Takot ka ba dahil baka ‘di mo kaya? Alamin: 5 benepisyo ng solo living

ni Mharose Almirañez | November 6, 2022

Sa ibang bansa, kusa nang humihiwalay sa puder ng mga magulang ang isang anak sa oras na tumuntong siya sa hustong gulang. Bumubukod siya ng tirahan at nagtatrabaho upang matutunang tumayo sa sariling mga paa. Sa madaling salita, ayaw na niyang maging pabigat sa kanyang mga magulang.

Samantalang sa ‘Pinas, kadalasan, nagkaanak o nagka-pamilya na ang isang indibidwal ay nakatira pa rin sa mga magulang niya. Ang masaklap, mga magulang pa niya ang kumakayod para lamang buhayin sila ng kanyang anak.

Malaking “No” talaga sa extended family kahit na sabihin pang, “The more, the merrier.”

Siyempre, kung ikaw ay nasa early adulthood, paano ka magkakaroon ng peace of mind kung kasama mo sa bahay ‘yung tiyahin mong palaging may sey sa bawat kilos mo? Maibibigay ba nila ‘yung privacy na hinihingi mo kung pati personal life mo ay gusto rin nilang panghimasukan? Hays, mapapa-“Sana all, may sariling bahay” ka na lamang talaga!

Actually, beshy, hindi naman mahirap kumawala sa extended family. So what kung minimum wage earner ka? FYI, sa tamang pagba-budget lang ng sahod ay paniguradong kering-keri mo namang makapag-rent ng apartment mag-isa. Sounds good, right?

Hindi naman sa hinihikayat kitang mamuhay mag-isa, pero dapat mo rin isaalang-alang ang ilang perks of solo living:

1. MAGKAKAROON NG LEISURE TIME. Puwede kang gumala nang walang inaalalang curfew. Puwede kang tumutok sa cellphone o computer nang hindi iniisip ang sermon ni nanay. Puwede mo ring itambak ang mga hugasin sa lababo at intindihin kapag feel mo nang maghugas ng pinggan. Puwede kang kumain anytime, gumising sa tanghali o matulog nang madaling-araw. In short, hawak mo ang oras mo.

2. MAS NAGIGING RESPONSABLE. Hindi naman sa tino-tolerate ko ang katamaran mo sa gawaing bahay, pero siyempre, alam kong pagod ka rin sa pagtatrabaho, kaya paniguradong gusto mo lamang sulitin ang sandaling oras na namamalagi ka sa ‘yong apartment. Since you’re living on your own, alam mong wala namang ibang gagawa ng household chores para sa iyo, kaya sa huli ay ikaw pa rin ang magluluto, maghuhugas, maglalaba, maglilinis, maggo-grocery at magbabayad ng bills— para sa sarili mo.

3. PAG-ALIS SA COMFORT ZONE. Para kang sisiw na nakawala sa sariling shell, ‘ika nga. Magugulat ka na lamang na kaya mo pa palang higitan ‘yung bagay na nakasanayan mong gawin. ‘Yung tipong, willing ka nang mag-take ng risk at mag-explore ng something new. Sa oras na mamuhay kang mag-isa, siguradong dito mo talaga madi-discover ang iyong sariling kakayahan.

4. MAGKAKAROON NG PRIVACY. Puwede kang ngumiti hanggang tainga kapag kinikilig ka sa ka-chat mo. Puwede ka ring humagulgol tuwing umiiyak kapag nasasaktan ka. Meaning, puwede mong i-express ang iba’t ibang emosyon mo sa loob ng iyong silid, hindi tulad noong kasama mo pa sa bahay ang mga kamag-anak mo. ‘Yung tipong, kaunting ngiti lang ay sasabihin na sa ‘yong, in love ka na. Pero ang pinakamahirap ay ‘yung gusto mong humagulgol, pero mga pigil na paghikbi lamang ang nagagawa mo dahil ayaw mong marinig ng mga kasama mo sa bahay na umiiyak ka.

5. MAY PEACE OF MIND. ‘Yun bang, mas nakakatulog ka nang payapa dahil hindi mo na naririnig ang paulit-ulit na sigawan, sumbatan, bilangan at murahan sa dati n’yong bahay. Wala na ‘yung tito mo na daig pa ‘yung dyowa mo sa pagiging toxic. Hindi mo na rin kasama ‘yung tita mo na walang ibang bukambibig kundi pera. In short, nakalayo ka na sa negativity.

Ilan lamang ‘yan sa mga dapat isaalang-alang sa oras na simulan mong mamuhay mag-isa. Pero siyempre, rito rin masusukat ang iyong talino at tapang. Paano ka ba didiskarte sa buhay nang hindi umaasa sa iba? May sapat ka bang lakas ng loob para makipagtransaksyon ng libu-libong pera sa landlord na kakakilala mo lang? Paano kung dumating sa point na na-delay ang sahod mo, kaya delayed din ang pambayad mo ng renta and utility bills? Naka-ready na ba ‘yung pride mo para magmakaawa kay landlord kung puwede nitong i-extend ang due date?

Higit sa lahat, what if nagkasakit ka? Sigurado ka bang kaya mong pagalingin ang iyong sarili without asking help from your relatives? Kaya mo na bang matulog mag-isa na hindi hinahanap ang init ng yakap ni nanay?

Kung ang sagot mo ay “No,” mainam kung basahin mo muling maigi ang mga nakasulat sa itaas.

Okie?

Safety tips para ‘di mabiktima ng akyat-bahay

ni Mharose Almirañez | November 3, 2022

Nakakasigurado ka bang ligtas ang iyong pamilya laban sa mga magnanakaw?

Minsan, akala natin ay safe na tayo, basta nasa loob ng sariling bahay, pero ang hindi natin alam, kahit ano’ng pag-iingat ay hindi pa rin puwedeng makaiwas sa mapagmatyag na mga mata. ‘Yung tipong, magugulat ka na lamang na natiktikan na pala nila ang iyong mga kagamitan. Kumbaga, nasalisihan ka na nila at inakyat na pala ng magnanakaw ang inyong bahay noong oras na walang tao sa inyo o noong mahimbing kayong natutulog sa kalaliman ng gabi.

Bilang concerned citizen, narito ang ilang dapat gawin upang maiwasan ang akyat-bahay gang:

1. MAGLAGAY NG GRILLS. Kung may grill na nakaharang sa inyong bintana ay mahihirapang makapasok at makapagpuslit ng naglalakihang appliances ang magnanakaw. Kaya naman bago pa sila makalabas sa binatana ay paniguradong nahuli n’yo na sila.

2. TIYAKING NAKA-LOCK ANG MGA PINTO AT BINTANA. Napakahalaga na naka-lock nang maigi ang inyong pinto. Hangga’t maaari ay maglagay kayo ng double lock nang sa gayun ay mahirapang magbaklas ng kandado ang mga magnanakaw. Kung mayroon kayong emergency exit, tiyaking nakasarado rin ito nang maigi upang hindi makadaan du’n ang kawatan.

3. MAGLAGAY NG CCTV CAMERA. Kung keri, ‘yung may motion sensor na CCTV camera na ang ikabit n’yo upang mabilis ma-detect ang kahina-hinalang kilos ng mga taong dumaraan sa tapat ng inyong bahay. Mangyari man ang nakawan ay puwede n’yo ring i-replay ang CCTV footage upang mahuli ang salarin.

4. MAKIPAG-COORDINATE SA MGA AWTORIDAD. Gaya na lamang ng mga barangay tanod at guard ng inyong subdivision dahil sila ang unang kumikilatis sa mga taong naglalabas-pasok sa inyong lugar. Kaya mainam kung mayroon kayong contact number nila para kontakin sila upang makahingi ng tulong na mahabol at ma-trace ang magnanakaw.

5. HUWAG BASTA MAGTIWALA. Hindi masamang magkaroon ng trust issues, lalo na kung para naman sa kapakanan ng iyong pamilya. Huwag kang maging palangiti kahit kanino, sapagkat hindi lahat ng ngumingiti sa ‘yo ay may magandang intensyon dahil mayroong ilan na gusto lamang kunin ang iyong loob bago tuluyang umatake. Okay lang na maging friendly sa neighborhood, pero huwag magtiwala nang bonggang-bongga.

Sa hirap ng buhay ngayon ay mapapabuntong-hininga ka na lamang kapag ikaw ang nabiktima ng akyat-bahay. ‘Yung tipong, hindi mo pa nga fully paid ‘yung hinuhulugan mong appliances tapos nanakawin lamang sa iyo.

Ang masaklap pa r’yan, may mga beteranong akyat-bahay na nananakit kapag nakita ka nila. Kaya tumakbo ka na bago ka pa nila mapag-initan, ma-rape o mapatay. Hays. So, beshie, ingat, ha?

Baguhan sa industriya? We got you! 10 Tips sa pagpapatakbo ng online business

ni Mharose Almirañez | October 27, 2022

Napakahalaga ng marketing plan sa pagsisimula ng kahit ano’ng negosyo. Malaki man o maliit ‘yan, dapat lamang na mayroon kang nakalatag na strategy and goal upang mapanatiling malago ang iyong pangkabuhayan.

Hindi importante kung nag-aral ka ng business management o kung gaano kalaking salapi ang kaya mong i-invest, sapagkat nasa diskarte ang totoong puhunan. Kailangan mo ring maging “active” o “online”, lalo na kung social media ang gagamitin mong platform.

Sa ngayon ay nag-convert na rin to e-commerce ang entertainment app na TikTok. Anila, “85% of TikTok users plan to shop with online retailers”. Kasing-bilis nga naman ng kidlat ang pagdami ng online shoppers sa kasagsagan ng pandemya, bagay na nakakamangha talaga!

Ngunit bago mo tuluyang pasukin ang online selling, narito ang ilang bagay na dapat mong tandaan:

1. PAG-ISIPAN KUNG REBRANDING O RESELLING ANG GAGAWIN. Usong-uso ang reselling o ‘yung maghu-wholesale ka ng product, tapos ibebenta mo nang patingi-tingi. May iba namang gustong mag-establish ng sariling produkto sa pamamagitan ng pagre-rebrand. Kumbaga, bibilhin nila ‘yung product sa supplier at ipapangalan sa sarili nilang business. Sa pagre-rebrand ay maaari ka na ring maging CEO sa pamamagitan ng maliit na kapital.

2. I-CUSTOMIZE ANG PROFILE NG IYONG SHOP. Madalas tumambay ang mga tao sa Facebook, kaya dapat mong pagandahin ang iyong FB page. Simulan mo sa pag-e-edit ng cover photo, profile picture, at general information ng iyong produkto. Maglagay ka rin ng navigation map upang madali kang ma-locate kung sakaling gustuhin nilang mag-pick up ng item. Siguraduhin mong catchy and trendy ang mga post sa social media upang ma-hook ang mga mamimili. First impression lasts, ‘ika nga.

3. MAGING VISIBLE SA LAHAT NG SOCIAL MEDIA. Siyempre, hindi ka lamang dapat mag-focus sa Facebook dahil nar’yan din ang Instagram, TikTok, Shopee, Lazada, Carousell, Ebay at iba pang puwedeng pagbentahan ng item. Mag-post ka lang nang mag-post upang mas lumawak ang iyong market. Maaari ka ring gumawa ng sarili mong website at blog. Kung keri ng powers mo ang vlogging ay napakagandang strategy din niyan.

4. GUMAWA NG GIMIK SA BAWAT POST. Kung tutuusin ay pare-pareho lang naman ang mga produkto, nagkakaiba lang kung paano mo ipino-promote sa market. Paano ka ba mag-caption? Mainam na sabayan mo kung ano ang uso at huwag kang magpapahuli sa latest. Daanin mo rin sa magagandang shot ang ina-upload mong pictures. Tandaan, captions at pictures ang magdadala sa ‘yong produkto.

5. I-BOOST ANG IYONG POST. Kapag mas malaking halaga ang ilalabas mo para sa pag-boost ay mas maraming audience ang puwedeng maabot ng iyong post. Ganyan ang kalakaran sa Tiktok, FB, IG atbp. Siyempre, kailangan din nilang kumita mula sa ‘yo, kaya ‘wag ka nang umasa sa organic post. Makakatulong din ang paglalagay ng common hashtags at popular keywords sa iyong post upang i-up ka nang i-up ng algorithm. Pag-aralan mo rin ang search engine optimization (SEO).

6. SUMALI SA FACEBOOK GROUPS. Epektibo ang ganitong strategy para mas madaling maabot ang iyong target market. Halimbawa, cellphone accessories ang iyong ibinebenta, maaari kang sumali sa FB groups na puro abubot pang-cellphone ang topic. Puwede mo ring i-share ru’n ang iyong post and FB live upang makahatak ng views.

7. I-READY ANG IYONG E-WALLET. Since online transaction ang iyong negosyo ay i-expect mo na rin ang cashless payment. Puwede ka ring mag-open ng e-wallet tulad ng GCash, Maya at PayPal na mas madaling na-a-access. Less hassle ito kaysa pumunta ka pa sa money remittance center para lamang i-claim ang bayad ng buyer. Make sure na separate ang iyong personal account at business account upang madali mong ma-monitor ang paglago ng iyong kapital.

8. MAG-INVEST SA INTERNET. Kung weak ang iyong internet ay kakaunti lamang ang mari-reach na views ng iyong live selling. Posible ring mag-alisan ang iyong viewers kapag paputol-putol ka sa live. Kaya unahin mong mag-invest sa mabilis na internet. Kung aalis ka naman ng bahay, dapat mayroon ka ring mobile data para masagot mo pa rin ang inquiries ng mga customer. Huwag mo silang paghihintayin sa reply kung ayaw mong mapunta sila sa ibang seller at du’n makabili.

9. PLANUHIN KUNG PAANO IDE-DELIVER ANG ITEM. Kung may motor ka naman at may kaluwagan ang iyong time, ikaw na mismo ang mag-deliver ng item sa halip mag-book ng Grab, Lalamove o Angkas Padala upang makamenos. Ngunit kung hindi mo keri, rito ka na maghahanap ng rider na puwedeng mag-deliver. Puwede ring mag-meet kayo halfway ng buyer.

10. HUMINGI NG REVIEWS O FEEDBACK SA CUSTOMER. Malaking tulong ang good reviews para makahikayat ng mas maraming customer. Dito kasi makikita ang kalidad ng mga produkto, gayundin kung ang shop ay legit.

Bukod sa mga nabanggit, dapat mo ring pag-isipan ang iyong magiging tag line. Kadalasan kasi ay ‘yan ang pang-engganyo ng buyers. Sipag at tiyaga lang, beshie. Okie?