Alagang pusa, pinamanahan ng P1.3 bilyon ng amo

ni Jenny Rose Albason @Gulat Ka 'No?! | August 11, 2023

Kadalasan kapag ang isang tao ay pumanaw, iniiwan nila ang anumang ari-arian na kanilang naipon para sa kanilang mga kaanak.

Ngunit ibahin natin si Ben Rea ng U.K at ang kanyang pinakamamahal na alagang pusa na si Blackie.

Nang namatay si Ben Rea, isang milyonaryo at antique dealer noong 1988, iniwanan nito si Blackie ng £7 milyon.

Ang katumbas nito ngayon ay nagkakahalaga ng nasa £18.5 milyon o P1.3B.

Dahil sa pamanang ito ay opisyal na itinuring si Blackie bilang pinakamayamang pusa sa buong mundo, na hanggang ngayon ay wala pa ring nakakatalo.

Ang amo ni Blackie na si Ben ay kumikita ng milyones sa pamamagitan ng pagbili at pagbebenta ng mga antique, na nagbigay-daan sa kanya upang bigyan ang kanyang mga pusa ng karangyaan na sa tingin niya ay nararapat lang sa kanila.

At si Blackie, ang huling nabuhay sa 15 na pusa sa mansyon ni Ben sa Dorney, Buckinghamshire, ang nagmana ng pera.

Si Ben ay may pamilya, ngunit siya ay nabuhay nang mag-isa at tumangging kilalanin ang kanyang sariling pamilya ayon na rin sa kanyang kagustuhan.

Sa halip, karamihan sa kanyang pera ay nahati sa tatlong cat charities kasama ang kanyang habilin na alagaan ang kanyang mga alaga hanggang sa kanyang huling araw.

Pinamanahan din ni Ben ng maliit na halaga ang kanyang hardinero at mekaniko.

Hindi lamang si Blackie ang ‘mayamang’ pusa r’yan. May mga ilang sikat na pusa rin sa internet ang nagkakahalaga ng milyun-milyon, tulad ng pusa ni Taylor Swift na si Olivia Benson at internet sensation na si Grumpy Cat.

Pero technically, ang pera ni Ben ay habambuhay nang nakatali kay Blackie, samantalang ang mga charity ay hindi makatanggap ng pondo maliban na lang kung sila ay sumang-ayon na pangalagaan si Blackie.

Ilang araw bago ang malungkot na pagpanaw ni Ben, pumanaw din ang kanyang kapatid na babae at nag-iwan ng £2 milyon sa mga animal charity.

Sino ba naman ang hindi maaantig sa kuwentong ito? 'Ika nga nila “a dog is a man’s bestfriend”, pero napatunayan natin sa kuwento ni Ben na hindi lang aso ang maituturing nating bestfriend, puwede ring pusa o kung anumang uri ng hayop ang ating alaga.

Okey lang kahit hindi pera ang isukli natin sa ating mga alaga, alagaan lang natin silang mabuti at mahalin tiyak na susuklian naman nila tayo ng walang katumbas na pagmamahal at saya.

100 katao nagtulung-tulong... Marshmallow na mala-grand piano, 648.40 kgs., pasok sa Guinness

ni Mabel G. Vieron @Gulat Ka 'No?! | August 9, 2023

Nahuhumaling ang mga kabataan ngayon sa iba't ibang disenyo ng marshmallow, pero wala na yatang tatalo sa marshmallow na ginawa sa Mexico.

Alam n'yo ba kung bakit? Ang ginawa lang naman nila ay ang dambuhalang marshmallow na mas mabigat pa sa isang grand piano. Biruin mo 'yun? Kahit sino ay bibilib kung paano nila ito ginawa.

Nakatanggap ng Guinness World Record title ang Mexico matapos nilang gawin ang higanteng marshmallow. Ginawa ng kumpanyang Dulces Mazapan de la Rosa ang marshmallow sa Plaza Fundadores sa Guadalajara, Jalisco.

Ang record breaking attempt na ito ay isa sa mga activities na bahagi ng kanilang 200th founding anniversary celebration.

Upang makasiguro na pasok sa requirements ng Guinness organization ang marshmallow, nakabantay sa industrial plant ng kompanya ang official adjudicator na si Carlos Tapia.

Alam kong curious na rin kayo kung ilang katao ang gumawa nito, kinakailangan lang naman ito ng 100-katao, yes 100! Tama kayo ng pagkakabasa mga ka-BULGAR, dahil ito ay may bigat lang namang 648.40 kilograms na tumagal ng 53 hours o mahigit dalawang araw para ma-perfect itong marshmallow.

Matapos makumpirma na ang Dulces Mazapan de la Rosa na ang bagong record holder, pinaghati-hatian at tinikman na ng mga mamamayan ng Guadalajara ang marshmallow.

Oh, saan ka pa? Panalo na sila, may pinaghati-hatian pa sila, grabe ‘di ba? Akalain mo ‘yun nagtulung-tulong sila para lang ma-perfect ‘to. Para sa akin ay deserved nila kung ano ang kanilang natanggap na parangal dahil ‘di biro ang kanilang ginawa, isipin mo ‘yun anytime puwede bumagsak o mag-collapse ‘yung marshmallow, grabe!

Mga sign na dapat ka nang magresign sa trabaho

ni Jenny Rose Albason @Gulat Ka 'No?! | August 8, 2023

Alam kong marami sa atin ang naguguluhan o nagdadalawang isip kung dapat na nga ba nating iwan ang ating kasalukuyang trabaho. Hindi ko layunin na pilitin kang mag-resign ngunit sa article na ito ay ibabahagi ko ang mga dahilan upang mabigyan ka ng linaw at makapagdesisyon ng maayos.

1. HINDI SAPAT ANG SUWELDO. Sa totoo lang, depende sa tao ang konsepto ng mababa o mataas na suweldo. Alam n’yo kung bakit? Dahil iba-iba tayo ng needs at lifestyle. Dito sa Pilipinas, parte na ng kultura natin ang nakatira pa rin tayo sa ating mga magulang kahit na tayo ay may trabaho na, at wala namang masama ro’n. Masuwerte ka kung tinutulungan ka pa rin hanggang ngayon ng magulang mo, unless na lang kung ikaw ay breadwinner.

Kung ikaw naman ay nagbabayad ng renta, kuryente, tubig, internet, at grocery, etc., Aminin natin na mababa talaga ang pasahod dito sa ‘Pinas sabayan pa ng nagtataasang presyo ng mga bilihin.

2. HINDI MAKASUNDO ANG KASAMAHAN SA TRABAHO. Walang perfect na work colleagues at mas lalong hindi ka rin perfect. Kung hindi mo masakyan ang trip nila, wala kang magagawa. Itinuturing na nating pangalawang tahanan ang ating workplace. Kumbaga, araw-araw natin silang kasama at minsan nga ay parang pamilya na rin ang turing natin sa kanila. Kung hindi mo sila makasundo, umalis ka na.

Totoo namang sa kahit anong kumpanya ay hindi mawawala ang tsismisan. Mula sa iyong outfit hanggang sa personal na buhay ay nanghihimasok sila at nawawalan na ng respeto. ‘Yung iba naman ay gumagawa ng mga bagay na ikapapahamak mo. ‘Yan ang tinatawag na crab mentality. Everybody wants to be on top, everybody wants to be the king and queen. Hilaan pababa kumbaga.

3. MAY MAS MAGANDANG OPORTUNIDAD SA LABAS. Huwag i-ignore ang mas magandang oportunidad. Mas promising na career growth, mas magandang schedule, at mas mataas na suweldo. As long as nakikita mong mas better ito kaysa sa kasalukuyan mong trabaho, ‘wag mo na itong palampasin pa.

4. MALAYO SA TINAPOS NA KURSO. Marami sa atin ang nasa industriya na malayo sa kursong ating tinapos. Sa totoo lang, wala namang masama ro’n, pero paano na lang kung nangangarap ka pa ring ipagpapatuloy ‘yung field na gusto mo talaga? Malamang ay dumating din kayo sa punto ng inyong buhay na nagke-crave kayo sa career na talagang gusto n’yo. Yakapin mo kung ano gusto mong gawin. Do something about it and you will surely be happy with your career. Do what you love to do and get paid for it.

Okie?

5. MALAYO SA BAHAY MO. Seryoso, hindi ito biro. Malaking factor din ang location ng workplace kahit pa sabihin natin na sanay na tayo sa biyahe.

6. SAWA KANA. Nakakatawa man pakinggan pero totoo itong nangyayari. Kumbaga sa pag-ibig, kapag sawa ka na, ‘wag mo nang ipilit dahil sa hiwalayan din naman ito mapupunta. Madalas itong mangyari sa mga petiks at routinary na trabaho. ‘Yung tipong kayang-kaya mo nang tapusin lahat ng tasks kahit nakapikit ka pa. ‘Yung minsan ay nagsasaawa kana kasi paulit-ulit na lang ang ginagawa mo. Oo, halos lahat ng trabaho ay routinary talaga, pero may severity levels din ‘yan. Hindi kana asset ng kumpanya kung ganyan ang nararamdaman mo, wala na sa diwa mo ang enthusiasm.

Later on magiging liability kana. Go ahead and find a new environment that would motivate you once again.

7. JOB BURNOUT. Ano nga ba ang pagkakaiba nito sa nagsasawa na? Ang burnout ay hindi ka pa naman nagsasawa, pero napapagod ka na. Pumapasok pa rin naman tayo sa trabaho pero malalaman mong na-bu-burnout kana kapag gigising ka tapos ang una mo agad na maiisip ay kung ano ang idadahilan mo sa boss mo dahil ayaw mong pumasok.

Ang iba nga ay nag-a-unwind pa. Subukan mo ‘yun, pero kung pagbalik mo sa reyalidad ay nasa burnout state ka pa rin, tama na dahil baka hindi na para sayo ‘yang trabaho na ‘yan, maghanap kana ng iba or kaya magpahinga ka muna.

Kaya mga ka-BULGAR, sapat na siguro itong mga dahilan upang makapagdesisyon ka ng mabuti, kung dapat mo na nga bang iwan ang kasalukuyan mong trabaho. Huwag kang manghihinayang kung may patutunguhan ka naman. Again, hindi ito sapilitan, okie??