential workers at medical frontliners lamang ang pinapayagang makalabas ng bahay. Nauna nang kinansela ang taunang selebrasyon ng Anzac Day na nakatakda sanang ipagdiwang bukas.

Na-postpone rin maging ang inaabangang A-League soccer match sa pagitan ng Brisbane Roar FC at Perth Glory.

Samantala, tuloy naman ang Australian football game sa pagitan ng Fremantle at North Melbourne, subalit ipinagbawal ang live audience.

Ngayon ang unang araw ng 3-day lockdown sa Western Australia at inaasahang makatutulong ang lockdown upang maiwasan ang mabilis na hawahan ng virus.

Tuguegarao City, ECQ mula March 30 - April 8

ni Ronalyn Seminiano Reonico | March 29, 2021

Isasailalim sa enhanced community quarantine (ECQ) ang Tuguegarao City simula sa March 30 hanggang April 8 dahil sa pagtaas ng kaso ng COVID-19, ayon sa information office ng naturang lungsod ngayong Lunes.

Sa Facebook post, saad ng Tuguegarao City Information Office, “Tuguegarao City, muling isasailalim sa ENHANCED COMMUNITY QUARANTINE o ECQ sa loob ng sampung araw simula 12:01 AM of March 30 hanggang 12:00 midnight of April 8, 2021.

“Ang pagsasailalim sa mas mataas na quarantine status ay base sa rekomendasyon ng Pamahalaang Panlungsod ng Tuguegarao na inaprubahan ng Regional Inter-Agency Task Force (RIATF). Ito ay dahil sa patuloy na pagtaas ng bilang ng kaso ng COVID-19 sa lungsod.”

Samantala, ngayong araw ay nakapagtala ang Department of Health (DOH) ng 10,016 karagdagang kaso ng COVID-19 sa bansa at sa kabuuang bilang ay umabot na sa 731,894 cases.

22.9 milyon, bibigyan ng ayuda sa Lockdown 2

ni Ronalyn Seminiano Reonico | March 29, 2021

AABOT sa 22.9 million beneficiaries sa NCR Plus Bubble na binubuo ng Metro Manila, Bulacan, Rizal, Cavite at Laguna ang inaasahang makatatanggap ng financial assistance mula sa pamahalaan kaugnay ng muling pagpapatupad ng enhanced community quarantine (ECQ) dahil sa patuloy na pagtaas ng kaso ng COVID-19.

Ayon sa pahayag ni Secretary Wendel Avisado ng Department of Budget and Management (DBM) ngayong Lunes, “Based on the latest populations statistics from NEDA [National Economic and Development Authority], there are estimated 22.9 million beneficiaries which correspond to the 80 percent low-income population in NCR, Bulacan, Rizal, Cavite and Laguna and these are the areas placed under ECQ.”

Ayon kay Avisado, isinumite na ng DBM sa opisina ni Pangulong Rodrigo Duterte ang rekomendasyon para mabigyan ng financial assistance ang mga indibidwal na apektado ng ECQ.

Saad pa ni Avisado, "The funds that we're gonna use for this special amelioration assistance to those affected by the ECQ are the remaining unutilized balances of Bayanihan 2.”

Aniya pa ay si P-Duterte na ang magsasabi ng iba pang detalye tungkol sa financial assistance ng pamahalaan.