Kampanya mainit na, mabawasan naman sana ang kaliwa’t kanang patayan

ni Ka Ambo @Bistado | Apr. 25, 2025

Paulit-ulit nating binabanggit sa espasyong ito ang kahalagahan ng pagkakaroon ng disposisyon.

Ang tunay na lider ay dapat may kakayahang magdesisyon -- anuman ang mga epekto nito sa personal niyang buhay at buhay ng malalapit sa kanya.

----$$$---

SA aktuwal, iyan mismo ang isyu sa Pasig City dahil tila hindi makapagdesisyon si Mayor Vico Sotto upang madisiplina ang mga miyembro ng city council.

Maaaring umiiwas siya na mapintasan o magtampo ang ilan niyang kagrupo.

Pero, paano naman ang kanyang mga nasasakupan?

----$$$--

SA totoo lang, mahirap maging lider at siyempre, anuman ang batikos, mahirap ang maging pulitiko.

Kumbaga, sala-sa-init, sala-sa-lamig.

Walang masusulingan — kundi ang magdesisyon.

----$$$--

HINIHILING ng mga residente ng Pasig kay Mayor Vico na kausapin at disiplinahin ang ilang miyembro ng Konseho sa siyudad.

Napapagitna kasi sa ilang kontrobersiya ang ilang opisyal ng siyudad.

----$$$--

ILAN sa mga tinutukoy dito ay kagrupo ni Sotto pero negatibo ang impresyon sa kanila ng mga residente dahil maaskad na ugali at pagkilos.

“Mayor Vico Sotto, bilang isang lider, responsibilidad mo na tiyakin na ang iyong mga kasamahan sa Konseho ay magpakita ng disiplina at respeto. Kailangan ng iyong mga konsehal ng disiplina,” payo ni  Artana sa isang post sa Facebook na “Tatak Pasig.”

----$$$--

NABABAHALA kasi ang ilang residente na maaaring maging grabe ang sitwasyon lalo pa’t nasa katindihan ng kampanyahan.

Kumbaga, kailangan nang ipakita ni Mayor Vico ang kanyang sariling disposisyon — sinuman ang maapektuhan.

----$$$--

MAY sapat pang araw bago mag-eleksyon para maiayos ang kontrobersiya sa Konseho.

Anumang desisyon at aksyon ay papabor sa lahat ng panig partikular sa mga residente ng Pasig.

Tama, malaking tama — kung may desisyon at disposisyon ang mga lider.

----$$$--

Maiinit na ang kampanya.

Sana ay mabawasan na ang kaliwa’t kanang patayan kaugnay ng eleksyon.

Disiplina at moralidad talaga ang kailangan.

----$$$---

SA kasaysayan, ngayon lamang may pinakamainit na labanan sa senatorial race at party list system.

Nagmistulang buwelo ito sa nakatakdang impeachment trial kay VP Sara.

----$$$--

KUMBAGA, preview ang resulta ng senatorial election sa magiging hatol at proseso sa impeachment court.

Kapag mas marami ang anti-VP Sara sa mananalong senador — masisibak siya.

Pero, kapag naging mayorya ng miyembro ng Senado — ay maka-VP Sara — malinaw na absuwelto siya.

Iyan ang ibig sabihin na “ang impeachment” ay isa ring “political exercise” — at hindi isang aktuwal na hukuman.

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.

Taktika ng gobyerno na magpakalat ng “PR”, malaking kabulastugan

ni Ka Ambo @Bistado | Apr. 22, 2025

Damang-dama ang epekto ng POGO.

Kaliwa’t kanan ang krimen na dawit ang POGO operations partikular sa serye ng mga kidnapping.

----$$$--

PERO, ayon naman sa mga taxi driver at ilang negosyante — matumal ang pasok ng cash dahil nawala ang mga galanteng pasahero na nagtatrabaho sa POGO.

Partikular dito ang mga taxi driver na umiikut-ikot sa Pasay, Parañaque, Las Piñas, Makati at ilang siyudad sa Metro Manila.

-----$$$--

IBIG sabihin, may katotohanan na ang krimen na kakambal ng POGO operations.

Pero, hindi rin maikakaila na may negatibong epekto ito sa ekonomiya.

----$$$--

NAPAKARAMING condominiums, malalaking gusali at mga rental units ang bakante sa maraming lugar na malapit sa POGO operations.

Maraming negosyo ang tumumal.

----$$$---

NAPAKAHIRAP maging lider, hindi natin malaman kung titimbangin ang negatibo at positibong dala ng POGO.

Sa ngayon, mas nakikita ang negatibong epekto ng POGO — at dapat nating igalang ang desisyon ng mga otoridad.

----$$$--

SA kabilang panig, hindi lamang desisyon sa pagsasarado ang dapat ipatupad, bagkus ang implementasyon ng mga programang makakatulong sa mga nakakaranas ng negatibong epekto ng desisyon.

Kung bilyun-bilyong piso ang nawala sa merkado, ibig sabihin, bilyung-bilyong piso ang malulugi sa ilang negosyo — malalaki man o maliliit.

-----$$$--

ITIM ang ginagamit na kulay ni Sen. Imee upang makumbinse ang mga nakakaranas ng negatibong buhay na pumabor sa kanyang kandidatura.

Hindi lang kasi kawalan ng trabaho ang laganap, bagkus ay kriminalidad bunga ng pagdarahop — laganap na pagbabalik ng mga adik at pusher.

----$$$--

WALANG kongkretong programa kundi man, kapos sa publisidad ang gobyerno at pulisya kaugnay ng pagkontra sa kriminalidad.

May listahan ba ang PNP ng mga pusher at adik na nagbalik sa kalye?

---$$$--

Ilan ang naaaresto araw-araw?

Ilan ang ipinapasok na adik sa rehabilitasyon araw-araw?

Bakit walang ganyang datos na inilalabas ang PNP?

----$$$--

KUNG tama ang PNP na mag-update ng kanilang aktibidad sa publiko — bakit walang regular update ang Malacañang laban sa krimen at drug addiction?

Consistent at constant dapat ang labas ng updates sa social media at mainstream media.

----$$$--

Sistema at iskema ang kailangan ng Malacañang at PNP upang matabunan o madaig ang black propaganda ng mga kalaban ng gobyerno.

Dapat ay praktisado at beteranong media practitioner na may “wisdom” ang kailangan ng Malacañang at makatuwang ng PNP sa “media war”.

Hindi puwedeng press-release laban sa “fake news”.

----$$$--

GASGAS na ang ganyang katwiran kontra sa fake news.

Ang paglaban sa pagbaha ng fake news ay “real news” at hindi propaganda -- mga balita --bistadong press release.

----$$$--

BAGO matalo ang fake news, dapat ay maunawaan muna ang pagkakaiba ng “press release” at “real news”.

Nagkakaiba ito sa “structure” kung paano nailatag o nai-compose ang teksto.

----$$$--

ANG taktika ng gobyerno ay magpakalat ng “press release” na isinulat sa porma ng propaganda.

Napakalaking kabulastugan.

----$$$--

SAYANG ang pondo ng gobyerno sa press release.

Sa totoo lang, walang kredibilidad at hindi pinaniniwalaan ang press release.

----$$$--

KAPAG nailabas sa mainstream media ang press release, mapagkakamalang “bayad ang writer, editor at publisher” — kahit hindi totoo at tumutulong lang ang mga ito sa mga “kaibigan” kuno.

Kasabay nito, kapag inilabas sa social media ang “PR” mula sa gobyerno, mapagkakamalang “trolls” ang mga nag-post, nag-like, nag-comment at nag-share.

-----$$$--

DISPALINGHADONG porma ng teksto at konteksto ng “good news” ang ugat ng problema.

Batikang editor ang may kakayahang mag-compose o mag-convert mula sa PR release tungo sa “hard news” bago pakawalan sa mainstream media at socmed.

----$$$--

HINDI kuwalipikado at kapos sa karanasan sa paggawa ng “matinong balita” ang mga naitatalaga sa gobyerno.

Ang resulta, nadadaig sila ng pinaniniwalaan nilang “fake news”.

 ----$$$-

LUMANG tugtugin ang fake news — mula pa ‘yan sa panahon ng Ninos Inocentes.

Hindi lang ang Pilipinas ang may ganyang problema, maging ang buong mundo — partikular sa panahon ni Hitler.

----$$$--

ILAN ba ang naitalaga sa Malacañang na may “wisdom” upang makatuwang ni PBBM?

Ang sagot diyan — ay sagot din kung paano lalabanan ang “fake news” — na pinagdidiskitahan nila.

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.

Araw-araw Pasko, kapag panahon ng eleksyon

ni Ka Ambo @Bistado | Apr. 17, 2025

Kaliwa’t kanan ang black propaganda ng iba’t ibang kandidato at grupo.

Iyan na mismo ang normal.

----$$$--

HINDI nakaligtas ang Pasig City sa ganitong modus kaya’t nagbabangayan.

Hindi maawat ‘yan ng Comelec.

----$$$--

NILINAW naman na walang katotohanan ang ulat na may naganap umano na pang-aabuso sa isang PWD sa Pasig.

Itinanggi rin na sinadyang siraan ang kandidatura ni Pasig Mayor Vico Sotto ng kampo ng kanyang karibal na si Sarah Discaya.

 ----$$$--

NAG-UGAT ang alingasngas nang mainterbyu ng isang vlogger ang isa sa mga nakapila para makakuha ng bigas mula sa “Team Kaya This” ni Discaya.

Napag-alamang isang PWD ang nakapanayam ng vlogger pero ito ay biglaan at walang nakadiktang pahayag.

 ----$$$--

ISANG residente na alyas Ronnel ang isa rin sa nakapila at nainterbyu ng vlogger ay nagpapatotoo na hindi pinilit o pinuwersa ang PWD para magbigay ng opinyon.

Ayon kay Ronnel, kusang loob na pumayag ang babae na ma-interview ng isang lalaking vlogger.

-----$$$--

“WALA naman pong pamimilit eh. Ako po, tinanong din ako kung puwede akong interview. Marami kaming nandu’n na tinanong kung puwede kaming interview. Hindi po ako naniniwala na may sapilitan na nangyari,” wika ni Ronnel sa isang panayam sa online news.

Unang tinanong ng vlogger kung may SGC ID sila — isang identification card na ipinapamahagi ng “Team Kaya This” upang makakuha ng benepisyo tulad ng libreng serbisyong medikal at pagpapagamot sa ospital.

 ---$$$--

IPINAHAYAG ni Ronnel ang kanyang kalungkutan na binabatikos si Discaya dahil sa kanyang serbisyo-publiko, sa halip na pasalamatan sa pagtulong sa mahihirap at mga kapus-palad na pamilya sa Pasig.

Hindi rin siya naniniwalang si Discaya at ang kanyang partido ang nasa likod ng kampanya upang siraan si Sotto, dahil mismong mga anak ni Sarah ay PWD din.

“May anak din si Ate Sarah na PWD. Napakalabong gamitin ni Ate Sarah ang ganu’ng sistema na napakaruming pulitika,” aniya pa.

----$$$---

SINABI naman ng “Team Kaya This” na handa silang makipagtulungan sa isinasagawang imbestigasyon kaugnay ng insidente, at mariing itinanggi ang alegasyon na sila ang nasa likod ng umano’y propaganda laban kay Sotto.

Hinimok ni Ronnel ang kanyang kapwa Pasigueño na huwag basta-basta manira kina Discaya o sa sinumang tumutulong sa mga nangangailangan.

 ---$$$--

HINDI lang sa Pasig City, may ganyang senaryo na hanggang sa eleksyon sa Mayo.

Napapaaga ang Pasko dahil sa kaliwa’t kanang regalo mula sa mga kandidato.

 ----$$$--

KUMBAGA, tanggap-tanggap lang ng biyaya pero siyempre malaya pa ring iboto ang kursunada.

Nililinaw nating “sikreto” ang pagsusulat sa balota at malayang piliin kung sino ang tinitibok ng inyong puso.

Iyan po ang tunay na biyaya ng demokrasya — araw-araw mistulang Pasko — kahit Semana Santa.

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.