Driver ng SUV na bumundol sa guwardiya ng mall, tukoy na; hearing sa Hunyo 7 — LTO

ni Lolet Abania | June 6, 2022

Nag-isyu na ang Land Transportation Office-National Capital Region (LTO-NCR) ngayong Lunes ng umaga ng isang show cause order laban sa driver ng SUV na sangkot sa hit-and-run ng isang guwardiya ng mall sa Mandaluyong City na naganap nitong Linggo ng hapon.

Ito ang kinumpirma ni LTO-NCR Regional Director Atty. Clarence Guinto sa isang radio interview, kung saan aniya, naitakda ang hearing sa Martes, Hunyo 7.

“We scheduled the hearing this week and hopefully the driver and the owner would appear in the hearing. We are, of course, observing due process, ‘yung notice of hearing,” sabi ni Guinto.

Nagpapagaling naman ang biktimang security guard na si Christian Joseph Floralde sa ospital sa Mandaluyong matapos na ma-hit and run ng isang SUV habang nagdi-direct ito ng trapiko.

Unang sinabi ng Mandaluyong Police na isang White Toyota RAV 4 na may plate number NCO 3781 ang sangkot sa insidente ng hit-and-run, na naganap bandang alas-4:00 ng hapon nitong Linggo sa intersection ng Julio Vargas Avenue at St. Francis St. sa Mandaluyong, at subject para sa validation ng LTO.

Hindi naman pinangalanan ni Guinto ang suspek na driver ng SUV dahil aniya sa Data Privacy Law, subalit sinabi niyang isa itong Pilipino. Gayundin, dinedetermina pa ng LTO kung ang driver ay siya ring may-ari ng sasakyan.

Pinasalamatan naman ni Guinto, ang mga netizens na nag-upload ng video ng naturang insidente. Ayon kay Guinto, ang pinakamataas na penalty na maaaring maibigay ng LTO laban sa suspek na driver ay revocation ng driver’s license nito.

“May isang high resolution video cam na na-identify ‘yung plate number so we were able to get the details in our system ng kung sino ang may-ari ng motor vehicle na ‘yun,” sabi ni Guinto.

Ayon naman kay Mandaluyong Police chief Col. Gauvin Unos, ang driver ng SUV na bumundol at sumagasa pa sa guwardiya ng mall, kung saan nakuhanan din ng video ang insidente at nag-viral sa social media ay posibleng sampahan umano ng kasong frustrated murder.

Samantala, sinabi ng partner ni Floralde na si Arceli Flores, nahihirapan umano ang biktima na huminga dahil sa tinamong pinsala sa gitnang bahagi ng kanyang katawan.

Kasalukuyang binigyan ang biktima ng oxygen support, habang nagtamo rin ng mga sugat sa kanyang ulo.

50% passenger capacity, nilabag... Mga PUVs, huli sa overloading – LTO

ni Lolet Abania | October 24, 2021

Ipinahayag ng Land Transportation Office (LTO) na marami silang na-penalized na mga public transport vehicles dahil sa nabigong sumunod ang mga drivers sa ipinatutupad na 50% passenger capacity sa kanilang sasakyan sa gitna ng COVID-19 pandemic.

“Marami kaming nahuli, overloading ang charge namin niyan kasi 50% lang ang pinapayagan,” ani Land Transportation Office deputy director for law enforcement na si Roberto Valera sa isang interview ngayong Linggo.

Pinag-iisipan naman ng Department of Transportation (DOTr) na magdagdag ng mga passenger capacity sa mga public utility vehicles (PUVs).

Subalit anila, ikokonsulta muna nila ito sa mga eksperto upang matulungan sila sa kanilang panukala. Patungkol naman sa plano ng LTO hinggil sa mga colorum na mga sasakyan na may tinted windows, ayon kay Valera, mag-iisyu sila ng guidelines tungkol dito subalit hindi na nagbigay pa ng ibang detalye.

“’Yung tinted kasi mayroon na kaming ano, may EO na kami nagawa niyan. For signature na po,” sabi ni Valera.

Sinabi pa ni Valera na nakapagsagawa na rin sila ng drug testing sa mahigit 8,000 public transport drivers sa Metro Manila upang masiguro ang kaligtasan ng mga mamamayan.

Sa naturang bilang, 100 ang nagpositibo sa test at dinala na ang mga ito sa mga rehabilitation centers para na rin maiwasan ang aksidente.

Solo sa sasakyan, oks nang walang mask

ni Lolet Abania | February 3, 2021

Nilinaw ng Land Transportation Office (LTO) na hindi nila huhulihin o pagmumultahin ang mga pasaherong nakasakay sa isang sasakyan nang walang suot na face mask, magkasama man o hindi sa bahay.

Bagama’t, ayon kay LTO chief, Transportation Assistant Secretary Edgar Galvante, pinag-aaralan na ng Inter-Agency Task Force on COVID-19 (IATF) at Department of Health (DOH) ang nasabing polisiya.

“Pero pansamantala po kung kayo ay masisita hindi naman pagmumultahin agad o whatever. Ipaliliwanag lang ang kahalagahan ng pag-observe ng protocol,” ani Galvante.

Matatandaang sa isang radio interview kahapon, binanggit ni LTO Director Clarence Guinto na ang mga pasahero na nasa loob ng pribado o pampublikong sasakyan ay kinakailangang magsuot ng face mask upang maprotektahan ang sarili laban sa COVID-19.

Ayon kay Guinto, ang mga lalabag na may-ari ng mga private vehicles ay papatawan ng P2,000 multa habang sa mga public vehicle violators ay P5,000.

Samantala, ipinahayag ni Cabinet Secretary Karlo Nograles na ang mga drivers na nag-iisa sa kanilang sasakyan ay hindi na kailangan pang magsuot ng mask habang nagmamaneho.

Ayon kay Nograles, co-chairperson ng IATF, naglabas na ng advisory ang DOH patungkol dito at sinasabing, “those driving alone may remove their masks while inside their vehicle." "I think that is only logical; if there is no one in the vehicle with you, you cannot infect anyone else,” ani Nograles.