AFP, PNP at DSWD, dapat maging mas ready sa 'The Big One'

ni Ka Ambo @Bistado | June 19, 2023

NAGKAKASUNUD-SUNOD na ang paglindol.

Dapat nang paghandaan ang “The Big One” lalo na ng mga nakatira sa matatayog na gusali sa Makati at Taguig.

---$$$---

MODERNO na ang bisinidad sa dalawang siyudad kung saan nakokontra na nila ang negatibong epekto ng bagyo at baha, pero makontra kaya nila ang “The Big One’?

Kapag kasi dumating ang magnitude 8 earthquake, maging ang mga rescuer sa bisinidad kasama na ang city hall — ay mapapasama sa mga “biktima”.

Pwedeng sumaklolo ang “biktima” sa “biktima” rin?

Maselan.

---$$$---

SA totoo lang, walang pinakaepektibong gamit sa panahon ng malakas na lindol kundi ang helicopter.

May sapat bang bilang ng helicopter ang Armed Forces of the Philippines (AFP), Philippine National Police (PNP) o Department of Social Welfare and Development (DSWD)?

Malungkot ang sagot: Wala.

---$$$---

HINDI pa rin maka-move on ang ilang residente kaugnay ng kontrobersyal na agawan ng teritoryo ng Makati at Taguig.

Ito ay sa kabila na nagdesisyon ang Korte Suprema.

---$$$---

KAKAUNTI lang ang tunay na nakakaunawa sa isyu partikular ang pagpasok sa Entry of Judgment ng naturang desisyon.

Kapag naipasok na sa Entry of Judgment ang desisyon, hindi na ito pwedeng iapela o irebisa.

---$$$---

SA kabila nito, dapat pa rin nating unawain ang personal na opinyon at emosyon ng mga apektadong mamamayan.

Hindi biro kasi na baguhin ang address at iba pang official document ng mga residente ng apektadong barangay na ang dating “address” ay Makati, pero biglang magiging “Taguig”.

---$$$---

GANYAN din sa mga negosyante at mismo sa ordinaryong mamamayan na nakikinabang sa benepisyo mula sa Makati City Hall.

Ibig sabihin, apektado ang “yellow card” na ginagamit sa pag-claim ng benepisyo sa Makati.

---$$$---

APEKTADO ng desisyon ang 729 ektaryang Fort Bonifacio Military Reservation kabilang ang Bonifacio Global City (BGC) at ang mga “embo barangays”.

Sa isang media survey, nagtanong kung ano ang sentimyento ng dating “Makati citizen” na magiging taga-Taguig at marami ang nalulungkot.

---$$$---

KASI’Y isinilang sila na taga-Makati, pero magiging taga-Taguig sila sa simpleng desisyon.

Ayon sa isang vendor, pabor sila du’n para mabago ang administrasyon ng barangay nila.

Nilinaw naman ni Alicia Esguerra, 1982 pa siya residente ng Makati, malungkot pero dapat sundin ang hukuman.

---$$$---

“Pagdating sa benefits na nakukuha namin sa Makati, naniniwala ako na pagdating ng araw ay makukuha din namin sa Taguig, ang request lang namin sa mayor ng Taguig ay kung ano ang ginagawa ng Makati ay gawin nila,” sabi ni Esguerra.

Para sa driver na si Margarito Solis mainam din na masubukan ang pamamahala ng Taguig.

---$$$---

NOONG Abril 3, inilabas ang desisyon sa 30 taong boundary dispute kung saan mas binigyang bigat ang historical, documentary at testimonial evidences na iprinisinta ng Taguig.

Dapat nang mag-move-on ang lahat at tanggapin na ang desisyon na nakapundasyon sa teknikal na aspekto ng isyu.

Pinag-aagawang bgy. ng Makati at Taguig, tinapos na ng SC

ni Ka Ambo @Bistado | June 10, 2023

Hindi lang kelot o bebot ang pinag-aagawan ngayon.

Kundi ang teritoryo ng mga barangay, pero pumagitna naman ang hukuman.

***

NAGDESISYON na ang Korte Suprema na nasa ilalim na ng pamamahala ng Taguig ang siyam na barangay na inaagaw ng Makati City.

Pero tulad sa love triangle sa mga nobela, hindi maka-move on ang Lungsod ng Makati.

***

KUNG tutuusin, dahil nagdesisyon mismo ang Korte Suprema, malinaw na tapos na ang laban.

Pero dahil mismo sa modernong “marites” na social media, hindi pa rin tapos ang patutsadahan.

***

NAGKALAT kasi ang fake news at propaganda sa social media.

Kumalat sa Facebook ang isang post na diumano’y kausap ng alkalde ng Makati ang Pangulo, First Lady, at ang Punong Mahistrado upang buksan muli ang kaso.

Dahil d'yan, mula sa hukuman, ang isyu ay maghuhunos bilang “political issue”.

***

NAGNGINGITNGIT naman ang mga netizen sa post na ito.

Bukod sa fake news, tila kinukwestyon nito ang disposisyon ng Korte Suprema.

***

Sinasabing nagsalita sa isang video ang alkalde ng Makati na mayroon pa raw silang ilalaban sa kasong ito.

Pinadalhan sila ng sulat ng Korte Suprema na magkakaroon pa ng hearing tungkol sa naturang usapin.

***

NILINAW mismo ng tagapagsalita ng Korte Suprema na si Atty. Brian Keith Hosaka ang isyu.

“I have no information about this. The SC-PIO (Public Information Office) will immediately post any notices on the SC website and official Twitter account should we receive any,” wika ni Hosaka.

***

SINABI rin sa pahayag ng officials ng Taguig na walang anumang update na natanggap mula sa korte.

May kakaiba talagang impluwensya ang social media, hindi na malaman natin ngayon kung alin ang totoo at alin ang palsipikado.

***

ANU’T anuman, dapat nating igalang ang desisyon ng hukuman.

Hindi rin natin dapat idamay sa “marites” ang mga tao sa Malacañang. Period!

***

LUMALALA ang giyera ng Russia at Ukraine.

Tulad sa Makati at Taguig, 'yan naman ang “royal rumble” ng mga bansa.

Kasi, nakikisali ang US at NATO na nagpapalala ng sitwasyon.

***

IBINABALA na ang panganib sa nuclear war dahil may mga aksyon na sinasalakay na rin ang loob ng teritoryo ng Russia.

Kapag ganyan, damay-damay na ang lahat.

***

NILINAW ni P-BBM na walang nababago sa relasyon ng Pilipinas at China.

Malaki ang tama niya.

***

ANG nababago lamang kasi ay ang impresyon batay sa nababasa sa media.

Dahil sa social media, maraming impresyon ang itinutulak na mula sa palsipikadong impormasyon.

Mag-ingat.

Mga ‘Marites’, todo-bantay sa balasahan sa gabinete

ni Ka Ambo @Bistado | May 12, 2023

IBINABALA na ng Department of Energy (DOE) ang posibleng kakapusan sa suplay ng kuryente.

Pero, marami nang lalawigan ang nakakaranas ng “beerhouse lights” o halos araw-araw na brownout.

◘◘◘

BONGGA si Pangulong Bongbong Marcos Jr. (P-BBM) dahil matapos makipagkita kay U.S.

President Joe Biden ay dumalo at nakipag-meet naman kay King Charles ng Britain.

Matapos ito, dumiretso siya sa Indonesia para makasalamuha ang iba pang lider ng mga bansa.

◘◘◘

HALOS mamatay sa inggit ang mga kalabang mortal ng mga Marcos.

Hindi sila makapaniwala na nakabalik ang mga Marcos sa Malacañang sa isang ‘landslide win’. He-he-he!

◘◘◘

PAGKABALIK ni P-BBM, nag-abiso ito ng malawakang balasahan sa gabinete sa buong burukrasya.

Ninenerbiyos na ang mga gumagamit ng kanyang pangalan para makadiskarte, tsk!

◘◘◘

ISANG maselang ahensya ang binabantayan ng mga ‘Marites’ at ito ay ang Aduana.

Regular na tinatamaan ng balasahan ang Customs. Bilyun-bilyong piso kasi ang diskartehan d’yan—ilegal at legal.

◘◘◘

PERO, sino ang isang imina-Marites na opisyal ng Aduana na nakatalaga sa Mindanao at nagpapakilalang kanang kamay ng isang malapit sa Malacañang?

Iniyayabang ng kolokoy na siya ang may hawak sa buong Mindanao, gayung nakatalaga siya sa Region 10. Ano ba ‘yan?

◘◘◘

IBIG sabihin, pumupostura ang kumag na siya lamang daw ang dapat kausapin sa mga transaksyon sa mga importers at brokers.

Siyempre, parinig ito sa mga pusakal na mga ismagler.

◘◘◘

HIGIT pa siya sa kamandag ng ‘Batang Quiapo’ dahil iniyayabang na untouchable siya at hindi matitinag ng anumang reklamo o kaso.

Malalaman natin ‘yan kapag nagsimula na ang balasahan ni P-BBM next month.

◘◘◘

ANG maselan, may ‘sey’ siya sa balasahan at kung sinu-sino ang masisibak at maipupuwesto.

Huh, tipong siya rin ang utak ng ‘Iron Heart.’

◘◘◘

AYON sa ‘tiktik’, palagi siyang may kasamang mga ismagler at importer sa malalaking restobar sa Mindanao.

Ilan sa dabarkads niya ay may kaduda-dudang personalidad sa panahon ng nakaraang administrasyon.

◘◘◘

BATAY sa impormasyon ng ‘tiktik’, nagkalat ang ukay-ukay sa Mindanao dahil sa transaksyon ng mga kolokoy.

Matapos ang inabisong balasahan ni P-BBM sa Hunyo, matanggal o ma-promote pa kaya ang bida sa ‘Iron Heart’? Makakalbo kayo sa kakaisip kung sino ang kolokoy.