Ano ang leptospirosis at paano ito maiiwasan?

ni Mabel G. Vieron @Life & Style | August 1, 2023

Tag-ulan nanaman kung kaya uso na muli ang sakit na leptospirosis, ang iba sa atin ay ‘di pa rin alam kung ano nga ba ang ibig sabihin nito. Sa artikulong ito ating ipapaliwanag kung ano nga ba ang leptospirosis at paano ito maiiwasan.

Ang leptospirosis ay isang malubhang impeksyon dulot ng bacteria na nilalabas ng mga hayop sa kanilang pag-ihi. Kadalasan nakukuha ito sa tubig-baha na kontaminado ng ihi ng daga. Bukod sa mga daga, maaari ring maging carriers ang mga baka, baboy at aso.

Mahalagang maging alerto sa sintomas ng leptospirosis kung napasugod sa baha lalo na kapag may sugat sa binti at paa.

Ang sintomas ng leptospirosis ay karaniwang nararamdaman 4 hanggang 14 na araw matapos ma-expose. Ito ang tinatawag na incubation period at sa oras na ito maaaring maramdaman ang mga sumusunod:

• Lagnat

• Pag-ubo

• Panginginig

• Pagkahilo at pagsusuka

• Pagkawala ng ganang kumain

• Pamamantal ng balat

• Pagsakit ng mga kalamnan lalo na sa hita at likod

Maaaring lumubha ang leptospirosis at maging dahilan ng pagkamatay kapag hindi agad ito naagapan. Ang malubhang karamdaman ng leptospirosis ay tinatawag na Weil’s disease. Ito ang ilan sa mga sintomas:

• Paninilaw ng balat

• Pananakit ng dibdib

• Seizures

• Pag-ubo ng dugo

• Kawalan ng gana kumain

• Pamamantal ng balat

• Pamumula ng mga mata

• Pagsakit ng mga kalamnan lalo na sa hita at likod

Ang sakit na ito ay kadalasang naaagapan sa pamamagitan ng leptospirosis prophylaxis o ang pag-inom antibiotics tulad ng penicillin at doxycycline. Mahalagang tapusin ang pag-inom ng gamot ayon sa iyong doktor dahil maaaring bumalik ang bacteria kapag itinigil ang medikasyon.

Umiwas sa mga maruruming tubig at lupa na maaaring kontaminado ng ihi ng mga hayop lalo na kung ikaw ay mayroong sugat. Kung hindi maiwasan ang paglusong sa tubig-baha, magsuot ng bota at maging alisto sa mga sintomas ng leptospirosis.

Kung sa iyong palagay ay posible kang makakuha ng bacteria mula sa iyong mga alagang hayop, magtanong sa isang veterinarian tungkol sa bakunang ito. Kung kayo ay nakakaranas ng sintomas ng leptospirosis, agad na pumunta sa inyong doktor upang magpakonsulta at para mabigyan ng tamang lunas ayon sa inyong karamdaman.

Ngayong patuloy pa rin ang pag-ulan, please lang mga ka-BULGAR, alagaan natin ang ating mga sarili. Okie?

Hirap na mag-commute araw-araw?... Tips para mapadali ang iyong work from home

ni Mabel G. Vieron @Life & Style | July 29, 2023

Sa panahon ngayon, mas pinipili ng mga tao at mga negosyante ang mag work from home. Less-hassle na ‘di ka pa mamomroblema sa pang-araw-araw na pagbiyahe. Kaya naman narito ang mga tips kung paano magiging epektibo ang ating work from home.

1. PAG-INVEST NG KAGAMITAN. Ang pinaka-importanteng kagamitan ay ang PC o laptop. Ito ang pangunahing magiging kasama mo sa pagtatrabaho. Kung ang iyong kumpanya naman ay nagpadala ng magagamit mo, eh ‘di mas oks, ‘di ba?
   

2. KOMPORTABLENG UPUAN AT MESA. Ilang oras ba ang gugugulin mo sa iyong trabaho? Sure akong 8 hours ‘yan, isipin mo ‘yun walong oras kang magtatrabaho kaya naman deserve mo rin ang komportableng upuan at mesa upang makapagtrabaho ka ng maayos.
   

3. TAMANG ORAS NANG PAGTATRABAHO. Kung walong oras ang dating ginugugol mo sa pagtatrabaho, ganundin dapat kung naka-WFH ka. Sa totoo lang, napakahirap gawing simple ang walong oras na pagtatrabaho dahil makikita mo na mas relax ka naman, at iwas trapik, ngunit ‘di rin maganda sa kalusugan ang nakababad sa trabaho. Sarili mo pa rin ang iyong unahin, oki?
   

4. GUMAWA NG TO-DO LIST. Kung meron kang to-do list na tinatawag, i-update mo ito araw-araw. Mas magkakaroon ka ng maayos na pagpaplano ng mga gawain mo sa buong araw. Dahil dito, mas magiging produktibo ka dahil tila isang checklist lang ito ng mga gagawin mo.
   

5. KUMAIN NG MASUSTANSYANG PAGKAIN. Sa totoo lang, mas may pagkakataon ka na para rito dahil puwedeng ikaw na mismo ang maghanda at magluto nito. ‘Di gaya ‘pag nasa opisina ka na puro fast food ang kinakain mo, ‘di ba?

Akala mo ba ay tapos na tayo, beshie? R’yan ka nagkakamali! Narito pa ang mga napakalaking advantage kapag tayo ay naka-WFH. Halina’t atin itong isa-isahin!

1. TIPID SA PAMASAHE. Dahil naka-WFH ka, hindi mo na kailangang bumiyahe at mag-budget para sa pamasahe. Siyempre, hindi mo na rin need gumising nang maaga para pakikipag-siksikan sa ibang pasahero.
   

2. TIPID SA DAMIT. Hindi ka na mai-stress kung ano ang iyong outfit of the day, sapagkat puwede kang magtrabaho kahit nakapambahay lamang.
   

3. MAS MABILIS MATATAPOS ANG TRABAHO. Puwede kang mag-advance upang maka-bonding mo rin ang iyong family. Maari ka ring gumawa ng gawaing-bahay at magpahinga matapos ang iyong trabaho.
   

Sa una ay mahirap talaga mag-adjust, beshie! Lalo na’t kung iisipin mo rin ang inyong internet at electric bill, ngunit exciting naman ito lalo na’t kung makakasanayan mo.

Sailor na amo at alagang aso, 2 mos. palutang-lutang sa Pacific Ocean, buhay!

ni Mabel G. Vieron @Life & Style | July 20, 2023

Kung ang ibang tao ay ‘di kayang tumagal ng isang oras sa karagatan, wala kayo sa napagdaanang pagsubok nina Tim Shaddock, 51-anyos, at kanyang aso na si Bella.

Sino nga bang mag-aakalang makaka-survive pa sila sa mahigit dalawang buwang palutang-lutang sa Pacific Ocean?

Alam kong palaisipan sa'yo kung paano ito nangyari, pero kung ikaw ba ang nasa sitwasyon nila ay kakayanin mo kaya?

Himala kung maitatawag ng iba, pero ito ang pinagdaanan ni Shaddock at kanyang alagang aso.

Ayon kay Shaddock, nagmula sila sa Mexico at balak umano nila sanang tumungo sa French Polynesia noong Abril, ngunit nasira ang kanilang sinasakyang catamaran matapos na hagupitin ito ng bagyo.

Namataan sila ng isang helicopter kung kaya’t nailigtas sila. Ibinahagi rin ni Shaddock, ang kanilang ginawa upang maka-survive. Ayon sa kanya, kumakain sila ng hilaw na isda at umiinom ng tubig-ulan.

Dadalhin na sila sa Mexico kung saan isasailalim si Shaddock sa iba pang medical tests.

Grabe ang karanasan na 'yun para sa kanila, pero aral na rin ito sa mga nagnanais na sumakay sa mga sasakyang pandagat na magdoble-ingat, laging siguraduhin kung oks ba ang lugar na daraanan at pupuntahan.