Alamin: Mga paghahanda para sa enjoy na summer outing

ni Mharose Almirañez | April 10, 2022

Nakaplano na ba ang lahat para sa inyong summer getaway? Kung oo, ‘wag lang basta magplano, tara na’t bumiyahe patungo sa naggagandahang summer destination sa ‘Pinas!

Mapa-swimming pool o dagat man ‘yan, tiyaking napaghandaang mabuti ang inyong pag-alis para hindi mamroblema kapag nasa kalagitnaan ka na ng pagtatampisaw.

Pero anu-ano nga ba ang mga dapat paghandaan tuwing may outing ang pamilya, barkada o kumpanya?

1. I-FULL TANK ANG SASAKYAN. Alam kong mahal ang gasolina, pero mapapamura ka naman sa hassle kung bigla kayong naubusan ng gas sa kalagitnaan ng express way. So, beshie, i-check ang gasolina bago umalis, okie?

2. ALAMIN ANG DIREKSIYON NG PUPUNTAHAN. I-waze mo na ‘yung daraanan n’yo ahead of time. Mahirap naman kung magkakanda-ligaw-ligaw kayo papunta sa resort. Aksaya na nga sa gas, sayang pa sa oras, ‘di ba? Ganundin para sa mga magko-commute, alamin kung saang terminal ng bus o jeep kayo dapat sumakay. Kung mag-a-island hopping, alamin n’yo na rin kung anong oras ang biyahe ng mga bangka.

3. MAGPA-RESERVE NG KUWARTO. Kailangan one week before ay na-secure n’yo na ‘yung tutuluyan ninyong cottage, bahay o hotel room. Hindi ‘yung sa mismong araw ng swimming pa lang kayo kukuha ng kuwarto. Kadalasan, ‘pag walk-in guest ay nagkakaubusan ng slot. Kaya mas okey kung magpa-reserve muna bago pumunta sa resort para hindi hassle.

4. ALAMIN ANG HIDDEN CHARGES. Hindi mawawala sa isla ‘yung environmental fee. Kabilang na rin ‘yung utility fee, corkage fee, electrical fee, atbp. Maliban d’yan, alamin n’yo na rin ahead of time kung magkano ang bayad sa mga extra activities.

5. I-PRESERVE ANG PAGKAIN. Sayang naman kung mapapanis ‘yung dala n’yong pagkain. Make sure, naka-seal o hindi nalawlaw ang mga pagkain. Gumamit din ng serving spoon kapag magsasandok ng ulam, atbp. Huwag kamayin ang shanghai, beshie, mag-tinidor ka.

6. MAGDALA NG SUPOT. Dito mo ilalagay ‘yung mga marumi o basang damit na ginamit sa pagsu-swimming. Puwede mo ring gamitin ang supot para mapaglagyan ng mga take out na pagkain.

7. MAGDALA NG FIRST AID KIT. Mabuti na ‘yung nakahanda kung sakaling may pulikatin, ma-dikya, madulas, o trangkasuhin sa mga kasama mo. Siyempre, ‘wag kalimutan ang sun block, alcohol at paracetamol. Kung may kasama ka namang mahihiluhin o hindi sanay bumiyahe sa malalayong lugar, dapat ready din ‘yung Bonamine, Katinko at candy.

8. IHANDA ANG MGA DADALHING DAMIT ATBP. Kung medyo excited ka mag-swimming, one week before pa lang ay mag-empake ka na. Ibasta o i-prepare mo na ‘yung tuwalya, underwear, swimwear, tsinelas at hygiene kit. But beshie, ‘wag naman exaggerated ang tatlong maleta para sa 2 Days & 1 Night outing na ‘yan. Besh, hindi ka magpa-fashion show, du’n!

9. I-FULL CHARGE ANG GADGETS. Sayang naman ang magandang view kung low battery ang cellphone o DSLR camera mo, ‘di ba? Capture the moment, sabi nga nila.

10. BUDGET. Useless ang lahat kung wala kang budget para sa outing na ‘yan. So, beshie, alam mo na, ‘wag puro travel now, pulubi later. Mag-ipon ka muna bago umawra. Okie?

Gayunman, ‘wag pa rin kakalimutan ang patuloy na banta ng COVID-19. Kung alam mong hindi maganda ang iyong pakiramdam ay huwag ka nang sumama sa outing, para maiwasang makahawa sa iba. Gets?

Dagdag-kaalaman para manatiling ligtas sa COVID-19

ni Nympha Miano-Ang- @Life and Style | April 7, 2022

Napakaliit na lang ng bilang ng mga impektado ng COVID-19 sa bansa at nasa 377 na lang noong isang araw kumpara sa patuloy na pagdami pa ng nagkakasakit sa Shanghai, China na umabot ng 13,354 sa nakaraang 6 na araw. Salamat sa patuloy na pag-iingat ng bawat Pinoy sa sarili upang makaiwas sa nakamamatay na virus. Nakakaugalian na ang tamang pagsusuot ng facemask, madalas na paghuhugas ng mga kamay at paga-alkohol kapag nasa labas ng bahay, sumusunod sa health and safety protocol kahit saan magpunta at higit sa lahat 60% ang fully vaccinated at 10% ang boosted na sa 'Pinas.

Ang patuloy na pagbalanse rin sa tamang nutrisyon, ayon sa isang top-US based immunology expert na si Dr. Emmanuel U. Sarmiento, ngayong 2022 ang makatutulong upang mapanatiling malusog, masaya, maging aktibo at nage-ehersisyo habang nagbabalik sa dating routine ang buhay sa new normal. Isiniwalat niya ang tamang edukasyon bilang dagdag kaalaman para mapanatiling ligtas sa COVID-19 sa forum ng Boosted and Fit in the Pandemic sa Estancia de Lorenzo, The Luxe Pavilion sa San Mateo, Rizal. Ang resistensiya ng katawan kontra viruses at iba pang sakit ay nakasalalay sa pisikal na kondisyon, "Ang supplements kasi ay 'di masabing safe kasi may tinatawag tayong micronutrient malnutrition. You can feel healthy, but if your body is not taking the right amount of micronutrients from the food you eat, then you can still get malnutrition," dagdag ng kinilala ring top allergist at immunologist sa South Carolina noong 2020.

Mahalaga raw sa chemotherapy patients ang supplements na may immunity boosters maging sa nagpapagaling mula sa operasyon. Mabisa rin sa matatanda ang tamang supplements lalo na't humihina ang immunity. Epektibo rin sa pagpapalakas ng immunity ang mga sangkap na Vit. A, C, D, E, Thiamine, B6, B12,Zinc, Selenium, ginger at turmeric. Manatili rin sa pagkain ng sariwang nilulutong gulay o isda kaysa sa mga processed at packed foods para lumakas ang immune system.

Sa katunayan, nakatulong sa medical frontliners sa U.S. noong pandemya ang pag-inom ng immunoboost at ipinagpasalamat na lahat ng gumawa ng diyeta na ito ay hindi tinamaan ng COVID-19 bago pa lang nauso ang bakuna, bagamat may ilang dinapuan ng virus ay mild lang ang naging sintomas.

Pagdating sa tamang pagkain at makaiwas na madagdagan ang timbang, ayon kay Ms. Julianne Malong, malaking challenge ang pagpili ng masustansiyang diyeta. Anuman ang edad at problema sa kalusugan, nakasalalay dito ang tamang kinakain na hindi makasasama sa kalusugan. Ang sustansiyang nakukuha sa pagkain ay susi sa malusog na buhay. Simulan nang magkakain ng gulay, prutas at protina para manatili ang tamang timbang, maiwasan ang sakit sa puso at hindi tumaas ang blood sugar.

Limitahan ang pagkain ng matatamis na meryenda, kendi at softdrinks dahil nakatataba ito at delikado sa katawan. "Ang pagpapalakas ng katawan ay nagsisimula sa cardiovascular system, habang nagkakaedad dapat pleksibol ang katawan, malakas at matibay ang mental health o positibo habang aktibo," mungkahi ni coach Nix Quejada. "Ang regular na ehersisyo kahit 30 minuto bawat araw, kahit busy o abala sa trabaho, anumang oras ka available ay gawin na, tulad ng push ups, weight training, yoga, zumba, cycling or running. Sikaping makilahok sa mga healthy competition o kaya gumamit ng electronic step tracking o fitness tracking gadgets para makita ang pagka-aktibo."

Bukod sa nutrisyon, supplements at ehersisyo, ang pisikal na kakayahan at kalusugan ng isipan, ang siyang pipili para magkaroon din ng sapat na tulog, maiwasang magkasakit, hindi malululong sa alak, masigla sa pakikisalamuha at nakokontrol ang stress levels.

Ika nga, ang dahan-dahang pag-iibayo ng kalusugan mula sa maliit na paraan, ang magbibigay motibasyon na makakasanayan na habang tumatandang malakas at naipagpapatuloy ang pisikal na aktibidad kasama ng pamilya, nakakalahok sa fitness challenges, nakapaglalaro outdoors, nakagagawa pa ng gawaing bahay upang di dapuan ng COVID-19. Tanging ikaw lamang sa iyong sarili ang magbibigay ng positibong pagbabago sa buhay.

Panghuli, sa rami ng dumaranas ng pag-aalala o anxiety tulad ng ilang celebrities, ang meditation na isang sinaunang praktis ang epektibo para pampakalma, mapayapa at mabalanse ang emosyon at isipan. Ang meditasyon o mind-body therapies ay nakatutulong kontra anxiety, stress, fatigue, nagpapaganda ng mood, pampasarap matulog at nagpapaibayo sa kalidad ng buhay.

Sa bahay o workplace man ‘yan… Tips sa tamang pakikisama

ni Mharose Almirañez | March 31, 2022

Likas sa mga Pinoy ang marunong makisama, gayunman, mayroon pa ring ibang indibidwal na tila wala sa bokabularyo ang nabanggit na salita sapagkat tila dedma lamang sila sa mga kasamahan mapa-bahay, trabaho o pampublikong lugar.

Hindi naman required makisama at hulihin ang kiliti ng ating kasamahan, ngunit kung iyong iisipin, ‘di ba’y ‘di hamak na mas masarap sa pakiramdam kapag kapalagayan mo ng loob ang mga taong nakapalibot sa iyo? ‘Yung tipong, hindi ka maiilang kumilos at hindi mo iisiping huhusgahan nila ang bawat galaw mo dahil kilala ka na nila’t alam n’yo na pakisamahan ang isa’t isa.

Ngunit paano nga ba makisama? Para sa ilang indibidwal na nahihirapang mag-adjust sa isang environment, narito ang ilang ways para sa inyo:

1. MAKIPAG-BONDING. Halimbawa, niyaya kang sumabay sa pagbili ng pagkain o gumala after work ng katrabaho mo, go lang! There’s a possibility na mas makilala pa ninyo ang isa’t isa. Ayaw mo naman siguro masabihang, “Ang panget mo naman ka-bonding,” ‘di ba?

2. MAG-SHARE. Kapag may baon kang meal o snacks, alukin mo rin ang mga katrabaho mo kung gusto nila. Share your blessings, ‘ika nga. Mag-share ka rin ng words of wisdom and experiences sa kanila, pero ‘wag ka masyadong maboka’t bida-bida, besh.

3. MAKISALI SA TOPIC. Hindi naman sa pagma-Marites, pero kapag may bagong tsika ang katrabaho mo ay maki-tsika ka na rin. Pero kapag sinabing secret lang muna ‘yung itsinika n’ya sa ‘yo, siyempre ‘wag mong ipagsabi sa iba. Well, ayaw mo namang sa ‘yo magsimula ang source of tsismis, ‘di ba?

4. MAKIRAMDAM. Ipagpalagay nating extended family kayo o nakikitira ka sa bahay ng kamag-anak, kapag pakiramdam mong bad trip ‘yung tita o tito mo ay ‘wag mong sasabayan ang init ng ulo nila. At saka, ‘wag mag-iingay kapag alam mong nagpapahinga na ‘yung ibang kasamahan sa bahay dahil hindi lang naman ikaw ang nakatira sa iisang bubong. Ugaliing makiramdam sa nagaganap na commotion sa paligid at ‘wag magpapatay-malisya sa nangyayari.

5. MAGKUSA. Kahit saang anggulo, dapat mong matutunan ang pagkukusa. Halimbawa, pagkukusa sa gawaing bahay, pag-aambag ng bayad sa utility bills o pang-grocery, at pagtulong sa kakilala, mapa-maliit o malaking bagay. Ikaw na rin ang magkusang i-open ang sarili sa ibang bagay o posibilidad na puwede mong i-offer sa ginagalawang environment.

Kung tutuusin ay wala naman talagang salita na puwedeng makapagsabi kung paano dapat makisama dahil ang pakikisama ay ikinikilos nang bukal sa puso. Para itong respeto na kailangang anihin. Kumbaga, kung marunong kang makisama ay ibang tao na rin mismo ang makikisama sa iyo. Ito ‘yung pakikipag-kapwa tao na hindi naghihintay ng kapalit o walang halong lihim na motibo. Gets mo?