Libreng sakay sa jeep at bus hanggang Hulyo na lang — LTFRB

ni Lolet Abania | June 21, 2022

Magtatapos na ang libreng sakay sa ilang public utility jeepneys (PUJs) at buses sa Metro Manila sa ilalim ng service contracting program (SCP) ng gobyerno sa Hulyo, ayon sa Land Transportation Franchising and Regulatory Board (LTFRB) ngayong Martes.

Base sa datos mula sa LTFRB, nasa 146 National Capital Region (NCR) public utility jeepney (PUJ) cooperatives at mga korporasyon ang hihinto na sa pagbibigay ng free rides sa Hunyo 30.

“For the buses, Busway will end by July pa as well as Commonwealth Route 7 bus from Montalban to Quezon Avenue,” pahayag ni LTFRB Executive Director Tina Cassion sa mga reporters.

Noong Abril 11, nagsimula ang EDSA Busway Carousel sa pagbibigay ng free rides para sa mga commuters sa ilalim ng third phase ng service contracting program (SCP) ng Department of Transportation (DOTr).

Sa ilalim ng SCP, ang mga public utility vehicle (PUV) operators at drivers na lalahok sa free ridership program ng gobyerno ay makatatanggap ng one-time payout at weekly payments base sa bilang ng kilometro na kanilang biniyahe per week, may sakay man silang pasahero o wala.

Ang mga ruta para sa free ride program ng mga PUVs gaya ng modern at traditional jeepneys, UV Express, at mga bus ay pinalawig naman nationwide noong Abril.

Ayon sa DOTr, nabigyan ang programa ng P7-billion budget ng General Appropriations Act (GAA) of 2022, sakop nito ang inisyal na 515 buses mula sa 532 units na registered sa program.

Noong Mayo 25, inanunsiyo naman ng DOTr ang extension ng free rides sa Metro Rail Transit Line 3 (MRT3) hanggang Hunyo 30.

Apela ng bus drivers ng libreng sakay ‘Hindi pa rin kami binayaran’

ni Lolet Abania | June 8, 2022

Umapela ang isang grupo ng mga drayber ngayong Miyerkules, na wala pa silang natatanggap na bayad mula sa gobyerno para sa kanilang serbisyo kaugnay sa programang libreng sakay na isinasagawa sa iba’t ibang plataporma ng public transport.

Ayon kay Joji Vizconde Jr., pangulo ng Buklod ng Manggagawa sa ES Transport, ilang transport workers sa ilalim ng kumpanyang ES Consortium, ang tinanggal sa trabaho matapos na magsagawa ng isang protesta noong Pebrero dahil sa pagkaantala ng kanilang bayad. “Hindi pa rin po naibibigay lahat.

May mga utang pa po at ang kapalit po ay tinanggal kami sa trabaho hanggang sa ngayon,” pahayag ni Vizconde sa ANC interview. Una nang sinabi ng mga drayber na hindi pa anila sila binayaran mula sa pagbibigay ng serbisyo sa ipinatutupad na free ride program ng pamahalaan, kung saan nagkakahalaga ito ng P20 million.

Sa ilalim ng PUV (public utility vehicle) service contracting program, 30 porsiyento ng weekly payout ay napupunta sa mga drayber habang 70 porsiyento naman ang nakukuha ng mga operators, kung saan sakop ang arawang operational at maintenance costs nito.

Inamin naman ng ES Consortium nitong Pebrero, ang pagkakaroon ng delay sa disbursement ng mga sahod dahil sa pagbagu-bagong COVID-19 alert level status at iba’t ibang proseso sa loob ng consortium.

Ayon pa kay Vizconde, naghain na rin ang grupo ng reklamo sa Department of Labor and Employment (DOLE) kaugnay sa naturang usapin. “Lahat ng ahensiya ng gobyerno ay tinutukan namin pero para pong nagbulag-bulagan at nagbingi-bingihan sa mga hinaing ng mga manggagawang nasa transport sector,” giit pa ni Vizconde.

Libreng sakay sa MRT3, extended hanggang Hunyo 30 — DOTr

ni Lolet Abania | May 25, 2022

Inanunsiyo ng Department of Transportation (DOTr) ang pagpapalawig ng isa pang buwan ng libreng sakay sa Metro Rail Transit Line 3 (MRT3) ngayong Miyerkules.

Sa isang virtual press briefing, sinabi ni MRT3 general manager Mike Capati na ang mga pasahero ng railway line ay patuloy na masisiyahan dahil sa serbisyong free rides na hanggang Hunyo 30, anumang oras ng kanilang operating hours mula alas-4:40 ng umaga hanggang alas-10:10 ng gabi.

Matatandaang unang ipinatupad ang libreng sakay noong Marso 28 hanggang Abril 30 kasabay ng selebrasyon ng pagkumpleto ng rehabilitasyon ng MRT3. Na-extend pa ito hanggang katapusan naman ng Mayo upang makatulong na mabawasan ang financial burden ng mga commuters sa gitna ng pagtaas ng presyo ng petrolyo.

Ang pagpapalawig ng free rides ng MRT3 ayon kay Capati, “aims to continue helping commuters ease their financial burden amid inflation and rising fuel prices.” “This will allow the MRT3 to further test its capacity and performance in accommodating up to or more than 350,000 passengers,” saad pa niya.

Binanggit naman ni Capati na nakapag-record ang railway line ng 15,730,872 total ridership mula Marso 28 hanggang Mayo 24, na may average weekly ridership na 315,334. Nai-record din ng MRT3, ang kanilang pinakamataas na ridership na umabot sa 351,592 noong Mayo 20.

Ayon pa kay Capati, naka-set na ang four-car CKD trains na kayang mag-accommodate ng hanggang 1,576 pasahero na kanilang ide-deploy para madagdagan ang kapasidad nito, kumpara sa karaniwang three-car train sets lamang.