PhilHealth YAKAP na Handog ng Pangulo sa schools at LGUs sa September 14

by Info @Brand Zone | September 13, 2026

• 

Press Release No. 2025-23

Patuloy ang pagsusulong ni Pangulong Ferdinand R. Marcos Jr. na mas madaling maabot ng bawat Pilipino ang serbisyong pangkalusugan sa buong bansa sa pamamagitan ng Handog ng Pangulo (HNP). Bilang bahagi ng pagdiriwang na ito, dadalhin ng Department of Health (DOH) at PhilHealth ang YAKAP at iba pang serbisyong pangkalusugan sa mga paaralan at tanggapan sa buong bansa sa Setyembre 14, 2026. 

Sa tulong ng 257 Yakap Clinics at kanilang partner GAMOT Providers, maghahatid ang PhilHealth ng mga sumusunod na serbisyo sa lahat ng HNP sites: mga serbisyo para sa miyembro, pagpili at pagrehistro sa YAKAP, libreng konsulta, pagkuha ng libreng gamot sa GAMOT program, at tulong sa pagpaparehistro sa PSA. 

“Gusto naming dalhin ang YAKAP kung nasaan ang mga Pilipino. Pinagtutulungan namin ng DOH, sa ilalim ng Unified National Agenda for Health, ang kabuuang pangangalaga sa kalusugan sa mga paaralan, trabahuhan, at komunidad—kung saan may mga programa para maiwasan ang sakit at mayroon ding serbisyong pangkalusugan na agad na malalapitan,” pahayag ni PhilHealth Acting President at CEO Dr. Beverly Ho.

“Sa araw na ito, nais naming iparamdam ang uri ng serbisyo na aming pinagsisikapang ibigay. Dapat ganito kadali mag-access ng primary care services para sa lahat ng Pilipino.” 

Para sa karagdagang detalye tungkol sa mga lugar ng YAKAP na Handog ng Pangulo, maaaring tumawag sa 24/7 hotline ng PhilHealth sa (02) 8662-2588 o bisitahin ang opisyal na Facebook Page ng PhilHealth sa @PhilHealthOfficial.

• 

#SamasamangPagangatsaBagongPilipinas #naYAKAPnako #MalayoSaSakit #PhilHealthYAKAP

LGU, kailangan nang kumilos kontra-sugal

by Info @Editorial | December 10, 2025

Sa ilalim ng City Ordinance No. 26 s-2025, bawal na ang lahat ng billboards at signages tungkol sa pagsusugal sa buong Pasig.

Kasama sa mga bawal lagyan ng gambling ads ang mga public utility vehicles na regulated ng local government gaya ng tricycle, pedicab at PUV terminals. Bawal ding maglagay sa mga building sa anumang LED screens. 'Di na rin papayagan ang pamamahagi ng gambling ads sa mga leaflets, brochures at flyers.

Bagama't may mga hindi na sakop ng kapangyarihan ng LGU, lalo na kung national/online ang pinag-uusapan.

Masasabing dapat nang kumilos ang mga LGU laban sa lumalalang kaso ng pagkakalulong sa sugal. 

Hindi na bago ang balitang may mga taong nababaon sa utang, napapabayaan ang pamilya, at nasasangkot sa krimen dahil sa iba’t ibang anyo ng sugal—legal man o ilegal. Kung patuloy na manonood lamang ang LGU, sila mismo ang nagiging bahagi ng problema.

Malinaw ang mandato ng LGU, ang protektahan ang kapakanan ng mamamayan. 

Kayang higpitan ng LGU ang permit, inspeksyon at operasyon ng mga pasugalan—kailangan lang gawin at seryosohin.

Kaugnay nito, kailangan din ng mga programa para sa edukasyon, impormasyon at rehabilitasyon para sa mga nalulong sa sugal. Kung walang tulong, babalik at babalik lang ang problema.

Pagsugpo sa malnutrisyon, kailangan ng tulong ng LGUs

ni Kuya Win Gatchalian @Win Tayong Lahat | September 5, 2024

Isa sa ating isinusulong ang mas aktibong pakikilahok ng local government units (LGUs) sa pagsugpo ng malnutrisyon, kakulangan sa nutrisyon, at stunting, lalo na sa mga mahihirap na pamilya. 

Sinabi na noon ni Action for Economic Reform Executive Director Filomeno Sta. Ana III sa isang media briefing na kakailanganin ng pondong hindi bababa sa P40 bilyon upang itaas ang ayuda sa mga benepisyaryo ng Pantawid Pamilyang Pilipinong Program (4Ps) para masugpo ang malnutrisyon at makaagapay sa epekto ng mataas na presyo ng mga bilihin. 

Ayon sa isang pag-aaral ng Philippine Institute for Development Studies (PIDS), isa sa tatlong batang Pilipino na wala pang limang taong gulang ang stunted o maliit para sa kanilang edad. Binigyang-diin din ng pag-aaral ang pinsalang dulot ng stunting sa ekonomiya at pag-unlad ng bansa. Sa ulat ng UNICEF noong 2019, tinatayang umaabot sa P174.4 bilyon kada taon ang katumbas na pinsalang dulot ng stunting sa ekonomiya. 

Bukod sa kinakailangang sapat na pondo, nais kong bigyang-diin ang mahalagang papel ng mga LGU sa pagpapatupad ng mga programa para sa nutrisyon at feeding. Sa kanilang partisipasyon o aktibong pakikilahok, masusugpo natin ang malnutrisyon lalo na’t ang mga lokal na pamahalaan ang mas malapit sa ating mga kababayang nangangailangan ng tulong. 

Sa ilalim ng Basic Education and Early Childhood Care and Development Alignment Act (Senate Bill No. 2575) na inihain ng inyong lingkod, magiging responsable ang mga LGU sa pagpapatupad ng mga programa para sa early childhood care and development (ECCD) na saklaw ang kabuuan ng mga programang pangkalusugan, nutrisyon, early childhood education, at social services development upang tugunan ang pangangailangan ng mga batang wala pang limang taong gulang. 

Nakasaad sa nasabing panukala na dapat maglaan ang mga LGU ng pondo mula sa kanilang Special Education Fund at Gender and Development Fund para sa pagpapatupad ng mga programa sa ECCD. Kasama sa magiging responsibilidad ng mga LGU ang pagkamit ng universal coverage para sa National ECCD System, ang probisyon ng mga pasilidad at iba pang resources, ang paglikha ng plantilla positions para sa mga child development teacher at child development worker, at iba pa. 

Nakakabahalang maraming bata ang walang sigla dahil kulang sa masustansyang pagkain. Ang kanilang pisikal na kahinaan ay nagdudulot ng kawalan ng interes sa pag-aaral, hindi pagpasok sa eskwela, pagiging masakitin, kawalan ng ganang makipaglaro sa iba, at marami pang iba. 

Tulad sa ibang bansa, dapat magkaroon din tayo ng ganitong programa para matiyak na may sapat at masustansyang pagkain ang bawat mag-aaral. Bagama’t kakailanganin nito ng malaking pondo, hindi tayo titigil bilang chairman ng Senate Committee on Basic Education na gumawa ng paraan para maisakatuparan ito.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com