Malinaw ayon sa palad… PAGRE-RESIGN, DAAN PARA MAKAPANGIBANG-BANSA AT MAGKAROON NG MALAKING SUWELDO

ni Maestro Honorio Ong @Kapalaran Ayon Sa Palad | August 1, 2024

KATANUNGAN

1. Nagtatrabaho ako ngayon bilang isang call center. Kaya lang, naliliitan ako sa aking suweldo. Bukod sa palagi na akong puyat, malayo pa ang inuuwian ko. 

2. Balak ko nang mag-resign at lumipat sa ibang company na may mataas na offer. Kung sakaling lilipat ako, papalarin naman kaya ako? Marami sa mga kasamahan ko ang lumipat na sa ibang kumpanya, naiinggit ako sa kanila dahil ang laki na ng sinusuweldo nila.

3. Maestro, dapat ba akong lumipat o magtiyaga na lang ako sa kasalukuyan kong kumpanya at hintayin ko na lang na taasan nila ang suweldo ko tutal gamay ko na ang trabaho ko rito?

KASAGUTAN

1. Tama ang iniisip mo, pera-pera lang ang labanan sa panahon ngayon. Kaya Cherry, mas mainam ngang lumipat ka na sa ibang kumpanya na magbibigay sa iyo ng mas malaking suweldo, kaysa sa kasalukuyan mong kumpanya na maliit lang ang suweldo. 

2. Tunay ngang sa paglipat mo, paniguradong mas magiging maganda ang future mo, lalo na sa aspetong pampinansyal. Ito ang nais sabihin ng nagbago, pero makapal na Fate Line o tinatawag din nating Career Line (Drawing A. at B. F-F arrow a. at b.) sa kaliwa at kanan mong palad.

3. Tulad ng nasabi na, tama ang iniisip mong paglipat sa ibang kumpanya kung sadyang mababa ang sinusuweldo mo sa kasalukuyan. Kung mas maganda ang offer sa ibang kumpanya, roon ka mas uunlad at aasenso.

4. Ang pag-aanalisang mas uunlad ka sa ibang kumpanya ay madali namang kinumpirma ng destiny number mong 1 na nagsasabing habang hindi mo pa natatagpuan ang makatarungang suweldo na gusto mong itapat sa ginagawa mong paglilingkod, magpalipat-lipat ka, hanggang sa suwertehin at umasenso ka. Kung ang mapapasukan mong bagong kumpanya ay may kulay dilaw, berde o kaya’y itim na logo. Sa nasabing kumpanya, tataas at lolobo ng doble-doble ang iyong suweldo, at mas mabilis kang uunlad at aasenso. Kung saan, mabibili mo na ang halos lahat ng luho, gusto mong bilin, at may tsansa ka pang makapag-ipon.

DAPAT GAWIN

1. Ayon sa iyong mga datos, Cherry, siguraduhin mo munang tanggap ka na sa lilipatan mong kumpanya bago ka mag-resign. Sa ganitong paraan, kahit na nag-resign ka, hindi ka mawawalan ng trabaho at hindi ka mababakante. Sa halip, tuluy-tuloy pa rin ang iyong suweldo.

2. Habang ayon sa malawak at malinaw na Travel Line (Drawing A. at B. t-t arrow c.) sa kaliwa at kanan mong palad, bukod sa tataas na iyong suweldo, magkakaroon ka pa ng pagkakataon na makapangibang-bansa, kaya lalo mo pang ma-e-enjoy ang iyong trabaho. Kung saan, nadagdagan na ang iyong suweldo, nakapag-abroad ka pa ng libre. Ang nasabing suwerte at magandang kapalarang nabanggit ay nakatakdang mangyari sa susunod na taong 2025 sa edad mong 31 pataas. 

Palad ni Inday, may hatid na suwerte sa ibang bansa

ni Maestro Honorio Ong @Kapalaran Ayon Sa Palad | July 30, 2024

KATANUNGAN

1. Gusto ko nang umalis sa kasalukuyan kong trabaho. Maliit na nga ang suweldo, masungit pa ang mga amo ko.

2. Kaya naman agad akong napaisip na kung sakaling aalis ako rito, may mapapasukan pa kaya akong mas maganda at mas malaking suweldo? 

3. Nagdadalawang isip kasi akong umalis dahil baka mapabilang lang ako sa mga taong walang trabaho, at ‘yun ang dahilan kaya naisipan kong kumunsulta sa inyo upang ipaanalisa ang aking kapalaran, lalo na pagdating sa aking career. Kung sakaling umalis ako rito, makakahanap pa kaya ako ng magandang trabaho? 

KASAGUTAN

1. Kung dito ka lang sa Pilipinas magtatrabaho at kabilang ka sa isang tipikal o pangkaraniwang empleyado, kahit tumuwad ka pa wala kang magagawa sa maliit mong suweldo dahil sobrang liit naman talaga ng suweldo rito sa ating bansa. Tulad ng nasabi na kahit tumuwad ka pa riyan sa kinauupuan mo, hindi ka talaga aasenso rito.

2. Sa halip, ganito ang nais ipagawa ng iyong kapalaran. Mas mabuting mag-abroad ka para mas madali kang umasenso. Ito ang nais sabihin ng maaliwalas, makapal, maganda at malawak na Travel Line (Drawing A. at B. t-t arrow a.) sa kaliwa at kanan mong palad.

3. Tanda na kung aalis ka lang sa kasalukuyan mong kumpanya dahil maliit kamo ang iyong suweldo at pagkatapos ay sa isa na namang kuripot na kumpanya ka lilipat ng trabaho, eh ‘di balewala rin ang gagawin mong paglipat dahil karamihan sa mga kumpanya rito sa ating bansa ay puro kuripot.

4. Kaya ang nais sabihin ng malinaw na Travel Line (Drawing A. at B. t-t arrow a.) sa kaliwa at kanan mong palad na kinumpirma ng iyong lagda na umaalun-alon na animo’y nagtatangkang lumipad at umangat paitaas, wala rito sa ating bansa ang magandang kapalaran mo, bagkus nasa pangingibang-bansa upang mas suwertehin at umasenso ka.

DAPAT GAWIN

Ayon sa iyong mga datos, Donna, kung susubukan mo na mag-apply sa abroad, sa buwan ng Nobyembre o Disyembre, pinakamatagal na sa susunod na taon, tiyak ang magaganap, may isang mabunga at mabiyayang pangingibang-bansa ang itatala sa iyong karanasan na magiging daan o simula upang tuluy-tuloy kang umunlad at umasenso.

Kelot na iniwan dahil sa pagbi-vape, sure na babalikan

ni Maestro Honorio Ong @Kapalaran Ayon Sa Palad | July 23, 2024

KATANUNGAN

1. Two weeks na kaming hiwalay ng ex-gf ko dahil nahuli niya akong nagbi-vape. Agad akong humingi ng pasensya sa kanya, pero mula noon, hindi niya na ako kinibo.

2. Pumunta ako sa bahay nila para dalawin siya, na regular ko namang ginagawa, pero hindi siya nagpakita sa akin. Ayon sa kapatid niya,  umalis daw siya.

3. Tine-text at tinatawagan ko siya, pero hindi siya sumasagot at madalas naka-off pa ang cellphone niya. Ang isa ko pang pinoproblema, binlock na rin niya ako sa Facebook. 

4. Maestro, ano ba ang dapat kong gawin? Mahal na mahal ko siya, at ayokong tuluyan kaming magkahiwalay. Kung ako lang ang masusunod, siya na ang gusto kong makatuluyan. Sa katunayan, nag-iipon na ako para sa aming kinabukasan. Sa palagay n’yo, magiging okey pa kaya ang aming relasyon?

KASAGUTAN 

1. Dahil medyo maliit na dahilan lang naman pala ang pinag-awayan n’yo, ang nangyayari sa inyo ngayon ay isa lamang lover’s quarrel. Kumbaga, para lamang kayong naglalambingang ibon sa puno ng mangga, mapapansin mo ‘yung dalawang ibon ay nagtutukaan, habang tumatakbo, at palipat-lipat naman sa sanga ‘yung isang ibon. Kunwaring umiiwas lang ‘yung isang ibon, pero sa katunayan, nagpapatuka at nagpapaabot naman talaga siya. Ganundin ang nangyayari sa inyo ngayon ng girlfriend mo, matapos magkunwaring nagtatampuhan, tiyak na magkakabati rin kayo, at muling magtutukaan.

2. Kung tutuusin, ‘di naman talaga galit sa iyo ang girlfriend mo, dahil sure akong mahal na mahal ka lang niya. Ang totoo pa nga nito, kung siya lang ang masusunod ikaw din ang gusto niyang mapangasawa. Ang isang matibay na ebidensiya o patunay ay ang pagiging mahigpit niya sa iyo, lalo na pagdating sa pagbi-vape. Ibig sabihin, concern lang siya sa health mo, pero kung maitatanong mo naman kung bakit siya concern sa kalusugan mo? Simple lang ang sagot, concern siya sa iyo dahil mahal ka niya, at ayaw niyang magkasakit o maaga kang mawala.

3. Kaya ayon sa kaisa-isa mong Marriage Line (Drawing A. at B. 1-M arrow a.) sa kaliwa at kanan mong palad, kung wala ka namang ginagawa sa inyo, mas maiging pasyalan mo siya, at kapag nawala na ang asar niya sa iyo, muli ka niyang tatanggapin at patatawarin.

DAPAT GAWIN

Habang ayon sa iyong mga datos, Jacob, anuman ang mangyari ang kaisa-isang malinaw at makapal na Marriage Line (1-M arrow a.) mo pa rin ang mananaig. Simula ngayong Hulyo hanggang Agosto, magkakabati na rin kayo ng girlfriend mo hanggang sa bandang huli, kayo na rin ang magkatuluyan na nakatakdang magsama sa pagbuo ng isang simple, pero maligayang pamilya habambuhay.