Dating sikat na singer, lasenggo at wa’ na raw kayod… ICE, WISH NA MAKATAGPO NA SI JAKE ZYRUS NG DYOWA TULAD NIYA

ni Julie Bonifacio @Winner | Jan. 14, 2025

Photo: Ice Seguerra at Jake Zyrus - Instagram

Nabanggit namin kay Ice Seguerra ang balita tungkol sa kapwa niya transman na si Jake Zyrus sa Amerika sa ginanap na mediacon ng Love, Sessionista concert na gaganapin sa The Theater at Solaire sa February 8.

Ayon sa aming source ay naging alcoholic and jobless daw si Jake sa US.

Reaksiyon ni Ice, “I hope, I really hope… well, ako kasi, I’ve been there. I’ve been in a very bad place.

“Siguro, ang sinuwerte ko lang, may mga tao na nasa paligid ko na talagang may malasakit at may pagmamahal. 

“So, ako, that’s my wish for him na he will find his wife na who will support him, love him and will show him love and acceptance. ‘Yun!

“Kasi, I think that’s very important for a person, ‘yung no matter who you are, no matter what you do, alam ko na okay lang mag-fall ka because alam mong may sasalo sa ‘yo. And I got so lucky. So, I hope he has that.”

Of course, ang wife na binabanggit ni Ice ay walang iba kundi si former FDCP Chair Liza Diño.

Agree si Ice sa ideya na bumalik ng Pilipinas si Jake, lalo pa’t maganda ang takbo ng concert scene sa entertainment industry.

Sey niya, “Yeah. Ako, I honestly wish that people would stop comparing us. Kasi, okay, we’re both trans, but hindi porke pareho kaming trans, pareho kami ng journey. 

“Iba-iba ang tao, iba-iba ang journey natin. Iba-iba ang pinagdaraanan ng tao. Iba ang pupuntahan natin. 

“I have my own journey, he has his own journey. So, I hope they respect his journey as well. 

“Stop comparing us because hindi nakakatulong ‘yun, eh. Hindi nakakatulong ‘yun ‘pag ikinukumpara ka. Kahit kanino pa ‘yan. Kahit sino pang artista ‘yan. Walang may gusto noon. 

“Kumbaga, tigilan na natin ‘yan. Let Jake be Jake, ‘di ba? Kung saan s’ya masaya, we’re just to support him.

“Actually, wala namang makakapagsabi na dapat ganito ka, dapat ganyan ka. Journey n’ya ‘to, eh. Wala naman siyang sinasaktan na tao. Bakit tayo nangingialam sa mga desisyon n’ya sa buhay?”

Binanggit din namin kay Ice na balitang may naging GF na si Jake sa US.

“Good,” ngiti ni Ice.

May pakiusap naman si Ice sa mga taong nagkukumpara sa kanila ni Jake.

“Ako, sasabihin ko ‘to. Malaki ang ipinagbago ng buhay ko dahil sa asawa ko. Malaking bagay ‘yung partner mo. Kasi ‘yung partner mo ang magsasabi sa ‘yo nang totoo. S’ya lang ang magbibigay sa ‘yo ng perspektibo na normally, ‘di maibigay ng iba.

“‘Yung ibang tao, hindi nila maibibigay sa ‘yo kasi gusto nila ‘yung approval mo lang ang makuha nila. ‘Yung partner mo, s’ya lang ang makakapagsabi sa ‘yo nang totoo,” lahad pa ni Ice.

Si Ice ang direktor ng pre-Valentine concert nila ng kanyang fellow Sessionistas na sina Juris, Sitti, Princess Velasco, Kean Cipriano, Duncan Ramos at Nyoy Volante.

Sa dami nila at kapwa malalaking artists din gaya ni Ice, tiniyak ng dating child star na may equal exposure ang bawat isa sa kanila sa Love, Sessionistas produced by Fire and Ice. 

At dahil kapwa niya magagaling ding artists ang ididirek niya, may kani-kanyang inputs din daw ang mga ito sa show, na welcome naman kay Ice Seguerra. 

Dahil sa lumang truck… UTOL NI SAM, TUMALSIK SA MOTOR, MILAGRONG NAKALIGTAS

ni Julie Bonifacio @Winner | Jan. 13, 2025

Photo: Sam Milby at Ada Milby - IG

Milagro ang bungad ng aktor na si Sam Milby sa kanyang caption sa series of photos and videos pagkatapos makaligtas at mapagaling ang naaksidente niyang sister na si Ada Milby na ipinost niya sa kanyang Instagram (IG) recently.

Sa unang photo na ipinost ni Sam ay inaalalayan niya ang hirap pang maglakad na si Ada sa corridor ng ospital.

Sa dalawang videos na ipinost ni Sam ay makikita na isang himala talaga na nakaligtas si Ada nu’ng tumalsik siya sakay ng kanyang motor pagkatapos mabangga ng likuran ng isang sasakyan na sinagasaan naman ng malaking container truck. 

Caption ni Sam: “Milagro. ‘Yun ang nangyari sa Ate ko last month. Definitely not the way she wanted to spend the holidays but thank you Lord she is safe and healing. She walked away with no broken bones, just badly bruised with some stitches (S’ya ‘yung naka-motor sa video).

“But sadly a young man’s life was taken. Nawalan daw ng preno ‘yung truck at parang madalas nangyayari to: (I hope more can be done to force companies to do regular checkups and maintenance for a lot of these older trucks).

“So glad you’re okay and love you, Sis.”

Sa huli ay binigyan ng credit ni Sam ang mga may-ari ng dashcams ng truck at grab driver na nakakuha ng video sa aksidente. 

Well, nag-post ng comment ang mga celebrity friends/followers ni Sam sa IG gaya nina Judy Ann Santos, KC Concepcion, Angeline Quinto, Vhong Navarro, Enchong Dee, Chie Filomeno, Markki Stroem, Ivana Alawi, Michael de Mesa at Beautederm owner na si Rhea Tan.

Mensahe ni Juday, “Oh my…glad your sister is okay (heart emoji) her guardian angel really took care of her.”

“So glad to hear, Ada is okay, praying for her speedy recovery!!!” ani KC.

Sabi naman ni Michael de Mesa, “Oh, my God. So glad Ada is okay, that was intense. Something should really be done with these trucks that are not maintained.”

Si Ada ay isang Filipino-American rugby player na naglalaro sa Philippine national women’s team. Siya rin ang kauna-unahang female member of the World Rugby Council. At siya ngayon ang presidente ng Philippine Rugby Football Union.

Sumabak din pala si Ada sa Iraq war bilang staff sergeant sa US military. May dalawang anak na babae si Ada na pawang paborito ni Uncle Sam.

---

Naging instant bayani ang dating sexy star na si Klaudia Koronel sa paglikas sa kanyang 75-year old na  pasyente na may sakit na dementia mula sa wildfire sa Los Angeles, California sa Amerika.

Nag-live si Klaudia sa kanyang Facebook (FB) page habang nililikas ang kanyang Amerikanang pasyente dahil umabot na sa likod ng bahay nito sa Palisades ang wildfire.

Si Klaudia ay naninirahan at nagtatrabaho na sa US bilang caregiver.

Caption ni Klaudia sa kanyang video post sa FB, “Actual footage o live ko na experience ko mismo ang wildfire sa Pasadena. Nagpapa-panic ako. Hanggang ngayon, traumatized ako.

Kasi ‘pag nakaka-receive ako ng emergency alert, natataranta ako at nagpa-panic.”

Sa video ay mapapanood ang bahay ng pasyente ni Klaudia na inabot na ng apoy ang likuran.

Lahad ni Klaudia sa video, “Masusunog na po ang bahay namin. God! napakabilis. Relax pa ako kanina kasi sa isip ko malayo naman sa Palisades ang sunog. Tapos biglang natanaw ko may apoy na sa likod bahay at naka-receive ako ng alert na lumikas na kami.”

Sa pagtatapos ng video ay hindi pa malaman ni Klaudia kung saan sila pulunta pagkatapos lisanin ang bahay ng kanyang pasyente.

Sa sunod na FB post ni Klaudia ay ipinakita niya ang mga sandamakmak na mga residente na naapektuhan ng wildfire ang nagpuntahan sa Santa Anita Park bilang pansamantalang evacuation place.

Post ni Klaudia, “Please help them po, masuwerte kami ng pasyente ko kasi nilagay kami ng family sa Pasadena hotel. Karamihan, kawawa po talaga…”

Sa ngayon ay nanawagan ng volunteers and donation ang mga evacuees sa Santa Anita Park at sa iba pang mga lugar sa Los Angeles.

Sana raw siya na lang ang kinuha… DINA, KINUWESTIYON SI LORD SA PAGKAMATAY NG MISTER

ni Julie Bonifacio @Winner | Jan. 12, 2025

Photo: Instagram @dinabonnevie

Dinagsa ng mga celebrities na nakiramay at nagpadala ng mga bulaklak ang wake ng mister ni Dina Bonnevie na si Agriculture Undersecretary Deogracias Victor “DV” Savellano.

Last Friday ay personal kaming naghatid ng pakikidalamhati kay Ms. D (nakagawiang tawag namin kay Dina) sa Aeternitas Chapels & Columbarium sa Commonwealth, Quezon City.

Nakasabay pa namin sa pag-akyat si Gladys Reyes na nakasama ni Ms. D sa isang serye sa GMA-7. At inabutan namin sa Chapel of Hera sa 7th floor si Ms. D na kausap si former Makati Mayor Jejomar Binay, Jr.. 

Namataan namin pagpasok ng chapel ang solong anak na babae ni Dina kay Vic Sotto na si Danica Sotto-Pingris. Pero bigla rin siyang nawala sa loob ng chapel after makahanap kami ng upuan. 

Maaaring nag-aalala si Danica na baka matanong namin siya tungkol sa isyu kay Vic. Although, aware naman kami na ‘di ‘yun ang tamang pagkakataon para magtanong sa kanya tungkol sa kanyang ama.

Anyway, ramdam namin ang appreciation at pasasalamat ni Ms. D sa mga nakiramay sa kanilang pamilya that night. Talagang lahat ng dumating, at kahit paisa-isa pa, malugod niyang tinatanggap at kanyang ineestima, kahit na nga paulit-ulit pa siyang nagkukuwento sa nangyari sa kanyang asawa.

Bigla na lang daw narinig ni Ms. D na kumalabog sa sahig ang kanyang asawa dahil sa matinding pain sa kanyang likod. 

Sa Diliman Hospital unang dinala ni Ms. D ang kanyang mister, pero nagawa raw niyang ilipat sa Makati Medical Center at doon naoperahan. 

Pagkatapos ng operasyon, limang beses daw nag-flatline si Usec DV. Nailigtas daw ito pagkatapos ng apat na beses na flatlines pero tuluyan nang bumigay sa ika-lima. 

Abdominal aneurysm ang sinasabing cause of death ni Usec. DV. Pero nanindigan si Ms. D na kung mga espesyalistang doktor ang nandu’n at nag-monitor sa kanyang asawa, maaaring naligtas pa ang buhay nito.

Amazed na amazed si Ms. D sa mga taong nagpunta sa lamay, nalungkot sa pagkawala ng kanyang mister mapa-pulitika man or sa kanyang mga katrabaho sa Department of Agriculture, at nagkuwento kung gaano kabuting tao si Usec. DV.

Dahil d’yan, nasambit pa ni Ms. D na sana, siya na lang ang kinuha ni Lord. Naniniwala kasi siya na marami pang gagawin at magagawa ang kanyang mister na dating representative ng 1st District ng  Ilocos Sur.

Inamin din niya na kinuwestiyon niya ang Diyos sa pagkamatay ng kanyang asawa. Marami naman daw masasamang tao d’yan, ba’t hindi na lang daw ‘yun ang kinuha? 

Sa Linggo ay dadalhin na sa Ilocos Sur ang mga labi ni Usec. DV at ibuburol sa Savellano residence sa Cabugao, Ilocos Sur hanggang sa January 16, Huwebes. Ililibing ito kinabukasan sa Cabugao Cemetery.

After the burial, mananatili si Ms. D sa bahay nila sa Ilocos Sur at doon na rin magse-celebrate ng kanyang kaarawan sa January 27.

Hindi raw sure ni Ms. D kung paano haharapin ang bukas na wala ang kanyang mister.

In fact, sa tuwing natutulog daw siya ay paulit-ulit niyang nakita kung paano namatay ang kanyang asawa. Kaya tiyak niya na mahihirapan siya sa mga susunod na raw, linggo at maaaring mga buwan pa.

Muli, ang aming pakikiramay kay Ms. D at sa mga anak ni Usec. DV.

---

PASABOG ang pagbubukas ng bagong taon para sa FPJ’s Batang Quiapo (BQ) sa pagdiriwang nito ng ika-100 na linggo at sa pagsisimula ng ikalawang taong selebrasyon ng Kapamilya teleserye simula nu’ng Enero 6. 

Kaabang-abang dito ang muling paghaharap nina Tanggol (Coco Martin) at Olga (Irma Adlawan) kung saan isang buhay ang malalagay sa panganib nang biglang sumulpot si Marites (Cherry Pie Picache) sa bakbakan ng dalawa para subukang iligtas ang anak niyang si Tanggol.

Isang malaking rebelasyon din ang yayanig sa buhay ni Tanggol dahil sa wakas ay isisiwalat na ni Olga sa kanya ang katotohanang hindi si Rigor (John Estrada) ang totoo niyang ama. 

Marami pang sorpresa ang dapat abangan ng mga manonood ng BQ sa patuloy na pagdiriwang nito ng ikalawang taong selebrasyon. 

Huwag palampasin ang maaaksiyong kaganapan sa BQ, na hango sa orihinal na kuwento ng Regal Films, gabi-gabi ng 8 PM sa Kapamilya Channel, A2Z, TV5, iWantTFC, at Kapamilya Online Live sa YouTube (YT) channel at Facebook (FB) page ng ABS-CBN Entertainment.

Mapapanood din ito sa labas ng Pilipinas sa pamamagitan ng iWantTFC at The Filipino Channel (TFC) sa cable at IPTV.