Todo-tago at layo… Bebot, ‘di gustong makasira ng pamilya at maging kabit

ni Sis. Isabel del Mundo @Mga Kuwento ng Buhay at Pag-ibig | June 16, 2024

Dear Sister Isabel,

Gusto kong ibahagi sa inyo ang kuwento ng buhay ko, at hihingi na rin ako ng payo tungkol sa love life ko. 

Ex-OFW ako, pero ngayon for good na ko rito sa Pilipinas.

Nagkaroon ako ng karelasyon sa abroad, at nagkaanak kami. Akala ko single siya kaya pinatulan ko, pero may asawa na pala at may dalawang anak. 

Buntis na ako nang malaman ko ‘yung totoo. Kaya mula noon, umiwas at nagtago ako sa kanya hanggang sa maisilang ko ang anak namin. 

Ayokong makasira ng pamilya at maging isang kabit, kaya ako na mismo ang lumayo. 

Hindi nagtagal, isinilang ko na rin ang anak namin. Hindi siya tumigil kakahanap sa akin at halos masiraan na ng bait hanggang sa natunton niya ang kinaroroonan namin. 

Naawa ako sa kanya, ang laki ng pinayat niya at para bang may sakit. Nagmakaawa siya sa akin upang tanggapin ko siya sa buhay ko. Magsama na umano kami kasama ang anak namin. Nangako siya sa akin na magiging mabuting ama at responsableng asawa siya. 

Isa pa, wala umanong problema ‘yun sa una niyang kinasama, dahil pumayag na raw ito na dalawa kaming babae sa buhay niya. Tanggap daw ng asawa niya ang sitwasyon, at hindi raw kami guguluhin nito. 

Inamin niya rin sa akin na hindi siya kasal at handa niya umano akong pakasalan. 

Sa totoo lang, mahal ko rin naman siya at ayokong lumaki ang anak ko na walang kinikilalang ama. 

Ano ba ang dapat kong gawin? Dapat ba akong pumayag sa gusto niya na magsama kami sa iisang bubong bilang mag-asawa tutal hindi naman tumututol ang babaeng una niyang kinasama?

Sister Isabel, puwede rin kaya kaming magpakasal? Hihintayin ko ang payo n’yo.

Nagpapasalamat, 

Marita ng Tacloban

---

Sa iyo, Marita,

Sa biglang tingin, maling tanggapin mo ang lalaking nakabuntis sa iyo dahil may asawa na pala siya, pero kung payag naman ang una niyang kinasama, at nangakong hindi kayo guguluhin, sa palagay ko ay puwede ka nang pumayag sa gustong mangyari ng ama ng iyong anak, kaysa lumaking walang ama ang anak n’yo.

Kung kasal naman ang pag-uusapan, tutal puwede ka pala niyang pakasalan dahil hindi siya kasal sa una niyang kinasama at handa naman siyang gawin ito. 

Ang mahalaga nagmamahalan kayo, at with consent ng kinakasama niya. Nasa iyo ang desisyon, kung ano ang maluwag sa loob mo, ‘yun ang gawin mo.

Sumasaiyo,

Sister Isabel del Mundo

Pagod na sa paulit-ulit na routine? Pagre-resign, pag-isipang mabuti

ni Mabel Vieron @Lifestyle | June 18, 2024

Pagod ka na rin ba at feeling mo nade-drain ka na sa kakatrabaho? Sumasagi na rin ba sa isip mo ang mag-resign o pilit ka pang lumalaban para sa pangarap at pamilya mo? 

Hindi madali kapag nasa ganitong sitwasyon ka, pero kahit na ganu’n mahalaga na mapanatili nating maayos ang relasyon natin sa ating employer at upang maiwasan na rin ang mga problema sa pag-alis. Narito ang mga dapat mong tandaan:

1. MAGBIGAY NG SAPAT NA ABISO. Sundin ang polisiya ng kumpanya o mga kontrata sa pagbibigay ng abiso bago mag-resign. Oks?

2. MAG-FILE NG RESIGNATION LETTER. Gumawa ng opisyal na liham ng pagbibitiw na naglalaman ng iyong intensyon na mag-resign, petsa ng huling araw ng trabaho, at isang maikling pahayag ng pasasalamat sa kumpanya para sa mga pagkakataon na ibinigay sa iyo. Pero besh, as long as kaya n’yo pa, laban lang! 

3. BE PROFESSIONAL. Maging propesyonal ka sa iyong pag-uugali kahit na nasa proseso ka na ng pag-alis. Mahalaga ito para sa iyong reputasyon at maaaring makatulong sa iyo sa hinaharap. Hindi ‘yung aalis ka na nga, attitude ka pa? ‘Wag ganu’n, besh! Kahit ‘di naging maayos ang samahan n’yo, dapat pa rin tayong magpasalamat sa kanila. 

4. WATCH YOUR MOUTH. Kahit ‘di naging masaya ang karanasan mo sa kumpanya, iwasan ang pagbibigay ng negatibong pahayag o pagpapahiwatig sa iyong resignation letter o sa mga huling araw mo sa trabaho. 

5. PAG-ISIPANG MABUTI. Bago ka magdesisyon na mag-resign, tanungin mo muna ang iyong sarili kung bakit mo gustong umalis at kung ano ang mga pangarap mo para sa hinaharap. Siguraduhing hindi ito bunga ng biglaang damdamin at mayroon kang malinaw na layunin.

6. MAGPLANO PARA SA NEXT STEP. Pagkatapos ng pag-alis sa trabaho, maglaan ng oras upang magplano ng iyong mga susunod na hakbang sa karera. Maaari kang maghanap ng bagong trabaho, mag-aral ng bagong kasanayan, o pagtuunan ang iyong sariling pag-unlad. Ang pagre-resign ay maaaring maging simula ng bagong pagkakataon para sa iyong pagbabago.

Ang pagre-resign ay hindi lamang simpleng pag-alis sa trabaho; ito ay isang oportunidad upang mag-isip, magplano, at magkaroon ng bagong direksyon sa iyong karera. 

Sa tamang paghahanda at pag-uusap, maaari mong gawing maayos at positibo ang paglipat sa susunod na yugto ng iyong buhay. Oki?

Wa’ budget? No problem! Affordable gifts ngayong Father’s Day

ni Mabel Vieron @Lifestyle | June 16, 2024

Father’s Day na mga Ka-BULGAR! Kaya magpapahuli pa ba tayo rito? Siyempre, hindi ‘no! Kaya naman ngayong Father's Day, deserve ng mga itay, papa, daddy, at papi natin na regaluhan sila. Sure akong may napakamot ng ulo nang mabasa ang word na ‘regalo’? Sus, ‘di mo na kailangan problemahin ‘yan, besh! Dahil nandito ako ngayon para tulungan kayo lalo na ’yung mga Ka-BULGAR natin d’yan na saks lang pera.

Ngayong Father’s Day, hindi naman natin kailangan gumastos ng malaki para ipakita ang ating pagmamahal sa ating mga ama. Ang mga simpleng regalo na may pagmamahal ay maaaring magbigay ng malaking kasiyahan para sa kanila. Kaya narito ang ilang mga ideya na puwede mong gawing regalo, let’s go mga besh! 

1. PERSONALIZED GIFT. Ang simpleng bagay na may personal touch, tulad ng isang larawan ng pamilya na naka-frame ay isa ring paraan upang ipakita sa ating ama kung gaano natin sila kamahal at kung gaano tayo ka-thankful na sila ang ating magulang. Ito ang isa sa mga regalo na kahit saan ay hindi mawawala. Oh ‘di ba! 

2. TIME TOGETHER. Isa sa pinakamahalagang bagay na maibibigay natin sa ating ama ay ang iyong oras. Iregalo mo sa kanya ang isang araw na puno ng mga magagandang alaala at masasayang kuwentuhan. Sa paglalaan mo ng panahon para sa kanya, ipinapakita mo sa kanya kung gaano mo siya kamahal at kung gaano ka nagpapasalamat sa lahat ng mga aral at gabay na ibinigay niya sa iyo.

3. HANDWRITTEN LETTER. Sa mundo ng digital, isang simpleng sulat na sinulat mo mismo ang maaaring maging napakalaking regalo. Ngayong Father’s Day ‘wag na tayong mahiya ipakita kung gaano natin sila kamahal at kung paano natin sila naging inspirasyon sa bawat araw na nagdaan. Gets?

4. MEMORY SCRAPBOOK. Gumawa ng isang scrapbook na puno ng mga alaala kasama ang iyong ama. Isama ang mga larawan, ticket ng mga paboritong pelikula, at iba pang bagay na may sentimental value para sa inyong dalawa. Sa bawat pahina, idagdag mo ang mga salitang nagpapakita ng pasasalamat at pagmamahal mo sa kanya. Ito ay isang regalo na hindi lang isang bagay, kundi isang pagninilay-nilay sa mga magagandang alaala na inyong pinagsaluhan.

5. DIY GIFT BASKET. Gumawa ng isang personal na DIY gift basket na puno ng mga paborito niyang mga bagay. Halimbawa, puwede itong maglaman ng kanyang paboritong mga snacks, kape, libro, at iba pang mga maliliit na bagay na alam mong magugustuhan niya. Idagdag mo rin ang isang handwritten note na nagpapakita ng iyong pagmamahal at pagpapahalaga sa kanya.

6. HOME IMPROVEMENT KIT. Kung mahilig ang iyong ama sa mga gawaing bahay, puwede mo siyang regaluhan ng bagong set ng kagamitan tulad ng power tools, paint set, o kahit mga garden tools kung mahilig siya sa gardening. Ito ang magbibigay sa kanya ng pagkakataon na pagandahin at palakasin ang inyong tahanan, at ipakita mo rin ang iyong suporta sa kanyang mga interes.

Sa bawat regalong ito, ang pinakamahalaga ay ang pagpapakita ng pagmamahal at pagpapahalaga sa ating ama sa pamamagitan ng isang espesyal na paraan. Idagdag mo pa ang isang matamis na mensahe o caption upang lalong maging makabuluhan at hindi malilimutang karanasan ang inyong Father's Day celebration. Gets?