5 Tips para mapanatili ang positibong pagbabago sa buhay

ni Jersy L. Sanchez - @Life & Style| March 28, 2022

Maraming pagbabago sa ilalim ng ‘new normal’, at unang-una na r’yan ang ating pamumuhay. Gayundin, ito ang dahilan para mag-reflect kung paano natin haharapin ang mga nakaka-stress na pagkakataon. Isa pa, natutunan natin kung paano pahalagahan ang self-care at upang mag-invest tayo sa ating mga sarili.

In short, hindi man naging maganda ang simula ng pandemya, kinaya nating magkaroon ng mga positibong pagbabago sa ating buhay. Pero ang tanong, paano natin mapapanatili ang mga pagbabagong ito?

1. TAMANG PAGPRAYORIDAD NG ORAS. Dahil mas dependent na tayo sa teknolohiya, naapektuhan na rin ang abilidad nating magpokus dahil mas madali na tayong nadi-distract dahil sa tuluy-tuloy na video o online meetings at phone notifications, at umaabot sa punto na nao-overwhelm na tayo. Ngunit kung sisikapin nating ma-manage ang ating oras base sa kahalagahan ng isang gawain, mas malinaw kung ano ang mga dapat nating unahin at pagtuunan ng pansin.

2. SELF-CARE. Nalaman at naunawaan na natin ang kahalagahan ng self-care. At bes, ‘di lang ito tungkol sa pagbibigay ng oras sa iyong sarili tuwing pagkatapos ng nakaka-stress na araw o linggo kundi naging mahalagang parte na ito ng pamumuhay. Kapag naglalaan tayo ng oras at pinahahalagahan natin ang self-care, mas aware tayo sa ating mental health at sa mga bagay na dapat nating i-appreciate.

3. HANDA SA EMERGENCY. Natutunan din nating maging handa sa anumang puwedeng mangyari. Halimbawa nito ang pagtatabi ng pera na magagamit sa hindi inaasahang pagkakataon o pagkakaroon ng emergency fund, gayundin ang pag-i-stock ng mga mahahalagang bagay o pagkain na magagamit sa panahon ng emergency.

4. BAGONG PARAAN PARA MAPANATILI ANG MGA KONEKSIYON. Hindi man natin pisikal na nakakasama ang ating mga kaibigan at mahal sa buhay, kinakaya nating manatiling konektado sa isa’t isa at siyempre, ‘yan ay dahil sa tulong ng social media at internet. Ilan sa mga paraan para mapanatili ang koneksiyon ay ang pakikipag-video call, watch parties at virtual gatherings ‘pag may mga selebrasyon.

5. SUMUBOK NG MGA BAGONG BAGAY. Madalas tayong mawalan ng motibasyon ‘pag tila routine na lang ang mga nangyayari sa ating buhay, kumbaga, paulit-ulit na lang. Pero mga bes, pagkakataon na rin ito para maghanap ng bagong hobby at mag-aral ng bagong skills. Sa ganitong paraan kasi, posibleng mabawasan ang ating stress, gayundin, mag-i-improve ang ating emotional health.

Marami tayong natutunan dahil sa pandemya at gaya ng nabanggit, kabilang na rito kung paano natin inaalagaan at pinahahalagahan ang ating sarili.

Siguro, ‘yung iba ay nagsisimula pa lamang at napapaisip kung kakayanin ba nilang ipagpatuloy ang mga pagbabagong ito.

Beshie, kalmahan mo lang at ‘wag kalimutang sundin ang mga tips na ito para ma-sustain ang positibong pamumuhay sa kabila ng pakikipaglaban natin sa pandemya. Keri?

Iba’t ibang paraan para tumanaw ng utang na loob

ni Mharose Almirañez | March 27, 2022

Naipamukha na ba sa ‘yo ng isang tao kung nasaan ka dapat ngayon kung hindi dahil sa kanya?

Sabi nga nila, ang hindi marunong lumingon sa pinanggalingan ay hindi makararating sa paroroonan. Alam ko namang marunong kang tumanaw ng utang na loob, pero alam mo rin bang may limitasyon ang pagbabayad nito at hindi mo ito puwedeng pagbayaran habambuhay?

Upang makabayad sa utang na pinakamahirap bayaran sa lahat, narito ang ilang paraan para makawala sa ‘utang na loob’ concept ng mga Pinoy:

1. MAGPASALAMAT. Halimbawa, tinulungan ka niyang makapasok sa trabaho. Sapat na ‘yung ‘thank you’ na bukal sa puso mula sa ‘yo. Iniisip kasi ng iba, required manlibre sa magarbong restoran o magbigay ng mamahaling token of appreciation matapos ka niyang tulungan.

Tandaan, hindi porke tinulungan ka niyang magkatrabaho ay ite-take advantage ka na niya at gagawin itong dahilan para makahingi ng kung anu-anong pabor sa ‘yo, dahil sa huli ay ikaw pa rin naman ang gumawa ng paraan para mag-stay sa trabaho at siya lamang ang naging daan sa bagay na ‘yun. Kung hindi niya matanggap ang ‘thank you’ mo, nasa kanya na ang problema.

2. MAG-EFFORT. Ipagpalagay nating naulila ka’t kinupkop ng kamag-anak. Kung gusto mo talagang makabawi sa pag-aarugang ginawa nila sa ‘yo, gumawa ka ng effort para ma-appreciate nila how thankful you are. Magsikap ka sa pag-aaral at maghanap ng magandang trabaho. Iparamdam mo sa kanilang hindi sayang ‘yung ginawa nilang effort para sa ‘yo.

Kung sakaling sumbatan ka ng kamag-anak mo in the near future, isipin mo na lang kung saan ka nagkulang. Baka kasi, dahil matagumpay ka na ay nakalimutan mo na sila. Learn to give back. Kung sa tingin mo naman ay sobra-sobra na ‘yung paggi-give back mo pero para sa kanila’y hindi pa rin sapat ito, kamag-anak mo na ang may problema ru’n. Baka kasi, hindi bukal sa puso nila ‘yung ginawang pagkupkop sa ‘yo, that’s why they’re demanding for more.

3. MAGBAYAD. Magbabayad ka talaga kapag pera ‘yung ipinautang sa ‘yo. Pero paano kung buhay ang inutang mo sa kanya? Let’s say, namatay ang tatay niya nang dahil sa pagsagip sa ‘yo. Is sorry enough? Siyempre, habambuhay mong dadalhin ‘yung guilt. Gayunman, hindi porke may kasabihang, “Mata sa mata, ngipin sa ngipin,” ay magpapakamatay ka rin para mabayaran ang buhay ng tatay nila. Everybody knows na walang may gusto sa nangyari, kaya ‘wag mong sisisihin ang sarili mo.

Anuman ang nangyari, life must go on. Sa halip ay gawin mong makabuluhan ang buhay mo upang hindi masayang ang ginawa niyang pagsasakripisyo para sa ‘yo, dahil hinding-hindi babangon sa hukay ang taong patay na kahit habambuhay ka pang mag-sorry d’yan.

4. HUWAG MAKALIMOT. ‘Yung iba kasi, patay-malisya na after matulungan. Hindi naman sa paniningil o panunumbat, pero bilang pagtanaw ng utang na loob, ‘wag na ‘wag mong kalilimutan kung sino ‘yung mga taong tumulong sa’yo nu’ng panahong wala kang mapuntahan. Sabi nga nila, lalabas ang tunay na ugali ng isang tao, it’s either kapag nasa rurok siya ng tagumpay o kapag walang-wala siya.

Ngunit kung paulit-ulit namang ipinamumukha sa ‘yo ng inutangan mo ‘yung utang na loob mo sa kanya ay nasa kanya na ang problema. Tandaang hindi porke tinulungan ka niya nang isang beses at inayawan mo ang hinihingi niyang pabor sa pangatlong pagkakataon ay susumbatan ka na niya at tatawaging walang utang na loob. Take note, may hangganan ang bawat tao. Hindi ka nila puwedeng sagarin para lamang sa utang na loob na ‘yan.

5. TUMULONG DIN SA IBANG NANGANGAILANGAN. Dahil naranasan mo nang malagay sa isang gipit na sitwasyon, malamang ay alam mo na rin ang pakiramdam ng walang malalapitan kaya ikaw na ang lumapit at mag-alok ng tulong sa kanila. Matuto kang magkusa, baka kasi nahihiya lang silang magsabi sa ‘yo. It’s a cycle process, ‘ika nga.

Tulad ng mga nabanggit, napakaraming paraan para makapagbayad ng utang. Gayunman, ‘wag na ‘wag mong gagawing pambayad ng utang ang mga anak, negosyo, lupain, atbp. para lamang sa lifetime utang na loob na ‘yan.

Utang na loob, beshie, 2022 na!

Mahirap man dahil sa ‘new normal’… 5 Paraan para magkaroon ng tiwala sa mga kausap online

ni Jersy L. Sanchez - @Life & Style| March 21, 2022

Napakaraming nagbago sa buhay natin at ‘ika nga, ‘new normal’.

Ilan sa mga nawala sa atin ay ang ‘human connection’ dahil sa ‘new normal’.

Karamihan sa mga ganap ay online o virtual na lamang, kaya naman ang kawalan ng voice o facial expression ay ilan lamang sa mga side effect ng online communication at sa katagalan. Hindi na tayo sanay makisalamuha sa ibang tao at ang ending, nawawalan na rin tayo ng tiwala sa mga nakakausap natin online, maging kaibigan man ‘yan o mga katrabaho. Ang hirap, ‘di ba?

Dahil dito, kailangan nating maunawaan ang kahalagahan ng pagkakaroon ng tiwala sa pamamagitan ng pag-aaral kung paano epektibong makikipag-communicate gamit ang social connections, pero paano natin ito gagawin? Narito ang ilang paraan para magtiwala ulit sa ibang tao:

1. MAGING CONSISTENT. Madalas tayong nakapokus sa mga taong palaging nasa tabi natin, good o bad day man ito. Kaya naman importanteng regular na itsek ang ating mga kaibigan o katrabaho kung ayos lang ba sila, dahil nakatutulong ito upang pagkatiwalaan nila tayo. Gayundin, paraan ito upang malaman nila na hindi sila nag-iisa.

2. MAKINIG. May mga pagkakataong tila nasasapawan na natin ang taong nag-oopen sa atin, pero ‘di ba, mas mahirap ito ‘pag online na? Bagama’t ‘di naiiwasan ang mga pagkakataong nakikinig na lang tayo para makapagsalita pagtapos niya, mas mabuting makinig tayo in a curious way. Kumbaga, ipakita nating willing tayong makinig sa anumang sinasabi nila. Halimbawa, magtanong ka na konektado sa usapan ninyo at iwasang mag-open ng panibagong topic.

3. ‘WAG ITAGO ANG FEELINGS. May mga moment talaga na kailangan nating maging open sa isa’t isa kahit pa nakaka-stress na. Ang pagiging bukas sa iyong nararamdaman ay nakatutulong upang mas maintindihan tayo ng ibang tao, gayundin, mae-engganyo rin silang mag-open sa atin kahit hindi kayo personal na magkausap.

4. UMAMIN SA PAGKAKAMALI. ‘Ika nga, sa ‘virtual world’, required tayong ipakita ang best version of ourselves, kaya naman hindi madaling i-admit ang ating mga pagkakamali. Pero mga besh, ang pag-amin sa mga pagkakamali ay magandang paraan para ma-build ang tiwala sa atin ng ibang tao. Sabi nga, wala namang perpektong tao kaya normal na magkamali. Ang importante, kaya natin itong itama at natuto tayo.

5. MAG-SET NG BOUNDARIES. Ang pag-establish ng boundaries ay nakahihikayat na magkaroon ng tiwala sa ating sarili, gayundin, mas nagiging tapat ka sa ibang tao tungkol sa mga limits mo. Ang pagkakaroon ng boundaries sa oras na inilalaan mo sa pag-o-online at ang pagbibigay ng panahon sa iyong sarili para mag-unwind sa social media ay magandang halimbawa ng pagtatakda ng boundaries.

For sure, hindi na mawawala sa ating buhay ang ganitong sistema. Kaya naman imbes na hayaan nating mawala ang human connection, mas mabuting pag-aralan kung paano tayo magkakaroon ng tiwala sa isa’t isa, hindi man natin personal na makausap ang ating mga kaibigan o kasamahan sa trabaho.

Hindi man magiging madali para sa ilan, take it as a challenge para ‘di naman boring ang buhay. Gets mo?