Tulad ni Binay, Pacquiao nakabitin din sa Senate Magic 12

ni Ka Ambo @Bistado | May 7, 2025

Nakasalaksak sa laylayan ng resulta sa senatorial survey si 8-division boxing champion Manny Pacquiao.

Sa totoo lang, tatlong dekada nang lihim na tumutulong si Pacquiao sa mga nangangailangan.

Pero, bakit hindi ito napapansin ng mga botante?

----$$$--

NAGPATAYO rin si Pacquiao ng sarili niyang housing project para sa mga nagdarahop.

Sa aktuwal, binansagan itong Pacman Village sa Sarangani.

----$$$--

MAY mga iskolar si Pacquiao bukod pa sa pagsuporta nang todo sa mga sports activities lalo na sa larangan ng boxing.

Ayon kay PBBM, si Pacquiao ang “Ninong ng Bayan”.

----$$$--

MAY 12 batas na ang naisagawa ni Pacquiao pero ang pinakamalaking bahagi ng kanyang buhay ay ang pagiging maka-Diyos.

May wagas na pananampalataya si Pacquiao sa Dakilang Lumikha at may respeto sa karapatan ng bawat tao — diyan siya hahatulan ng mga botante.

-----$$$--

TULAD ni Pacquiao, nakabitin din sa Senate Magic 12 si Makati City Mayor Abby Binay.

Nadiskaril siya sa isyu ng pagsasarado ng mga pasilidad sa tinatawag na EMBO barangays.

-----$$$---

MATAPOS mailabas ang desisyon ng Supreme Court na naglilipat ng hurisdiksyon ng Makati sa 10 EMBO barangays sa Taguig, nakakabahala ang mga naging hakbang ni Mayor Binay hinggil sa kapakanan ng mga apektadong residente.

Biglang isinarado ang mga health center at ibang pampublikong pasilidad sa lugar kaya nalagay sa alanganin ang higit 200,000 residente.

----$$$--

BAGAMAN kumplikado ang isyu sa hurisdiksyon pero dapat tiyakin ng mga opisyal na hindi makakaranas ng negatibong sitwasyon ang mga residente.

Sa halip, ang naging desisyon ni Mayor Binay ay ipasara ang mga pasilidad at nawalan ng konsiderasyon sa mga mamamayan at binigyan ng prayoridad ang isyung pulitikal.

----$$$--

PINALALA ang sitwasyon dahil din sa pamumulitika sa karibal na siyudad ng Taguig.

Si Rep. Pammy Zamora, kinatawan ng ikalawang distrito ng Taguig -- na ngayon ay kinabibilangan na ng ilang EMBO barangays -- ay kilalang kritiko ng administrasyong Duterte.

----$$$--

NAGTATAKA ang mga nagmamasid dahil nakikipag-alyansa naman siya kay Binay na isang maka-Marcos.

Malinaw na naiipit ngayon ang mga residente ng mga EMBO barangay dahil sa bangayan ng mga pulitiko.

----$$$--

ILANG araw na lamang ay halalan na, dapat ay mag-isip-isip nang mabuti ang mga taga-EMBO.

Suriin mabuti ang kaliskis at desisyon ng kanilang mga lider -- upang hindi sila magsisi sa huli.

---$$$--

KAILANGAN natin ng tapat, malinaw, at serbisyong nakatuon sa kapakanan ng bawat mamamayan.

Sa panahon ng pagbabago, dapat manatiling nakasentro sa kapakanan ng tao ang bawat hakbang ng pamahalaan.

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.

Sa ayaw o gusto natin, may ‘Duterte factor’ na sa kampanyahan

ni Ka Ambo @Bistado | May 6, 2025

Maselan ang senatorial election ngayon, kasi’y hindi lamang plataporma at popularidad ang pinagbabatayan ng opinyon at desisyon, bagkus ay ang mabibigat na isyu sa paligid.

Sa ayaw o sa gusto natin, mayroon nang tinatawag na “Duterte factor” sa kampanyahan.

----$$$--

NAG-UGAT ito sa pagsasampa ng impeachment complaint laban kay VP Sara at kasunod ang pag-aresto sa Pilipinas at pagdadala sa ICC kay Digong.

Iyan mismo ay nakakaapekto sa kampanya at pagboto.

-----$$$--

ISANG aktuwal na halimbawa dito ay ang pagkuyog ng ilang tila pro-Duterte netizens laban kay Makati Mayor Abby Binay sa social media.

Sinopla kasi ni Binay si Vice President Sara Duterte hinggil sa pagbatikos laban sa pamamahagi ng P20 kada kilong bigas sa Kabisayaan sa kabila ng ipinagbabawal ng Comelec.

----$$$--

MAAARING nagpapakaloyal si Binay kay PBBM at Alyansa na ang ibig sabihin ay tiyak na wala siyang boto na mahihigop mula sa mga maka-Duterte.

Sa post ng news website na Politiko, natunghayan ang maraming comments ng netizens na inuupakan si Abby.

Aabot sa 113 comments, 166 reaksyon at tatlong shares na karamihan ay nanghihikayat na huwag si Binay bilang tugon sa pagbatikos kay VP Sara.

----$$$--

SA isang press conference na inilathala ng Politiko na sinipi si Binay: “Sasabihin mo ba sa mga tao, ‘after the election na lang ha, doon ko lang ibibigay ‘yung murang bigas kasi sasabihin na namumulitika ako.’ Hindi naman po ganoon ang trabaho ng gobyerno. Kung maibibigay mo na ngayon, ibigay mo na. Hindi mo puwedeng sabihin na, ‘O, mag-aantay ako ng magandang timing’.”

Malinaw naman ang pahayag ni Binay, pero diyan siya mismo hahatulan ng mga botante.

----$$$--

PERO, hindi ito pinalampas ng ilan na tila supporters ni Duterte na nasasalamin sa pagsusuri ng 3RD_AI_ na makababawas sa tsansa ni Binay na makapasok sa Magic 12 dahil lamang sa pagbatikos sa ibang political figure tulad ni Duterte.

Tumutugma rin ang sitwasyon sa pagdedeklara ng “no vote” kay Mayor Abby sa pag-aanalisa ng 3RD-AI_ na malaki ang posibilidad na malaglag ang alkalde sa Magic 12 na nakapuwesto ika-11-14 ng winning circle.

----$$$--

HINDI lamang ang national election ang apektado ng social media kundi maging ang mga local candidate.

Mahalagang maunawaan ito ng publiko at maging ng Comelec.

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.

Makati Mayor Binay, imbes makapasok, mas nakikitang laglag sa Senate Magic 12

ni Ka Ambo @Bistado | May 3, 2025

Pinagpipiyestahan ng mga netizen ngayon ay ang talamak na paggamit ng artificial intelligence o AI sa pag-aanalisa ng anumang problema.

Dahil eleksyon, isang grupo ang nag-eksperimento na ipaanalisa ang nagaganap na senatorial race sa Pilipinas.

----$$$--

Walang problema sa unahan dahil kung ang tatlong kandidato ay palaging nakaaangat sa iba’t ibang survey — ay halos “on-the-bag” na ang Senado.

Pero, ang pinakamaselan ay ang mga nasa laylayan o puwitan — ang No. 12 at No. 13.

---$$$--

Sa pag-aanalisa ng AI ng 3RDEY3 (@3RD_AI_) na naka-post sa X, may malaking porsyento na hindi makakasampa si Makati Mayor Abby Binay sa inaasam na Magic 12 sa Senado taliwas sa kanyang inaasahan.

Ibig sabihin, imbes na makapasok, mas nakikita ay ang paglaglag ni Binay.

----$$$---

AYON sa post ng 3RD_AI_, naitala ang tsansa ni Abby sa ika-11 hanggang ika-14 puwesto sa Magic 12 kaya puwede siyang malaglag sa ika-13 hanggang ika-14 puwesto sakaling lumakas ang kalaban nito.

Siyempre, nakabatay ang panalo ni Binay sa lakas o “last-2-minutes” ng kanyang karibal sa laylayan.

Malaking tama!

----$$$-

“OUR AI model predicts medium chances of her winning ranking between 11-14,” giit ng grupo.

Isinalang sa analisa ang datos mula sa mga post ng netizens sa iba’t ibang social media platform na binigyan nila ng scoring sa positive, negative at neutral na porsyento.

----$$$--

SINASABING kahit may 40% positive narrative sa social posts ang nakukuha ni Abby Binay sa pagiging alkalde ng Makati City, nahaharap naman at naging bagahe niya ang negatibong kritisismo sa kanyang comments sa ibang political figures.

“Like many politicians, Abby Binay faces criticism particularly in relation to her comments on other political figures and her family political legacy. Some narratives focus on these controversies questioning her motives and political strategies,” pahayag ng AI model group.

----$$$--

NAKOPO ni Abby ang 30% negative sentiments mula sa social posts mula sa publiko at 20% neutral sentiment at 50% positive sentiments.

Pero, halos 40% ng kabuuang conversation kay Binay sa social media ay may relasyon sa liderato nito sa Makati City.

----$$$--

PERO natuklasan din ng grupo na 20% ng kritisismo kay Binay ay nag-uugat sa family background at kontrobersiyal na alyansang pulitikal.

Unang umani ng matinding kritisismo ang pamilya ni Abby sa pagpapatayo ng parking building ng Makati City Hall.

“Negative (30%). Some posts criticize her political strategies and family legacy, which contribute to a negative sentiment. This criticism often focuses on her comments about political and perceived political maneuvering,” ayon sa post ng 3RDEY3.

----$$$---

DAHIL diyan, natukoy na moderate lamang ang tsansa ni Binay na makasampa sa Senado.

“Abby Binay has a moderate chance of winning a Senate seat. Her strong political alliances and achievement as mayor contribute positively, but criticism and controversies may impact her overall appeal,” ayon sa analisa ng datos.

----$$$--

NAKABASE ang grupo sa San Francisco, California at lumahok sa X noong Pebrero 2024 na may 1, 277 followers.

Kabilang sa mga followers nito ay ilang local influencer sa social media sa Pilipinas.

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.