4 NA BAGONG MUSIC VIDEO NG SEVENTEEN, ILALABAS NA

ni Eli San Miguel - Trainee @Entertainment | April 25, 2024

Magbibigay ng sorpresang music video ang K-Pop boy group na SEVENTEEN para sa apat na bagong kanta mula sa kanilang nalalapit na comeback album na may pamagat na "17 Is Right Here."

Sa social media platform na X, naglabas ang 13-member group sa ilalim ng Pledis Entertainment ng mga release dates para sa mga music videos, na magsisimula sa title track na "Maestro," na ilalabas kasama ng album sa Abril 29.

Susundan ito ng isang music video para sa "LALALI," ang kanta na ini-record ng hip-hop unit ng grupo na binubuo nina S.Coups, Wonwoo, Mingyu, at Vernon. Ilalabas ito sa Mayo 10.

Sa Mayo 17, maglalabas ang performance team nina Hoshi, Jun, The8 at Dino ng music video para sa kanilang unit song na "Spell."

Sa wakas, ilalabas naman ng vocal unit na binubuo nina Woozi, Jeonghan, Joshua, DK, at Seungkwan ang video para sa kanilang kanta na "Cheers to Youth" sa Mayo 24.

Noong nakaraang taon, ang extended play ng SEVENTEEN na "FML" ay itinanghal bilang best-selling album sa buong mundo, na nakapagbenta ng 6.4 milyong units, ayon sa International Federation of the Phonographic Industry.

‘Di maikakaila na isang tanyag na boyband mula sa South Korea ang SEVENTEEN dahil sa kanilang kahusayan sa musika. Binansagan ang grupo bilang "self-producing" idol group, kung saan may kontribusyon ang mga miyembro sa songwriting, music production, at choreographing.

Taeyong ng NCT, pumasok na sa military

ni Eli San Miguel - Trainee @Entertainment | April 15, 2024

Opisyal nang pumasok sa South Korean military si Taeyong ng K-Pop group na NCT nitong Lunes.

Sa Instagram, ibinahagi ng leader ng NCT ang mga larawan niya na naka-buzz-cut hairstyle, kasama ang kanyang co-members na nakahandang ihatid siya sa military.

“I'll be back safely! Be healthy! Let's go! Our day !!!! I love you,” saad ni Taeyong sa Korean, na isinalin sa English ng Instagram.

Si Taeyong ang unang miyembro ng NCT na pumasok sa South Korean military. Inaasahan naman ang kanyang paglabas sa Disyembre 2025.

Nag-debut si Taeyong sa NCT noong 2016, pati na rin sa sub-unit nito na NCT U at NCT 127 sa parehong taon. Kasama ng kanyang mga co-members, nagtanghal sila sa Philippine Sports Stadium noong Enero para sa Philippine stop ng kanilang "Unity" tour.

“Why?” ng Stray Kids, trending sa X

ni Eli San Miguel - Trainee @Entertainment | April 12, 2024

Inilabas na ng sikat na K-Pop boy group na Stray Kids (SKZ) ang isang Japanese drama OST para sa unang pagkakataon mula nang sila ay nag-debut.

Ngayong Abril 12, inilabas ang “Why?” bilang official soundtrack ng drama series na “Re: Revenge - Yokubo No Hate Ni” na nagsimulang umere noong Abril 11.

Sa parehong araw ng release date ng kanta, agad naman itong nag-trending sa social media platform na X (dating Twitter).

Damang-dama ang excitement ng mga fans dahil ito ang unang pagkakataon na nagkaroon ng kontribusyon ang SKZ sa paglikha ng isang soundtrack para sa isang Japanese content.

Bukod dito, ang "Why?" ay isinulat ng production trio ng Stray Kids, na kilala bilang 3racha, na binubuo ng mga miyembro na sina Bang Chan, Changbin, at Han.

Ang SKZ ay binubuo ng walong miyembro na sina Bang Chan, Lee Know, Han, Changbin, Hyunjin, Seungmin, Felix, at I.N. Sumikat sila sa ilalim ng JYP Entertainment.