Target na makagawa ng 2.8 milyong trabaho ngayong 2021, matupad sana!

ni Leonida Bonifacio Sison - @Boses | February 7, 2021

Isang taon matapos pumutok ang COVID-19 pandemic, milyun-milyong manggagawa pa rin ang walang trabaho sa bansa.

Base sa October 2020 Labor Force Survey ng Philippine Statistics Authority, nasa 8.7% o 3.8 milyon ang unemployment rate sa bansa, na mas mababa sa 17.7% unemployment rate o 7.2 million jobless adults na naitala noong Abril 2020 kung kailan ipinatupad ang lockdown dahil sa COVID-19 pandemic.

Dahil dito, target ng pamahalaan na makalikha ng 2.4 hanggang 2.8 milyong trabaho ngayong taon bilang bahagi ng employment recovery strategy para maibsan ang naging epekto ng COVID-19 pandemic sa hanay ng mga manggagawa.

Noong Biyernes, pumirma sa joint memorandum circular (JMC) sa paglikha ng National Employment Recovery Strategy (NERS) Task Force ang iba’t ibang ahensiya ng gobyerno, kabilang ang Labor and Employment (DOLE), Trade and Industry (DTI), Transportation (DOTr), Tourism (DOT), Budget and Management (DBM), Education (DepEd), Interior and Local Government (DILG), Social Welfare and Development (DSWD), Science and Technology (DOST) at Technical Education and Skills Development Authority (TESDA).

Ang NERS ay isang medium-term plan na layuning makalikha ng mga trabaho.

Sa totoo lang, magandang balita ito para sa mga ordinaryong mamamayan na nawalan ng hanapbuhay, pero mas maganda kung mas maaga itong mapakikinabangan.

Sa kabila kasi ng mga tulong mula sa gobyerno, marami pa rin tayong kababayan na hirap makaraos sa araw-araw.

Gayunman, hangad natin na hindi lang ito maging target o pangarap lang dahil kailangang-kailangan ng ating mga kababayan ng hanapbuhay.

Isa pa, magtatapos ang unang batch ng mga mag-aaral sa K-12 program, kaya inaasahang madaragdagan ang puwersa ng mga manggagawa sa 2022 at mas maraming aplikante.

Kung magkakaroon ng sapat na trabaho para sa ating mga kababayan, dapat nating asahan na makakabawi ang sektor ng paggawa.

‘Yun nga lang, hintay-hintay muna, kaya panawagan sa mga kinauukulan, bilis-bilisan natin ang pagkilos.

At para naman sa ating mga kababayan, tiwala at tiyaga lang, magkakaroon din ng oportunidad.

‘Ika nga, sama-sama tayong babangon ngayong taon, kaya ‘wag tayong mawalan ng pag-asa.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Babalang sasampolan ang smugglers at hoarder ng agri products, seryosohin!

ni Leonida Bonifacio Sison - @Boses | February 6, 2021

Anumang panahon, tila walang pinalalampas ang mga nananamantala.

May pandemya man, ayaw paawat ng ilan nating kababayan.

At ngayong patuloy ang pagsirit ng presyo ng karneng baboy at manok, iniutos ni Pangulong Rodrigo Duterte na tugisin ang mga smuggler at hoarder ng agricultural products.

Ito ay upang mapigil ang patuloy na pagsirit ng karneng baboy ay manok.

Gayundin, inatasan ng pangulo ang Department of Trade and Industry (DTI) at Department of Agriculture (DA) na makipagtulungan sa iba’t ibang tagapagpatupad ng batas para tugisin ang mga nananamantala sa sitwasyon sa kabila ng COVID-19 pandemic.

Inaprubahan din ng pangulo ang rekomendasyon ng DA na bumuo ng isang sub-task group on economic intelligence para sa gagawing pagtugis sa mga smugglers at profitters.

Samantala, isusulong din ng DA ang pag-review ng Minimum Access Volume (MAV) o ang volume ng agricultural commodity na maaaring i-import na mas mababa ang buwis.

Sa dami ng problema ng bansa, dapat lang masampolan ang mga nananamantala, tulad ng mga smuggler at hoarder.

Hindi na nga sila nakakatulong, pahirap pa sa ordinaryong mamamayan.

Nakadidismaya dahil sa halip na piliing tumulong sa mga naghihikahos nating kababayan, hayan kayo at gumagawa pa ng kalokohan.

Sana ay magsilbing babala ito sa lahat ng nananamantala riyan na kahit kailan, hindi magiging tama ang ginagawa n’yo. At isa pa, tiyak na may kalalagyan din kayo.

Samantala, pakiusap sa mga awtoridad, tiyaking pananagutin ang dapat managot at walang makalalampas upang seryosohin ng ating mga kababayan ang bawat paalala at babala.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Sidewalk na ginawang parking, ‘di na nakatulong, sanhi pa ng aksidente!

ni Leonida Bonifacio Sison - @Boses | February 5, 2021

Imbes na daanan ng mga tao, naging paradahan ng tricycle ang mga sidewalk.

Ganito ang nangyari sa isang kalye sa Maynila, kaya naman halos sa gitna na ng kalsada naglalakad ang mga tao dahil may mga nakaharang sa bangketa.

Dahil dito, tumilapon ang isang 29-anyos na lalaki matapos mabundol ng humaharurot na SUV sa Maynila.

Base sa ulat, makikita sa CCTV footage na halos sa gitna ng kalsada naglalakad ang biktima at isa pang kasama nito dahil sa mga nakaparadang tricycle sa gilid ng kalye at iba pang nakaharang sa bangketa. Hindi nagtagal, nahagip ng SUV ang biktima, tumilapon at tumama pa ang katawan sa isang nakaparadang tricycle.

Gayunman, nanatili pa rin ang mga nakaharang sa gilid ng kalsada sa naturang kalye na kinabibilangan ng mga sasakyan at nagtitinda.

Bagama’t patuloy ang road clearing operation, kapansin-pansin ngang balik na naman ang mga nagtitinda at nakaparada sa sidewalk. Ang ending pala, sayang ang effort at oras ng mga naglinis ng kalsada.

Kaya’t panawagan sa mga kinauukulan, sana ay ipagpatuloy n’yo ang pagpapanatili ng kaayusan at kalinisan sa inyong nasasakupan. Hindi porke tapos na ang linisan sa inyong lugar, wa’ paki na kayo sa mga nagbabalikan sa kalye.

Hindi naman kasi magandang tingnan na malinis at maayos nga sa una, pero paglipas ng ilang araw o linggo, balik na naman sa dati. Ang masaklap pa, nagiging sanhi ito ng perhuwisyo sa ibang tao.

Pakiusap din sa taumbayan, ‘wag puro asa sa mga kinauukulan. Magkusa rin tayo dahil hindi sa lahat ng pagkakataon, kailangan pa tayong pagsabihan bago matauhan.

Tandaan na hindi lang ito para sa ating mga sarili kundi sa ating mga kababayan din. Kaya plis lang, maging bahagi tayo ng solusyon sa lahat ng pagkakataon.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com