Mga hakbang ng gobyerno vs. COVID-19, tiyaking final bago ianunsiyo

ni Leonida Bonifacio Sison - @Boses | January 27, 2021

Binawi ni Pangulong Rodrigo Duterte ang naunang desisyon ng Inter-Agency Task Force (IATF) na pinapayagang makalabas ng bahay ang mga batang nasa edad 10 hanggang 14.

Ito ay dahil nababahala ang Pangulo na matamaan ng COVID-19 ang mga bata, lalo pa’t kumalat ang bagong variant ng COVID-19 na mula sa UK.

Samantala, hindi pabor ang 17 mayors sa Metro Manila na payagang makalabas ang mga bata, gayundin ang pagluluwag ng quarantine restrictions sa lungsod.

Matatandaang sa naunang desisyon ng IATF, maaari nang makalabas ng bahay ang mga nasa edad 10 hanggang 65 sa mga lugar na nasa ilalim ng modified general community quarantine (MGCQ).

Kung tutuusin, katanggap-tanggap naman ang pagbawi ng Pangulo sa naunang desisyon ng IATF, pero sa totoo lang, nakadidismaya dahil parang ang gulo-gulo.

Dahil dito, ang panawagan natin sa mga kinauukulan, sa susunod na magbababa kayo ng desisyon o kautusan, sana ‘yung final na.

Ang hirap naman kasi kung mag-aanunsiyo tayo, tapos ilang araw ay babawiin din. Ang ending, nalilito ang taumbayan at hindi na alam kung kanino susunod, gayundin, marami ang hindi nagseseryoso. At kapag may lumabag o nagkamali, taumbayan na naman ang tatawaging pasaway.

Kaya upang maiwasan ang mga ganitong eksena, maging maingat tayo sa bawat desisyon o hakbang. Kumbaga, pag-isipang mabuti kung talaga bang ipatutupad o hindi, bago ipaalam sa publiko.

Ngayong malinaw na bawal talagang lumabas ang mga bata, utang na loob, ‘wag na tayong pasaway.

Tayong mga magulang ang responsable sa ating mga anak. Tulad ng palagi nating sinasabi, ipaliwanag sa mga bata ang kahalagahan ng pananatili sa tahanan sa gitna ng pandemya.

At higit sa lahat, tayo ang magsilbing ehemplo sa kabataan para seryosohin ang mga hakbang kontra COVID-19.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Patuloy na pagtaas ng presyo ng bilihin, tugunan, now na!

ni Leonida Bonifacio Sison - @Boses | January 26, 2021

Kamakailan, dinig na dinig natin ang daing ng mga ordinaryong mamamayan dahil sa patuloy na pagtaas ng bilihin.

Matatandaang humirit pa nga ng taas-sahod ang ilang grupo dahil kung magpapatuloy nga naman ang pagtaas ng bilihin at mananatiling mababa ang sahod ng mga manggagawa, ano pang mabibili ng kakarampot na perang ito?

Bukod pa rito, taas-presyo na rin ang lutong ulam sa mga karinderya dahil giit ng mga nagtitinda, rekado pa lang, umaabot na sa libo ang kanilang pamalengke. ‘Yung iba naman, hindi na nagbebenta ng putaheng may baboy o baka dahil baka hindi rin maibenta ‘pag mataas ang presyo.

Dahil dito, pinag-uusapan na ng mga alkalde ng National Capital Region (NCR) ang mga gagawing hakbang para makontrol ang patuloy na pagtaas ng mga bilihin sa mga palengke, ayon kay Metro Manila mayors’ council chairman Edwin Olivarez.

Dagdag pa ng opisyal, kasalukuyan silang nakikipag-ugnayan sa Department of Agriculture (DA) at Department of Trade and Industry (DTI) para makontrol ang mga mega-market at nagbabagsak ng mga bilihin.

Sa totoo lang, kailangang-kailangan nang masolusyunan ang nagtataasang presyo ng bilihin dahil kawawa ang taumbayan.

‘Yung tipong, pinipilit nilang makaraos sa araw-araw, pero pahirap nang pahirap ang buhay.

Oras na magkaroon ng kasunduan sa pagkontrol ng presyo ng bilihin, kasunod na hamon nito ay ang pagmomonitor kung talagang nasusunod ang tamang presyo.

Kaya panawagan din sa mga kinauukulan, tiyaking may plano tayo para matiyak na mapapanatili ang presyo at hindi ito maaabuso.

Hangad nating masolusyunan ito sa lalong madaling panahon. Sobrang dami nang problema na kinahaharap ng bansa, lalo na ang mga ordinaryong mamamayan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

MGCQ sa M. Mla, ‘wag ipilit kung ‘di pa talaga kaya

ni Leonida Bonifacio Sison - @Boses | January 25, 2021

Naninindigan ang tagapagsalita ng National Task Force against COVID-19 na hindi nararapat ilipat ang Metro Manila sa mas maluwag na quarantine restrictions pagdating ng Pebrero.

Ito ay dahil pa rin sa pagdami ng mga kaso ng COVID-19 sa bansa matapos ang Kapaskuhan, kabilang ang mga kaso ng bago at mas nakahahawang variant ng sakit.

Paliwanag ng tagapagsalita, tingin niya na dapat pang manatili ang kasalukuyang quarantine restrictions hanggang sa gumanda ang datos ng mga kaso sa Metro Manila, na episentro ng COVID-19 sa bansa.

Matatandaang, kamakailan ay niluwagan na ang age restrictions sa mga lugar na nasa ilalim ng modified general community quarantine (MGCQ) para payagang lumabas ang mga batang may edad 10 pataas. Kasabay nito, hinikayat ng gobyerno ang mga lugar na naka-general community quarantine (GCQ) na luwagan na rin ang kanilang age restrictions bilang tulong sa ekonomiya.

Sa totoo lang, kung sitwasyon sa Metro Manila ang titingnan, talagang hindi pa puwede. Sa halip na magluwag, mas mahigpit na implementasyon ang ating kailangan.

Kung noong mga nakaraang buwan ay dedma sa health standards ang ilang establisimyento at pampublikong mga sasakyan at terminal, ngayon ay kapansin-pansing todo-effort na rin ang ilan na makasunod dahil na rin sa kautusan ng mga lokal na pamahalaan.

Tayong mamamayan naman, magkusa na tayong sumunod at ‘wag nang maghintay ng utos dahil para naman ito sa ating kaligtasan.

Gayundin, hangad nating mabawasan ang mga batang pagala-gala, kaya panawagan sa mga magulang, bantayan ang mga bagets at ipaliwanag ang kahalagahan ng pananatili sa tahanan sa gitna ng pandemya. At siyempre, bilang mga magulang, tayo ang dapat maging ehemplo sa ating mga anak.

‘Ika nga, ‘wag nating madaliin ang mga bagay-bagay dahil mas oks maghintay at magtiis kesa naman madagdagan pa ang ating mga problema.

Tandaan nating hindi pa tapos ang ating laban kontra pandemya, kaya dapat pairalin ang ating pang-unawa at disiplina sa lahat ng pagkakataon bilang tulong sa ating gobyerno.

At pakiusap sa mga kinauukulan, pag-aralang mabuti ang sitwasyon bago tayo magdesisyon dahil ang bawat hakbang na ginagawa natin ay may malaking epekto sa taumbayan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com