10 hanggang 15 taon lang ang lifespan... 43 yrs. old na goldfish, pasok sa Guinness

ni Mabel G. Vieron @Gulat Ka 'No?! | August 19, 2023

Ang average lifespan ng goldfish ay 10 hanggang 15 taon lamang, kaya malamang sa malamang ay bibilib din kayo sa aking ibabahaging kuwento, dahil umabot lang naman siya sa edad na 43. Yes, mga ka-BULGAR, 43 years siyang nabuhay.

Ang goldfish na tinutukoy natin ay si Tish na napanalunan ni Peter Hand bilang premyo noong 1959, si Peter ay 7-anyos noon.

Inalagaan ni Peter si Tish hanggang sa ikasal siya at umalis sa kanilang tahanan, kung saan ang kanyang ina na si Hilda, ang nag-alaga kay Tish.

Si Tish ay nagsilbi umanong suwerte sa buhay ni Nanay Hilda.

Ang nakakamangha pa sa kuwento ng buhay ni Tish ay noong 1988, tumalon umano ito sa bowl na kanyang pinaglalagyan, wala sa bahay noong si Nanay Hilda kaya ‘di niya alam kung gaano na katagal si Tish sa sahig. Sa kabutihang palad nang ibalik siya ni Nanay Hilda sa tubig ay nagpatuloy ito sa paglangoy na para bang walang nangyari.

Sa paglipas ng mga taon, habang tumatanda si Tish, ang mga kaliskis nito ay nagiging silver.

Pagbabahagi pa ni Nanay Hilda, ayaw umano ni Tish ang ingay kung kaya’t sinisiguro niyang tahimik ang kanilang kapaligiran hangga’t maaari.

Pasok si Tish sa Guinness World Record bilang pinakamatandang goldfish sa buong mundo na sinundan ng British goldfish na pinangalanang Fred sa pagmamay-ari ni A.R Wilson, namuhay si Fred ng 40 years at pumanaw noong 1980.

Ang nakakalungkot na ibinahagi ni Nanay Hilda ay ang pagkamatay ni Tish noong Agosto 6, 1999, isang taon matapos siyang maparangalan.

May ilang haka-haka na ang goldfish umano ay namumuhay sa loob ng 50 years, ngunit hanggang ngayon ay ‘di pa rin ito napapatunayan at wala pa ring nakaka-beat ng record ni Tish. Nakakamangha ang kuwento niya, hindi ba mga ka-BULGAR?

Walang ahitan simula pandemic lockdown... Bebot, 11.81 inches ang balbas, pasok sa Guinness

ni Mabel G. Vieron @Gulat Ka 'No?! | August 15, 2023

Opisyal nang tinalo ni Erin Honeycutt, 38-anyos, mula sa USA ang world record ni Vivian Wheeler, 75, na dating may pinakamahabang balbas.

Imagine, nakayanan niyang pahabain ang kanyang balbas ng 11.81 inches na ‘di man lang uminom ng kahit na anong supplement. Kung ikaw si Honeycutt, kakayanin mo rin kaya ito?

Ayon sa kanya, siya ay may polycystic ovarian syndrome (PCOS), isang kondisyon na nagdudulot ng hormonal imbalance at maaaring magresulta sa hindi regular na pagkakaroon ng menstruation, pagtaas ng timbang, pagkabaog, at labis na paghaba ng buhok.

Nagsimulang tumubo ang balbas ni Honeycutt, noong siya ay 13-anyos pa lamang.

Gumamit siya ng iba’t ibang paraan upang matanggal ito, tulad ng pag-aahit at pagwa-wax.

3 times a day kung mag-ahit ng balbas si Honeycutt, ipinagpatuloy niya ito hanggang sa siya ay tumanda

Hindi lamang ang PCOS ang isyu sa kalusugan na kinailangang labanan ni Honeycutt dahil noong 2018 umano, nasugatan ang kanyang paa at agad siyang idinala sa ospital, kung saan nagkaroon siya ng necrotizing fasciitis sa kanyang binti, na isang bihirang bacterial infection na nagresulta sa pagkamatay ng mga bahagi ng malambot na tissue ng kanyang katawan.

Ayon sa kanya, buong tapang niya umanong haharapin ang pagsubok na ito sa kanyang buhay.

Gayunman, ang kanyang mga komplikasyon sa kalusugan ay hindi tumigil do’n. Ang presyon ng kanyang dugo ay tumaas nang tumaas hanggang sa siya ay na-stroke.

Pinayuhan si Honeycutt ng kanyang doktor na kung patuloy siyang mag-iisip nang positibo, mas mabilis siyang gagaling.

Ang binti ni Honeycutt ay naging septic at gangrene, na nagresulta sa kanyang pagpapasya na putulin na lamang ang kalahati ng kanyang paa.

Si Honeycutt ay madalas na naco-confuse sa kung ano ang magiging hitsura ng kanyang balbas kapag siya ay ganap na tumanda.

Hanggang sa nagpasyahan ni Honeycutt na pahabain ang kanyang balbas sa panahon ng nationwide lockdown na ipinatupad dahil sa pandemya ng COVID-19.

Sa pagsali ni Honeycutt sa Guinness World Records, na sumunod sa yapak ng iba pang mga babaeng may balbas tulad nina Vivian Wheeler at Harnaam Kaur, sana umano ang kanyang kuwento ay makapagbigay ng kumpiyansa sa iba pang mga kababaihang mayroong PCOS, na nagpapatunay na maaari silang yakapin ng lipunan at ng kanilang mga mahal sa buhay.

Practical money tips para sa bagong kasal

ni Jenny Rose Albason @Gulat Ka 'No?! | August 12, 2023

Kung ikaw ay bagong kasal, ikaw at ang iyong asawa ay magiging isa na lang ang aspeto sa buhay, kabilang dito ang inyong finances. Ibig sabihin, maghahati na kayong dalawa sa inyong suweldo, gastusin, ari-arian at pananagutan.

Magandang ideya rin na pag-usapan n’yo ang inyong plano pagdating sa financial bilang mag-asawa. Mas mainam kasi na pag-usapan ang mga bagay-bagay lalo na sa usaping pera dahil isa ito sa pinagmumulan ng hindi pagkakasundo.

Bagama’t ang household finances ay hindi romantic na usapin, isa pa rin ito sa dapat na talakayin, upang mai-plano ng mahusay kung paano mababayaran ang bills hanggang sa pagma-manage ng inyong ipon, malaking tulong din ito para sa inyong future plans.

Narito ang 5 practical money tips na maaari n’yong isaalang-alang.

1. MAS MAIGING BUMILI NG SECONDHAND ITEMS. Kapag lumipat na kayo ng bahay, totoong nakakaakit bumili ng mga brand new na gamit upang welcome rin sa inyong bagong buhay bilang mag-asawa. Gayunman, ang pagbili ng mga bagong appliances upang mag-match sa inyong bagong tahanan ay maaaring maging magastos. Unless, kung kayong dalawa ay may budget sa pagbili ng mga brand new, puwede n’yo ring i-consider ang pagkuha ng mga secondhand items. Makakatulong ito upang makatipid at mapanatili pa ring maganda ang inyong tahanan.

Bukod pa rito, ang pagbili ng secondhand ay isang mahusay na paraan upang maka-discover ng mga de-kalidad na item sa mas mababang presyo. Maaari ka ring makakita ng second hand na sofa o dining set na nasa good condition pa rin.

2. GUMAWA NG JOINT ACCOUNT. Ang pagkakaroon ng joint account lalo na sa mga gastusin sa bahay ay makakatulong upang mamonitor ang lumalabas at pumapasok sa inyong pera. Maaari n’yo rin itong gamitin bilang central fund upang bayaran ang inyong common household expenses tulad ng pagkain, renta, utility bills, atbp. Ang pag-share ng joint account ay magbibigay-daan sa inyong dalawa na maaccess ang pera sakalaing magkaroon ng emergency.

3. PAG-USAPAN KUNG SINO ANG MAGBABAYAD. Kung mayroon kayong two-income household, siguraduhing tukuyin ang inyong monthly contributions para sa bahay.

Maaari n’yo ring pag-usapan kung magkano ang ibibigay mo sa inyong joint account kada buwan, gayundin kung magkano ang inyong gagastusin, iipunin, o i-invest. May ilang mag-asawa na naka-assign kung sino ang magma-manage ng pang-araw-araw na gastusin. Ang isa ay maaaring naka-assign sa pagkain, utilities, at transportation, habang ang isa ay maaaring naka-task sa pagbibigay ng kontribusyon pagdating sa household insurance, retirement funds at investment.

4. GUMAWA NG EMERGENCY FUND. It’s never too early para mag-set up ng emergency fund, siguradong hindi mo pagsisisihan na gawin ito. Ang emergency fund ay isang reserbang pera na iyong itinabi sakaling may hindi inaasahang pangyayari, tulad ng health emergency, home repair emergency, o matanggal sa trabaho.

Kapag kinokonsidera kung magkano ang iyong monthly budget na ilalaan sa iyong emergency fund, maaari mong sundin ang tipikal na rekomendasyon, magtabi ng hindi bababa sa 6 months na living expenses. Para nagawa mo ito, kakailanganin mong magtabi ng 10% ng iyong gross income kada buwan, at kailangan mong patuloy na mag-ipon hanggang makuha mo ang halagang kailangan mo, o mas higit pa.

Kung gusto mong tiyaking regular kang naglalagay ng pera sa iyong emergency fund, maaari kang mag-set up ng isang automatic transfer sa iyong bangko o makipagpalitan sa iyong asawa na maglagay ng pera sa account kada buwan. Kung nais mong magsimulang gumawa ng emergency fund, maaari mo itong dahan-dahaning palaguin sa paglipas ng panahon, na magbibigay sa iyo ng peace of mind sakaling maka-encounter ka ng hindi inaasahang problema.

5. I-UPDATE ANG ACCOUNTS. Maraming newlyweds ang lumipat ng bagong tahanan matapos ikasal. Kung mayroon ka ring ganitong arrangement, tiyaking i-notify ang iyong banks, credit card, companies, insurance companies, at investment companies na mayroon kang account na babaguhin ang iyong address o contact information.

Kailangan mo ring ipaalam sa mga intitusyong tungkol sa iyong pagpapalit ng marital status dahil ang union ay magkakaroon ng kaugnayan sa iyong legal entitlements sa mga financial assets at estates ng isa’t isa.

Pagdating sa pag-manage ng pera, nasa inyo bilang mag-asawa kung ano ang pinakamahusay na paraan ang sa tingin n’yong mas okey. Gayunman, kung naghahanap ka ng mga time-tested advice, tiyaking i-consider ang mga nabanggit na tips.

Makakatulong ito para sa inyong bagong buhay bilang mag-asawa, at makakatulong din ito para sa inyong future. Gets??