Colorum “pasabay service” pa-probinsiya, ‘di titigil hangga’t kaunti ang provincial bus

ni Leonida Bonifacio Sison - @Boses | February 13, 2021

Dahil nananatiling limitado ang mga bus na may biyaheng pa-probinsiya, marami tayong kababayan ang hirap humanap ng masasakyan.

Ang siste, kani-kanyang diskarte para makarating sa pupuntahan. Halimbawa ng mga pasaherong papuntang Tarlac, napipilitang bumaba sa bayan ng Dau sa Pampanga at doon maghahanap ng ibang masasakyan dahil Pampanga na lang ang natirang probinsiya na may biyahe sa Araneta City Bus Station sa Quezon City, na kilala sa malayong ruta sa southern Luzon at Visayas.

Ang iba naman, sa social media naghahanap ng masasakyan mula sa mga colorum, habang ang iba, may alok pang sasagutin na rin ang travel documents ng biyahero.

Gayunman, depende sa layo ang presyo, pero mas mahal ito kaysa sa pagsakay ng bus at sa labas ng bus station at paligid ng isang mall ang meet-up location, bagay na ikinabahala naman ng manager ng bus station.

Aniya, ginagamit pa umano ang istasyon para gawing pick-up point kaya sa halip na tumuloy ang pashero, nahahatak ng mga ito.

Gayunman, habang tuluy-tuloy ang panghuhuli sa mga colorum na sasakyan, umapela ang Provincial Bus Operators of the Philippines (PBOAP) na payagan silang magbukas ng linya at kasabay nito ang pangako na susunod sila sa health protocols.

Matatandaang higit kalahati pa lang ang ruta ng mga provincial bus na nakakabiyahe ngayon kumpara noong bago ang lockdown noong Marso, 2020.

Pinaplano ng Land Transportation Franchising and Regulatory Board (LTFRB) kung paano mapabibilis ang proseso ng pagbubukas ng linya, pero nakasalalay pa rin umano sa LGU ang pagtanggap ng mga provincial bus mula sa Kamaynilaan.

Kung tutuusin, no choice lang naman ang mga tumatangkilik ng pasabay services na ito, kaya pakiusap natin sa mga kinauukulan, pakibilis-bilisan ang paghanap ng solusyon. Mahirap kasi ‘yung puro tayo pagbabawal at panghuhuli pero wala naman tayong ginagawang paraan para matigil ang ganitong gawain.

Ang ending niyan, mamamayan ang gagawa ng paraan para makabiyahe kahit alam nilang bawal.

Kung gusto nating maisaayos ang ganitong bagay, pag-aralang mabuti kung ano ang mga dapat at hindi dapat ipatupad. Gayundin, panawagan sa mga lokal na pamahalaan, makiisa tayo at magkaroon ng konsiderasyon para sa ating mga kababayan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Pag-aayos kuno ng mga kalsada, tiyaking safe sa mga motorista!

ni Leonida Bonifacio Sison - @Boses | February 12, 2021

Sugat ang inabot ng isang rider nang sumemplang at sumubsob matapos lumusot sa siwang ng drainage ang gulong ng kanyang motorsiklo sa Tondo, Maynila.

Sa CCTV footage, makikitang mistulang nagsirko ang rider at muntik pang madaganan ng sarili niyang motor at masalpok ng kasunod na isa pang rider.

Tila sandali pang nawalan ng malay ang naaksidenteng rider nang sinubukan siyang ibangon ng mga nakasaksi sa insidente.

Ini-report naman sa barangay ang insidente at agad na nagpaliwanag ang kapitan.

Aniya, hindi pa tapos ang naturang bahagi ng kalsada, pero tinanggal agad ang barrier, ngunit pagkatapos ng insidente, ibinalik din ang harang sa drainage.

Kung may inaayos sa kalsada, tiyaking hindi ito magiging perhuwisyo sa mga dumaraan.

Ang hirap kasi sa atin, panay tayo tingin sa mga “road worthy” na sasakyan, pero ang mga kalye, worth it bang daanan?

Habang papalapit ang deadline ng road clearing operations sa bansa, tiyakin nating malinis at ligtas ang kalye sa mga kababayan, lalo na sa mga motorista. Baka kasi nag-aayos kuno tayo, pero puro aksidente pala ang nangyayari.

Sana ay magsilbing aral ang insidenteng ito sa lahat na maging maingat tayo sa mga ginagawa natin, lalo na kung may epekto ito sa mga motorista.

Bagama’t hindi naiiwasan ang aksidente sa kalsada, maaari itong mabawasan kung magiging mas maingat tayo.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Mga ipinatutupad na polisiya, hakbang kontra pandemya at hindi raket!

ni Leonida Bonifacio Sison - @Boses | February 11, 2021

Matapos umani ng iba’t ibang reaksiyon at opinyon ang polisiya ng Land Transportation Office (LTO) na mandatory na pagsusuot ng facemask ng mga motorista sa pribadong sasakyan, pinal na itong ipatutupad sa bansa bilang hakbang umano sa lalo pang pagkalat ng COVID-19.

Matatandaang maraming tumutol na motorista at maging ang ilang mambabatas ay nagpahayag din ng kani-kanilang opinyon hinggil sa polisiya.

Ayon sa ilang motorista, dagdag-gastos lang sa facemask, lalo na kung magkakasama naman sa bahay ang mga pasahero.

Samantala, kinuwestiyon ng ilang kongresista ang naturang polisiya at giit ng isang mambabatas, magiging pagkakataon lamang ito sa mga tiwaling traffic officers para mangotong sa mga motorista.

Bukod pa rito, pinuna rin ng mambabatas ang violation na ipapataw sa mga motorista na hindi susunod sa naturang polisiya, bagay na sinagot naman ng opisyal ng LTO at sinabing maituturing na reckless driving ang hindi pagsuot ng facemask.

Bagama’t iginigiit ng mambabatas na hindi nakasaad sa batas na reckless driving ang hindi pagsusuot ng facemask, naninindigan ang opisyal na nailalagay sa alanganin ang kalusugan ng mga pasahero kung hindi magsusuot ng facemask ang drayber at iba pang kasama nito.

Sa totoo lang, may punto naman ang mambabatas dahil malamang, may ilang tiwaling enforcer na mananamantala sa kautusang ito.

Kung noon nga, napakaraming nagkalat na nangongotong sa kalsada, ngayon pa kaya na marami silang rason para manghuli?

‘Ika nga, ang polisiyang ito ay hakbang kontra pandemya at hindi paraan upang magkaroon kayo ng bagong raket.

Kaya para maiwasan ang kotongan, pakiusap sa mga kinauukulan, tiyaking matitinong enforcer ang magbabantay sa mga kalsada at motorista. ‘Wag hayaang magkalat sa kalye ang mga buwaya!

May pandemya na nga at hirap makaraos sa araw-araw ang ating mga kababayan, peperahan n’yo pa. Tandaan, ang pandemya ay dapat tugunan upang matuldukan at hindi dapat gawing paraan para maghanap ng pagkakaperahan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com