Iran, Saudi Arabia, Syria at Russia, ‘pag sumawsaw sa giyera sa Israel, ‘wag sana maging mitsa ng Wo

ni Ka Ambo @Bistado | October 21, 2023

ITINETENGGA ng Israel ang banta ng paglusob ng ground troops sa Gaza City.

Pumapalag kasi ang mga Arab nations na sumusuporta sa Hamas.

---$$$---

MALI ang opinyon at propaganda ng ilan na hindi gaanong apektado ang Pilipinas ng naturang digmaan ng Israel at Hamas.

Mali rin ang ginagamit na terminong “terorismo o terorista” sa paglalarawan sa Hamas na isang paksyon ng Palestine.

---$$$---

ANG maling gamit ng mga termino na kinopya sa international press -- nagpapalabo ng larawan sa naturang digmaan.

Ibig sabihin, ang media ay dapat na patas na naglalarawan ng sitwasyon imbes na magpagamit o mangopya ng propaganda ng isang panig.

---$$$---

MAHALAGANG maunawaan ng ordinaryong mamamayan ang tunay na sitwasyon upang sila ay magkaroon ng epektibong desisyon pabor sa kanilang sarili o pamilya.

Tulad sa Ukraine-Russia war, inilalabas sa international press na natatalo ang Russia sa naturang digmaan, gayong nasakop nila ang malaking bahagi ng Ukraine at hindi pa rin sila nababakbak doon.

---$$$---

MAHABA pa ang Ukraine-Russia at marami ang naniniwala na tatagal din ang Israel-Palestine war.

Apektado ang Pilipinas ng Israel-Palestine war dahil ang international headquarter ng Hamas ay nasa Qatar.

---$$$---

KAPWA ang Qatar at Iran ay lantarang sumusuporta sa Hamas.

Kapag nilusob ng Israel ang Gaza, maaaring sumalakay na rin ang Hezbollah kung saan panibagong front ang Lebanon-Israel war.

---$$$---

SENTRO rin ng merkado ng langis ang Qatar kaya’t apektado ang suplay ng petrolyo at LNG sa buong daigdig.

Hindi dapat maglihim ang mga awtoridad sa tunay na sitwasyon — ang kredibilidad ng gobyerno ang nakataya rito.

---$$$---

PINAKAGRABE ay kapag sumawsaw ang Iran at Saudi Arabia kasama ang Syria at Russia.

Marami ang nagdarasal na hindi sana ito maging mitsa ng Ikatlong Digmaang Pandaigdig.

Hindi ba madadamay dito ang Pilipinas?

---$$$---

WALANG mahusay o epektibong tagapagsalita ang Malacañang para maipaunawa sa taumbayan ang tunay na sitwasyon sa Middle East at Europe.

Pinalalala ito ng mala-Marites na pag-eksena ng away ng Pilipinas at China sa West Philippine Sea.

Lumang isyu na iyan pero bakit ikinokrus pa sa digmaang nagaganap sa Israel at Ukraine?

---$$$---

IMBES na pahupain ang gulo at ingay, delikadong nerbiyos at espekulasyon ang naghahari sa social media dahil sa lihis at walang patumanggang paglalabas ng walang kabuluhang ulat.

Tsk, tsk, tsk.

Israel-Palestine war kakaiba, kasi panahon pa nina David at Goliath

ni Ka Ambo @Bistado | October 20, 2023

SINUSPINDE muna ni P-BBM ang implementasyon ng Maharlika Fund.

Malaki ang tama niya.

---$$$---

KAPAG kasi pabalugbog ang pag-iral ng Maharlika Fund, mabubunton ang sisi kay P-BBM.

Karaniwan kasi, hindi ang mismong pangulo ang corrupt, bagkus ay ang mga ayudante.

Tama o mali?

---$$$---

GUMAGRABE na ang sitwasyon sa Israel at Gaza.

Pinasabog ang isang ospital sa Gaza at may 500 katao ang patay.

Nagtuturuan kung sino ang suspek.

---$$$---

KUMPARA sa Ukraine-Russia war, kakaiba ang Israel-Palestine war.

Panahon pa ito nina David at Goliath.

---$$$---

IDEOLOHIYA ang tunggalian dito.

Pero ayon sa international press, ito ay laban sa mga terorista.

Iyan mismo ang dahilan kung bakit — hindi matatapos ang digmaan.

---$$$---

MASELAN ang isyu dahil nakaugat ang problema sa panahon pa ng istorya sa Bibliya.

Meaning, isang Haring Solomon lamang ang makakalutas.

Dahil malabong magkaroon ng bagong “Haring Solomon”, masyadong malabo rin ang solusyon.

---$$$---

DAPAT ay nakapokus ang Pilipinas sa negatibong epekto ng giyera ng Israel at Palestine, imbes na ipropaganda na “walang gaanong epekto” ito sa bansa.

Siyempre, walang gaanong epekto ito sa Pilipinas, sa NGAYON.

Pero, sa mga susunod na buwan, paano nila sasabihin na walang gaanong epekto?

---$$$---

IMBES na Haring Solomon ang makaapekto ng desisyon ng gobyerno, tipong mga “pinabili lang ng suka” ang naglalabas ng dispalinghadong propaganda.

Nakakaawa ang bansa.

---$$$---

TUMATAAS na ang presyo ng mga pagkaing pamasko at iba pang bilihin.

Normal ba o abnormal?

Ang sagot ay malinaw na NORMAL.

---$$$---

MAHINA ang kukote ng mga nagkokomentaryo at maging ng media.

Ibinabalita nila na tipong hindi normal ang pagtaas ng presyo kapag magpapasko.

Ipinaaalala natin: Iyan ay epekto ng Law of Supply and Demand.

---$$$---

NORMAL ang sitwasyon sa Pilipinas, hindi dapat maglabas ng cash incentives ang gobyerno — dadambungin lang ‘yan.

Dapat ay maging kalmante ang lahat — at maging ang pamahalaan.

---$$$---

ANG tunay na abnormal na sitwasyon at may krisis — ay ang Ukraine at Gaza Strip.

Iyan ang dapat ninyong pag-isipan.

Iwasan nating maging Ukraine o maging Gaza.

Wala sanang bansa na sasalakay o mambobomba sa ating bansa.

Israel-Palestine war, mas delikado kesa Russia-Ukraine war

ni Ka Ambo @Bistado | October 18, 2023

PAPASUKIN na ng ground troops ng Israel ang Gaza Strip.

Ere na ang aktuwal na giyera.

---$$$---

TALIWAS sa paniniwala ng ilan, higit na delikado ang Israel-Palestine War kaysa sa Russia-Ukraine war.

Anumang araw ay puwedeng maging grabe ang sitwasyon.

---$$$---

MAGHANDA dapat ang lahat sa panibagong krisis.

Mandatory evacuation na ang iniutos sa mga OFW na naiipit sa digmaan.

---$$$---

SA Pilipinas, lalong gagrabe ang krisis sa ekonomiya.

Malinaw na apektado na naman ang mga estudyante.

---$$$---

NAGBABALA ang ilang eksperto na posibleng magsarado ang ilang private schools sakaling maging batas ang “No Permit, No Exam Policy ban”.

Iyan kasi ang pinagdedebatehan sa bicameral ng Kongreso.

---$$$---

MADIDISKARIL ang financial flow ng ilang pribadong eskwelahan na naka-survive sa lockdown.

Malinaw na hindi ito ang solusyon.

---$$$---

ALAM naman natin na hindi naman libre ang tuition sa pribadong paaralan.

May gastusin din at gugulin ang pribadong negosyo tulad ng mga private school.

---$$$---

DAPAT ang gawing batas ay paglalaan ng subsidy sa student o eskwelahan para bayaran ang matrikula ng mga “walang pambayad”.

Pero, ang pagbawalan sa proseso ng paniningil ay “paglabag ito sa Konstitusyon” para makapag-operate nang maayos at malaya ang mga negosyo.

---$$$---

HINDI dapat diktahan ng gobyerno ang private school lalo pa’t lehitimo naman ang sinisingil na matrikula.

Kung “overbill”, puwede — pero kung maayos naman ang singil, bakit sasagkaan ng gobyerno ang proseso?

Kakapusin sa operating expenses ang mga private school kapag ipinatupad ang pagbabawal sa “No Permit, No Exam Policy”.

---$$$---

BATAY sa pag-aaral ng Philippine Association of Colleges and Universities, mauubusan ng pondo ang mga private school sa loob lang ng dalawang buwan sakaling ipatupad ang panukala.

Ipagpapaliban kasi ang pagbabayad ng matrikula.

Hindi naman inililiban ang utility bills tulad sa konsumo ng elektrisidad, tubig, internet at pasuweldo sa personnel.

---$$$---

MASASAKLOLOHAN ba ng gobyerno kapag nawalan ng trabaho ang mga titser at personnel sakaling mabangkarote ang eskwelahan?

Iyan ang dapat isabay na batas, saklolohan ang pribadong eskwelahan na naka-enroll ang mga mahihirap.

---$$$---

DAPAT ay ilipat ang mga walang pambayad o bigyan ng prayoridad sa enrollment sa public school.

Pero, kapag nag-enroll sa private school, ibig sabihin, dapat nilang igalang ang proseso ng paniningil na isa nang tradisyon.

---$$$---

HINDI ba sapat na mayroon namang installment plan at alternative payment scheme ang mga private school para sa kanilang mga estudyante?

Matagal nang ginagawa ang sistemang ito.

---$$$---

DAPAT ay ang pagpapalawak pa ng voucher system sa mga private school ang ipatupad.

Magkaroon ito ng inobasyon.

Ganu’n lang kasimple.