Gobyerno, handa na sa pagbabakuna, ang taumbayan, ready na ba?!

ni Leonida Bonifacio Sison - @Boses | February 10, 2021

Malapit na malapit nang magkaroon ng bakuna kontra COVID-19.

At kasabay nito, tiniyak ng Malacañang na nakahanda na ang gobyerno sa gagawing pagbabakuna laban sa COVID-19 sa susunod na linggo.

Ayon kay Presidential Spokesperson Harry Roque, ang unang batch ng bakuna mula sa COVAX facility ay darating sa kalagitnaan ng Pebrero.

Dagdag pa ng tagapagsalita, maisasagawa agad ang pagbabakuna, isa o dalawang araw pagkatapos dumating ng suplay sa bansa.

Matatandaang, aabot sa 10 milyong doses ng COVID-19 vaccine ang makukuha ng Pilipinas sa COVAX facility sa unang quarter ng taon kabilang na ang 117,000 doses ng Pfizer vaccine, kung saan mauunahang mabakunahan ang mga health workers.

Ngayong alam na nating handa ang nasyonal na pamahalaan sa vaccination program, ang tanong, handa na ba ang mga babakunahan?

Habang tukoy na ng ilang lokal na pamahalaan kung sinu-sino ang mga prayoridad na maturukan sa kanilang nasasakupan, kumusta naman ang taumbayan? Lahat ba ng prayoridad maturukan ay handang magpaturok?

Sa ngayon, kailangan nating paigtingin pa ang malawakang pagbibigay ng impormasyon tungkol sa bakuna. Sa ganitong paraan kasi, mas makukuha natin ang tiwala ng publiko para mas maraming magpapaturok.

‘Ika nga, sa panahon ngayon, iwas-fake news tayo dahil hindi ito makatutulong.

Ang prayoridad natin ay matiyak na ligtas ang ating mga kababayan laban sa nakamamatay at hindi nakikitang kalaban.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Gumagawa at bumibili ng pekeng COVID-19 test result, dapat makulong!

ni Leonida Bonifacio Sison - @Boses | February 9, 2021

Mula nang kumalat ang pekeng COVID-19 swab test result, hindi na natapos ang mga ulat tungkol dito. Ito kasi ang requirement para makabalik sa trabaho o makapasok sa mga pasyalan.

At kamakailan, anim na residente ng Metro Manila ang hindi nakapasok sa Boracay matapos magpakita ng pekeng RT-PCR test certification at napag-alamang tatlo rito ang nagpositibo sa COVID-19.

Bago pa ito, dalawang turista ang inaresto rin sa Boracay matapos mapag-alamang peke ang ipinakitang resulta.

Dahil dito, inatasan ng Department of Interior and Local Government (DILG) ang Philippine National Police (PNP) na maging agresibo sa paghahanap sa mga indibidwal o grupo na namemeke ng COVID-19 swab test result.

Nais din ng ahensiya na arestuhin at kasuhan ng PNP ang mga gumagawa, maging ang mga may hawak ng pekeng swab test result.

Matatandaang sa ilalim ng Republic Act (RA) No. 11332 o Mandatory Reporting of Notifiable Disease and Health Events of Public Health Concern Act, maaaring pagmultahin ng P50,000 at makulong ng hindi bababa sa isang buwan at hindi lalampas ng anim na buwan ang lalabag.

Bilang mamamayan, tayo ay may obligasyon din para matigil ang pamemeke ng dokumento.

Oras na para maging responsable ang bawat isa sa atin dahil akala n’yo nakakalusot kayo, pero sa totoo lang, malaking problema ang dala n’yo, hindi lang sa inyong mga sarili kundi pati sa ibang tao.

Totoong mahal magpa-test, pero at least, alam n’yong negatibo kayo sa sakit.

Panawagan naman sa mga awtoridad, pakibilis-bilisan ang pagkilos dahil hangga’t may mga namemeke, hindi matitigil ang gawaing ito.

Kapag may naiulat na nameke ng dokumento, aksiyunan agad. ‘Wag nating hintayin na lalo pang dumami ang gumagawa nito bago tayo maghigpit.

At kayong mga namemeke, kayo ang isa sa mga dahilan kaya napakaraming pasaway. Wala na kayong nagawang maganda kontra pandemya, dinagdagan n’yo pa ang problema.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

“No parking” signages sa mga kalsada, kailangan na

ni Leonida Bonifacio Sison - @Boses | February 8, 2021

May isang linggo pa bago ang deadline ng Road Clearing 2.0.

Paspasan na ang paglilinis ng mga kalsada sa iba’t ibang panig ng bansa para matutukan na ng mga lokal na pamahalaan ang national vaccination program kontra COVID-19.

Dahil dito, bilang bahagi ng road clearing operations, hinikayat ng Department of the Interior and Local Government (DILG) ang lahat ng lokal na pamahalaan na maglagay ng “no parking” signs sa mga kalsada.

Ito ay para hindi na magbalikan pa ang mga sasakyang naitataboy sa ginagawang road clearing operations.

Kasabay nito, inatasan ng DILG ang Philippine National Police (PNP) na tumulong sa LGUs sa kanilang road clearing operation, lalo na kung may nakakaharap silang pasaway na residente.

Iminungkahi rin ng DILG na bigyan ng kapangyarihan ang mga towing services para mabilis na matanggal ang mga sasakyan na nakakasagabal sa mga kalsada at bangketa.

Matatandaang, noong nakaraang taon pa ipinatupad ang nasabing programa, na naglalayong linisin ang lahat ng nakahambalang sa mga kalsada.

Sa totoo lang, nakakalungkot dahil kailangan pang maglagay ng signages para lang mapigilan ang mga pasaway na gumarahe sa kalsada kahit dapat ay kusa na natin itong ginagawa.

Kunsabagay, ganyan naman talaga ang mga Pinoy, kailangan pang pukpukin bago matauhan.

Gayunman, natatandaan n’yo ba ang lalaking nahagip ng rumaragasang SUV dahil napilitang dumaan sa kalsada dahil sa mga nakaparadang tricycle sa sidewalk?

Sa insidenteng ito pa lang, dapat natuto na tayo. Kaya nga nililinis ang mga kalye ay para sa kaligtasan at kaayusan ng lugar at hindi para humanap ng panibagong sakit ng ulo.

Habang hinihimok ng DILG ang mga lokal na pamahalaan, tayong mamaayan ay may dapat ding gawin. Tandaan na kapag sinabing bawal, ‘wag nang pasaway. At isa pa, ang kalsada ay daanan at hindi garahe!

Utang na loob, kung hindi kayo magiging responsableng car owner at residente, ‘wag nang mag-kotse!

Samantala, para matiyak na lahat ay susunod at hindi tayo puro pananakot o babala lang, tiyaking lahat ng lalabag ay masasampolan.

At kayong mga barangay officials, responsible rin kayo sa kaayusan ng inyong lugar.

‘Ika nga, ‘wag puro asa sa mga nakatataas dahil imposibleng maging matagumpay ang operasyong ito kung may nag-iisang pasaway.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com