Sawa na sa mall o travel? Read mo ‘to! Alamin: Simple at nakaka-kilig na date ideas

ni Mharose Almirañez | August 7, 2022

Madalas ba kayong lumabas ng dyowa mo? Saan-saang museums, zoos, concerts, at out-of-town trips na ba ang napuntahan n’yo? ‘Yung ang saya-saya n’yo together, tapos biglang malulungkot kasi wala na kayong pera after? So, ano ‘yan, bonggang date now, pulubi later?!

Sabi nga ng financial expert na si Chinkee Tan, “Hindi natin kailangang magpanggap na may pera tayo kasi kung ganito na rin lang, sa bandang huli, tayo rin ang magigipit at mahihirapang magpaliwanag kung bakit hindi na natin ginagawa para sa kanila ‘yung nakasanayan na.”

Kaya naman, shout out sa beshies natin na namumroblema sa kanilang next date dahil sa kapos na budget! Narito ang ilang date ideas na tiyak na makakapagpakilig at makakahuli sa kiliti ng inyong dyowa with a twist:

1. ROOFTOP DATE. Puwede kang mag-set-up ng dining table for two sa rooftop ng bahay n’yo or sa rooftop ng acquaintance mo. Maglagay ka ng decorations tulad ng balloons, fairy lights, petals, candles, confetti, pictures or anything, kung saan masasabing pinag-effort-tan mo talaga ang date na ito.

2. DATE SA GARAHE. Same set-up with rooftop date. Ikaw na ang bahala kung paano mo pagagandahin ang garahe n’yo. Nakaparaming DIY ideas at tips sa YouTube na puwedeng makatulong sa iyo sa pagde-decorate, beshie.

3. IPAGLUTO SI DYOWA. Busugin mo lang siya sa iyong homemade meals ay paniguradong hindi lang siya mabubusog sa pagmamahal, kundi literal na mabubusog mo rin ang tiyan niya. Puwede ring ikaw na ang magluto ng mga ihahaing pagkain sa inyong rooftop, garahe o picnic date. Puwede mo rin siyang ipagluto ng baon niya sa trabaho.

4. MAGLARO NG BOARD GAMES. Subukan n’yong maglaro ng chess, dama, snake and ladder, atbp. Napakagandang quality time nito para sa inyong mag-dyowa. Nakaka-healthy ng utak.

5. MOVIE MARATHON SA BAHAY. Hindi naman required manood sa sinehan tuwing may bagong release na pelikula, sapagkat napakarami nang online streaming platforms na puwedeng mapanooran ng HD movies. Another tips, puwede kayong bumili ng projector para kunwari ay big screen pa rin ang pinanonooran n’yo. Bumili na rin kayo ng popcorn and drinks para feel na feel talaga ang panonood, mapa-movie o series man ‘yan.

6. PICNIC SA GARDEN. ‘Yung tipong, maglalatag lang kayo ng sapin o tent sa sahig at mayroong dalang fruit basket na may kung anu-anong pagkain. Sa picnic date, maliban sa panonood ng movie, paglalaro ng board games o pagpapagulung-gulong n’yo sa damuhan ay puwede rin kayong maglaro ng badminton o mag-bike.

7. MAG-KARAOKE. Hindi n’yo kailangang mag-rent ng KTV room dahil puwedeng-puwede naman kayong magkaraoke sa sala o kuwarto ng inyong bahay. Puwede rin kayong mag-inuman. ‘Yun nga lang, kailangan n’yo talaga ng personal space para walang makaistorbo sa inyong bonding. Mahirap din kasi kung nagka-karaoke kayo sa sala, habang may nag-o-online class sa kusina, ‘di ba?

8. MANOOD NG SUNSET, SUNRISE, STAR GAZING AT FIREWORKS. Napaka-romantic nito, beshie. ‘Yun bang, aakyat lang kayo sa rooftop o bubong habang inaabangan ang sunset at sunrise. Alamin n’yo rin ang schedule kung kailan magkakaroon ng meteor shower upang makapag-rent ng telescope na puwede n’yong gamitin sa star gazing. Kung fireworks naman ay madalas lamang ito tuwing New Year’s countdown or may pa-event sa isang lugar. Knows mo bang may kasabihan na kapag nag-kiss kayo ng dyowa mo habang sumasabog ang fireworks sa kalangitan ay kayo na ang magkakatuluyan? Puwede ka ring mag-wish sa bulalakaw o tuwing 11:11.

9. LONG RIDE. Sa ngayon ay hindi ito affordable, sapagkat napakamahal ng gasolina. Gayunman, kabilang pa rin ito sa mga puwedeng gawin ng magkasintahan dahil the more na mahaba ang biyahe, the more na mahaba ‘yung time n’yo together. Bumiyahe lang kayo, magkuwentuhan at magmahalan. Saanman kayo dalhin ng biyahe n’yo, make sure makakarating kayo sa gusto n’yong puntahan at magkasama pa rin kayong uuwi sa inyong tahanan.

Sa isang relasyon, hindi naman basehan ang presyo ng lugar, pagkain, o dami ng activities para masabing mahal n’yo ang isa’t isa. Time and effort lang ay sapat na.

Ilan lamang ang mga nabanggit na puwede n’yong gawin together sa loob ng bahay. Gayunman, huwag makuntento na puro ganyan na lamang ang gagawin n’yo habambuhay dahil nakaka-boring ang paulit-ulit na routine. Siyempre, lagyan mo rin ng twist.

Wala namang nagbabawal sa inyong mag-date nang madalas sa mall, manood sa sinehan, um-attend sa concert, magpunta sa museum, at mag-travel kung saan-saan, basta tiyakin n’yo lang na may extra budget kayo para r’yan at hindi iiyak ang inyong mga bulsa matapos ang bonggang-bonggang date.

Okie?

Alamin: Mga paraan para suportahan ang problemadong kaibigan

ni Jersy L. Sanchez - @Life & Style| August 1, 2022

Bilang kaibigan, natural nating response ay tumulong sa friendship nating may pinagdaraanan.

Mapa-breakup, problema sa pamilya, health issue o anumang pinagdaraanan nila, gusto nating sumuporta sa kanila, pero may pagkakataong hindi natin alam kung paano ipapakita o ipaparamdam ang suportang ito.

Ang ending, kahit genuine naman ang intensyon nating maging karamay, feeling natin ay hindi tayo nakakatulong. Kaya naman, para sa mga beshies natin d’yan, narito ang ilang paraan para suportahan ang problemadong kaibigan:

1. YAYAING LUMABAS. Kung hindi mo alam kung ano ang dapat mong gawin o sabihin sa kanya, yayain mo muna siyang lumabas. Ayon sa mga eksperto, napakasimple lamang nito, pero sobrang epektib. Inirerekomendang bigyan siya ng atensyon dahil sa ganitong paraan, mararamdaman niyang may kaibigan na nagmamahal at umaalalay sa kanya.

2. MAKINIG MUNA. May mga pagkakataong gusto nating mag-advice dahil sa tingin natin ay kailangan niya ito, pero minsan ay mas okay na makinig muna tayo at hayaan silang sabihin ang kanilang nararamdaman. Bagama’t nakaka-tempt naman talagang magbigay ng advice o maghanap ng solusyon sa kanilang problema, let’s try our best na makinig nang hindi natin sila hinuhusgahan at kapag nanghingi sila ng advice, saka lamang tayo magbigay ng payo.

3. I-VALIDATE ANG FEELINGS NIYA. Halimbawa, sinabi niya sa iyo ang problema at sinabing natatakot siya, ang tamang response para rito ay, “Talagang mahirap ‘yan at naiintindihan ko kung bakit ganyan ang nararamdaman mo. Nandito lang ako para makinig.” Ayon sa mga eksperto, maraming paraan para maging better listener sa iyong kaibigan. Isang halimbawa ang pag-recap ng mga sinabi niya sa iyo dahil magandang paraan umano ito upang maipakita sa kanya na talagang nakikinig ka sa mga sinasabi o hinanakit niya

4. UMIWAS SA MGA CLICHÉ. Sa totoo lang, marami namang advice na okay pakinggan, pero hindi talaga nakakatulong. Kaya naman, mas okay pang sabihin ang totoo ‘pag hindi mo talaga alam ang dapat mong sabihin.

5. TULUNGAN SIYA SA MGA GAWAIN. Kung masyadong busy ang kaibigan mo dahil sa kanyang mga problema, oks ding mag-offer ng tulong sa kanyang mga gawin. Halimbawa, itanong mo kung may kailangan ba siyang bilhin sa grocery o kailangan niya ng kasama sa bahay. Malaking tulong ito upang makabawas sa kanyang stress, gayundin, upang malaman niya na mahalaga siya sa iyo.

6. MAGTANONG KUNG PAANO KA MAKAKATULONG. Kung sakaling hindi ka sigurado kung paano tutulong, oks ding itanong mismo sa kanya kung ano ang mga kailangan niya. Iba’t iba ang needs at paraan ng mga tao para mag-cope sa problema. Minsan, kailangan nila ng kaibigan na makikinig at magpapayo, habang may mga tao rin namang mas gustong mapag-isa. Kaya naman, inirerekomenda ng mga eksperto na ibigay ang anumang gusto ng iyong kaibigan.

Sabi nga, walang perpektong paraan para makatulong sa kaibigan nating dumaranas ng pagsubok, pero maraming paraan para iparamdam sa kanila na handa kang tumulong at hindi sila nag-iisa sa laban na ‘yun.

Kaya naman, make sure to try these tips kung gusto mong makatulong sa iyong kaibigan na may pinagdaraanan.

Gets mo?

Kilalanin: Mga uri ng Ghoster

ni Mharose Almirañez | July 31, 2022

Naranasan mo na bang pakiligin sa matatamis na salita at bigla na lamang maiwan sa ere?

Don’t worry, beshie, may solusyon d’yan si 3rd District Negros Oriental Rep. Arnolfo ‘Arnie’ Teves, Jr., ang Anti-Ghosting Bill o House Bill 611: An Act Declaring Ghosting as an Emotional Offense.

Sa ilalim nito, maituturing na “emotional abuse” ang panggo-ghost nang walang makatwirang dahilan, sapagkat maaari itong magdulot ng emotional distress sa biktima.

Dagdag pa ni Rep. Teves, nangyayari ang Ghosting kapag nasa “dating relationship”.

Aniya, masasabi lamang na dating relationship ang dalawang indibidwal kapag tila mag-asawa ang concerned parties na hindi kasal o tuluy-tuloy na romantically involved.

Kaya sa mahilig mang-ghost d’yan, kita na lang kayo sa korte!

Ang totoo, dalawa lang naman ang posibleng rason kung bakit may nanggo-ghost at nago-ghost. It’s either takot silang maiwan o takot silang magpakatotoo sa feelings nila.

So, ano ang pinagkaiba ng mga ito? Narito ang sagot:

1. TAKOT MAGPAKATOTOO. Falling out of love ang pinaka-nakakatakot na stage sa isang relasyon. ‘Yung tipong, hindi mo maipaliwanag ang nangyari. Basta paggising mo isang umaga ay biglang hindi mo na siya mahal. Kaya mo nang palipasin ang buong araw nang hindi siya nakikita o nakakausap, kumbaga, hindi mo na siya hinahanap-hanap at parang okey lang sa ‘yo kung mawala siya. Puwede ring nasanay ka na sa sitwasyon n’yo, kaya sa halip magpakatotoo sa iyong nararamdaman ay bigla ka na lamang maglalaho na parang bula. Hindi mo ipapaliwanag ang side mo, basta no explanation at all.

2. TAKOT MAIWAN. Sila ‘yung nakakakutob na maiiwan sila sa ere, kaya sa halip na ipagpatuloy ang relasyon ay uunahan na nila sa pang-iiwan ang karelasyon. Masyado silang takot maiwan o takot matapakan ang pride, kaya bago pa sila masaktan nang todo-todo ay sila na ang unang bibitaw at mang-iiwan.

So, sino ka sa dalawang ‘yan, beshie?

Payong ka-BULGAR, ‘wag mong ikatakot ang maiwanan dahil people come and go naman.

Huwag mo rin siyang unahan sa panggo-ghost, sapagkat part of growing up ang mabigo.

Kung masaktan ka man, ibig sabihin lang nu’n ay nagmahal ka talaga.

Unang-una, pag-usapan n’yo ang problema. Pangalawa, ipaliwanag mo sa kanya kung bakit kailangan mo siyang iwan. Hindi naman porke iiwanan mo siya ay nangangahulugang hindi mo na siya mahal, puwede rin kasing mahal mo siya, kaya palalayain mo na siya. ‘Yun bang, alam mo kung saan siya mas magiging masaya.

Pangatlo, baka puwede n’yo pang ayusin.

And please, kung napo-fall out of love ka man, huwag mong ikatakot ang pagpapakatotoo sa iyong sarili. Hangga’t maaga ay aminin mo na sa partner mo ang problema. Sabihin mong hindi ka na masaya, wala na ‘yung spark, wala na ‘yung thrill at wala na ‘yung exciting part. Yes, masasaktan siya, pero deserve niya rin namang malaman ‘yung totoo, ‘di ba? Deserve niya ‘yung closure.

Sa kabilang banda, nakakalungkot lamang isipin na kailangan pa ng ganitong klase ng bill, gayung napakaraming problema sa bansa na mas dapat tutukan.

Ngayong may isinusulong na Anti-Ghosting Bill sa Kamara, sana ay huwag mo na gawing bisyo ang panggo-ghost dahil hindi biro ang sakit na dulot ng ghosting. Nakakabaliw maging clueless kung bakit tayo iniiwan. So, please, kung ayaw mong umabot kayo sa korte at selda, ‘wag kang mang-ghost.

Okie?