Talking stage gone wrong… Signs na ayaw na sa ‘yo ng kausap mo

ni Mharose Almirañez | March 13, 2022

Naninibago ka ba sa biglaang coldness ng ka-talking stage mo? ‘Yung tipong, online naman siya, pero napakatagal niyang basahin ‘yung nag-deliver mong chat sa inbox niya. Worst thing is, nu’ng in-open niya ang message mo ay hindi naman siya nag-reply. Kumbaga, na-seen zone ka lang. Ouch, ‘di ba?!

Ngunit alam mo ba kung ano’ng mas masakit? ‘Yung nakita mong ‘typing’ na siya, pero isang napakatipid na “Slr” lamang ang reply niya’t sinundan pa ng napaka-dry na open-ended topic. Mapapa-‘tsk’ ka na lang talaga!

Upang lalo kang mag-overthink, narito ang ilan pang signs na ayaw na sa ‘yo ng ka-talking stage mo:

1. HINDI NA NIYA NAGE-GETS ‘YUNG JOKES MO. Kung noon ay walang-patid ‘yung pagpapalitan n’yo ng korning punchlines at humored jokes, ngayon ay parang out of this world na siya’t tila hindi na kayo ‘on the same page’.

2. HINDI NA SIYA PALATANONG. Kung noon ay walang tigil ang pagtatanong niya’t very interested siyang malaman ang every single details of you, ngayon, he/she left you hanging, questioning your worth at ang napakaraming “what if”.

3. HINDI NA SIYA PALABIGAY NG TOPIC. Kung noon ay ultimo non-sense topic ay pinagkukuwentuhan n’yo hanggang madaling-araw, ngayon ay ikaw na itong pala-open ng topic para lamang mapahaba ang conversation n’yo.

4. HINDI NA SIYA PALA-UPDATE. ‘Yung mas napapadalas ang pagsasabi niya ng, “Sorry, nakatulog,” “Busy sa work,” “May pinuntahan/inasikaso,” o whatsoever at ang pesteng “Slr” o “Sorry, late reply”. Samantalang noon, kahit nasaan o anuman ang ginagawa niya ay nacha-chat ka pa rin niya.

5. HINDI NA KAYO SAME ENERGY. Ito ‘yung energetic ka sa pagkukuwento at napakarami mo pa sana gustong i-tsika, pero napaka-dry and cold na ng bawat sagot niya. ‘Yung mas nauuna na rin siyang mag-good night sa ‘yo dahil pagod daw siya, samantalang noon, ikaw daw ang pahinga niya.

Hindi naman sa pinag-o-overthink kita, pero what if may bago na siyang kausap o na-turn off na siya sa ‘yo? Baka naman, ikaw talaga ‘tong red flag?

Dapat mo ring tanungin ang sarili mo kung bakit nga ba siya nagsimulang magbago. Pag-isipan mong mabuti kung may nasabi o nagawa ka bang nagpa-discourage sa kanya. Puwede rin kasing bigla na lang niyang na-realize na hindi pa pala siya ready sa relationship.

Mahirap ‘yung hanggang talking stage na lang kayo, pero mas mahirap kung magse-settle ka sa bare minimum. Hangga’t maaga at hindi pa naman ganu’n ka-strong ‘yung foundation na na-build n’yo ay ikaw na itong kumawala.

Gayunman, hindi porke nararamdaman mong malapit ka na niyang i-ghost ay uunahan mo na siya. Ang ipinupunto ko rito, sana ay magkaroon ka pa rin ng lakas ng loob para komprontahin siya’t alamin ang problema. Baka kasi puwede pang maayos, ‘di ba? Pero kung hindi na talaga, magpasalamat at magpaalam ka man lang sa kanya bilang closure, hindi man naging kayo.

Good luck, beshie. Kaya mo ‘yan!

Iba’t ibang dahilan para makipag-break sa dyowa

ni Jersy L. Sanchez - @Life & Style| March 7, 2022

‘Pag sobrang labs n’yong mag-dyowa ang isa’t isa, ‘di ba, parang ang hirap isipin na maghihiwalay din kayo?

Pero mga besh, sa totoo lang, marami pa ring long-term relationships na nauuwi sa hiwalayan kahit gaano pa nila naipakitang mahal na mahal nila ang isa’t isa.

Awww!

Well, napakahirap talagang i-let go ng taong mahal mo, lalo pa’t naging parte na siya ng buhay mo, pero may mga valid reasons para tapusin na ang relasyon. At kahit pa punumpuno ng pagmamahal ang inyong pagsasama, ‘di ito sapat para ma-sustain ang healthy at happy partnership sa mahabang panahon.

Anu-ano nga ba ang mga rason para tapusin ang isang relasyon?

1. ‘DI SIYA HONEST SA ‘YO. Tila normal na para sa atin ang magsabi ng ‘white lies’, pero ‘pag napansin mong naging habit na ng iyong partner ang pagsisinungaling or worse, mas malalaki at seryosong pagsisinungaling ang ginagawa niya, valid reason ito para tapusin na ang inyong relasyon.

2. ‘DI KASUNDO SA PINANSIYAL NA ASPETO. Isa ang pera sa mga karaniwang isyu para sa mga magkarelasyon. Ayon sa mga eksperto, ang isang tao na mas gumagastos sa luho kaysa sa necessities ay senyales na siya ay hindi magkaroon ng financial stability. Bagama’t hindi lahat ng mag-partner ay gusto ng ‘combined finances’, pero kung gusto mo itong gawin kasama ang iyong partner, kailangang nasa ‘same page’ kayo pagdating sa financial goals. Kumbaga, pareho kayo ng gusto at paniniwala pagdating sa paghawak ng pera.

3. WALA KANG TIWALA SA KANYA. Alam nating lahat na ang tiwala ay mahalagang parte ng relasyon at ‘pag nasira ito ng partner mo, lalo na kung maraming beses na, posibleng senyales ito na pag-isipan mong mabuti kung itutuloy pa ba o hindi ang iyong relasyon.

4. MAGKAIBA KAYO NG GOALS. Ang hirap ‘pag umabot sa puntong mahal na mahal mo ang partner mo, pero hindi pala kayo pareho ng pinaplanong future. Pero bes, ‘pag malinaw sa ‘yo kung ano ang gusto mo, hindi ka dapat mag-settle sa taong ibang-iba ang goals sa mga bagay na gusto mong ma-achieve.

5. ‘DI KAYO NAGKAKAINTINDIHAN. Tulad ng tiwala, ang healthy communication ay mahalagang sangkap ng magandang relasyon, pero ‘pag ipinapakita ng partner mo na hindi siya willing makipag-communicate at ‘di niya ito kayang baguhin, valid reason ito ng paghihiwalay.

6. FEELING MO, DAPAT KANG MAGPOKUS SA IYONG SARILI. Kahit pa gaano ka-perfect ang inyong relasyon, mayroong posibilidad na kailangan mo ng panahon para mag-grow on your own sa halip na magpokus sa inyong relasyon. At bes, ‘di ka dapat ma-guilty, lalo na kung sa tingin mo ay ito ang makabubuti sa ‘yo.

‘Pag ‘di ka na masaya sa relasyon, ‘di mo na kailangan ng iba pang rason para mag-initiate ng breakup. Tandaan, dapat mong gawin ang bagay na sa tingin mo ay makatutulong para mas sumaya ka pa.

Gets nating mahirap talagang makipag-break, pero kung alam mong hindi na talaga magwo-work ang inyong relasyon, kakapit ka pa ba?

Ngayong ‘new normal’… Tips para malibang ‘pag naipit sa trapik

ni Mharose Almirañez | March 6, 2022

“Mabuti pa ang trapik, may forever, samantalang sa relasyon, wala,” wika ng isang biktima ng mabagal na usad ng mga sasakyan sa EDSA. Mapapahugot ka na lamang talaga sa nakaka-stress na trapik.

Mantakin mong kahit pandemic, sobrang bagal pa rin ng daloy ng trapiko. Paano pa kaya ngayong balik-normal na ang lahat? Ready ka na bang makipag-unahan sa punuang jeep, bus at train? Kumusta naman ang estimated travel time mo? Nakapag-adjust ka na ba ng alarm?

Sa ilalim ng Alert Level 1, pinapayagan na ang 100% o full seating capacity sa mga pampublikong sasakyan sa Metro Manila, alinsunod sa nilagdaan ng Inter-Agency Task Force for the Management of Emerging Infectious Diseases (IATF-EID) na Resolution No. 163-A, series of 2022, noong ika-27 ng Pebrero.

Dahil d’yan, asahan mo na ang tripleng stress sa dami ng komyuter na daragsa ngayon. Kaya bilang gabay sa iyong pagbiyahe, narito ang ilang tips para hindi ka mabagot sa inaasahang trapik na sasalubong sa ‘yo sa daan:

1. HUWAG BUMIYAHE ‘PAG PEAK HOUR. Ito ‘yung pagitan ng alas-7:00 hanggang alas-10:00 ng umaga, at alas-5:00 ng hapon hanggang alas-7:00 ng gabi. Sa mga oras na ‘yan madalas dumaragsa ang mga biyaherong papasok at pauwi sa kani-kanilang trabaho. Kung ayaw mong makipagsabayan sa kanila, umalis ka nang maaga sa inyo o magpalipas-oras ka muna bago bumiyahe pauwi. Ikaw na ang mag-adjust, besh!

2. MAG-ISIP NG MAGAGANDANG MEMORIES. Masayang magmaneho o bumiyahe kapag nasa kondisyon ang iyong mindset. Ang panget naman ng vibes kung traffic na nga, tapos iistresin mo pa ‘yung sarili mo, eh wala namang magbabago kahit maglupasay ka pa sa kalsada. Dapat chill lang.

3. MAKINIG NG KANTA. Music lovers, pasok! Siyempre, mas masarap magmuni-muni habang may background music. Bawat tao ay may kani-kanyang taste of music, depende sa mood, kaya pumili ng patutugtuging genre na naaayon sa panahon at emosyon. Kalma ka lang.

4. MANOOD SA SELPON. Bilang pasahero, puwede kang malibang sa biyahe sa pamamagitan nang panonood ng mga nakaaaliw na palabas gamit ang iyong selpon. Maaari kang mag-scroll ng videos sa TikTok, Kumu, Facebook, Instagram at kung saan-saan pang social media platforms. Kung wala ka namang mobile data, siguraduhing may naka-download kang movie o series na puwedeng panoorin offline.

5. ISIPIN MO NA LANG, SA KABILA NG TRAFFIC AY PUWEDE KA PA RIN MAGING MULTI-TASKER IN A DIFFERENT WAY. Applicable ito sa mga taong nagbi-binge watching, kung saan kaka-isang episode mo, tapos mo na pala ang buong series, ‘yun nga lang, hindi ka pa rin nakararating sa ‘yong pupuntahan. Iyak! Pero at least, nakatapos ka ng isang series, ‘di ba?

6. MAGING ALERTO. Ito ‘yung mga biyahero na kunwari ay natutulog pero nakikiramdam lang sa paligid. Sila ‘yung mga pasimpleng nakatingin sa screen ng selpon mo. ‘Yung mga palihim na nakikinig sa usapan ng ibang pasahero. Aware na aware sila mga nangyayari sa loob ng sasakyan, na tila pati sa public transport ay nag-aala-Marites.

Bilang isang driver, kailangan mo ring maging alerto para maiwasan ang iringan at gitgitan sa kalsada. Hindi ka dapat magpadalos-dalos sa pagmamaneho, na basta ka na lamang sisingit kung saan may maluwag na drive way. Isaalang-alang mo rin ang ibang sasakyan. Huwag paiiralin ang init ng ulo, besh!

Nakatutuwang isipin na makalipas ang dalawang taon ay unti-unti nang bumabalik sa normal ang bansa. Gayunman, hindi pa rin tayo dapat maging kampante. Tiyaking sumusunod sa IATF protocols upang maiwasan ang hawahan at mapigilan ang muling paglobo ng bilang ng tinatamaan ng virus.