BFF, ‘wag daw kunsintihin ang kalandian… ROBI, MAGDEDEMANDA NG FAN DAHIL KAY KATHRYN

ni Julie Bonifacio @Winner | Feb. 24, 2025

Photo: Robi Domingo - Instagram, Pilipinas Got Talent

Pinagbantaan si Robi Domingo ng basher niya sa socmed (social media) kahapon. It turned out na fan nina Donny Pangilinan at Belle Mariano ang netizen na nag-post ng pagbabanta kay Robi.

Comment-post ng netizen, “@iamrobidomingo ay subukan mo lang na i-match si @donny at @bernardokath ready ready and solid supporters ni Belle Mariano na ibash ka mula ulo mo hanggang paa. ‘WAG MO I-TOLERATE ‘yung KALANDIAN ng peste mong kaibigan.”

Hindi pinalampas ni Robi ang pagbabanta sa kanya ng netizen.

Reply ni Robi, “Can I consider this as a threat? Can I take legal actions against this? I don’t tolerate this behavior.”

Nagmula ang pagbabantang ito kay Robi ng parang fan ng DonBelle sa tsikang may gagawing proyekto si Donny with Kathryn Bernardo.

Magkasama sina Kathryn at Donny bilang mga hurado sa nagbabalik na Pilipinas Got Talent (PGT) sa telebisyon.

At the same time, ipapareha naman daw ang kalabtim ni Donny na si Belle Mariano sa baguhang si Robbie Jaworski.

Sey ng mga netizens:

“Ang kitid talaga ng mga utak, sana ‘pag fans, be good examples, not bashers.”

“Minsan ‘yung ibang fans hindi lang showbiz at sports, eh, sumosobra rin. Feeling nila they own that person and can dictate their life. Yes, you support them pero we should know our limits.”

“Mga fans ng DonBelle nagkakalat. Bakit takot na takot sila?”

Idinenay naman ito ng ibang DonBelle fans.

“‘Di ‘yan fans ni Belle for sure, fan ‘yan ng iba na gustong siraan si Belle.”

“Nagpapanggap lang ‘yan na fan ni B or DonBelle. We real fans don’t tolerate such behavior.”

Sabeee?

---

BISING-BUSY ang napakaseksing si Ara Mina sa pangangampanya. Bukod kasi sa kanyang kandidatura sa Pasig City bilang councilor, tumutulong din siya sa kampanya ng kanyang mister bilang isa sa mga nominees ng Turismo Partylist.

Binansagang “Turismo Beauty” at ambassador si Ara Mina. At noong nakaraang weekend ay bumisita sa probinsiya ng Davao Oriental si Ara kasama ang Turismo Partylist nominees na sina Wanda Tulfo-Teo at Dave Almarinez.

Naging matagumpay at puno ng saya ang naturang homecoming sa probinsiya ni Teo. Ito ay dinaluhan ng kanyang mga kapwa-Davaoeño at supporters ng kanilang partido.

Naghandog ng isang concert sina Ara Mina at ilang artists sa matagumpay na homecoming.

Kasabay nito ay pinasyalan din nina Dave at Ara ang Mansalay, Oriental Mindoro. Warm welcome rin ang natanggap ng mga ito kaya naman ganadung-ganado ang kanilang grupo na mag-ikot pa sa iba’t ibang lugar ng Pilipinas nitong mga susunod na araw.

Unfair daw, ‘di mag-eendorso ng artista… ROMNICK: MGA SIKAT, ‘WAG TUMAKBONG PULITIKO

ni Julie Bonifacio @Winner | Feb. 22, 2025

Photo: Romnick Sarmenta

Walang ibobotong kandidatong artista ngayong eleksiyon ang aktor na si Romnick Sarmenta. ‘Yan ang kanyang deklarasyon sa isang mahabang post niya sa kanyang socmed (social media) account recently.

Panimula ng post ni Romnick, “Oo. Artista ako. Ito ang aking kinamulatan... apat na gulang ako ng magsimula. 

“Hindi. Hindi ko ginamit ang kahit na sino... natutunan kong mahalin ang sining na nagpalaki, at sa isang banda’y tumulong sa paghubog ng aking pagkatao.

“Marami akong nakasama at nakasalamuha. Maraming taong nakilala at nakalapitan ng loob... ang mabubuting taong nagpaalala sa ‘kin na ‘di ko kailangan magpadala sa agos ng mga hiyaw at sa kasikatan. Mga taong nagmalasakit na lumaki ako ng tama.

“Mga taong nagbahagi ng kanilang pananaw sa maraming bagay. Mga taong hinahangaan ko at minamahal dahil sa kanilang paninindigan at prinsipyo... mga bagay na may halaga sa aking puso. Marami rin sa kanila ang nawala na. Ngunit ang mga aral ng kanilang gawa ay buhay.”

Dahil daw sa kanila kaya hindi naniniwala si Romnick na dapat tumakbo for public office ang mga sikat. 

“Hindi patas ang laban... lalo na’t pondo ang pangalan. Kilala sila, ‘di alam ang pangalan ng kalaban.

“Kilala sila... oo. Pero ‘di ito batayan ng kagalingan sa pagpapaunlad ng bayan,” esplika niya.

Pagpapatuloy pa ni Romnick, “Hindi rin ako mag-eendorso ng kahit na sino. Alam ko kung sino ang mga pinili ko. Wala, walang artista sa kanila.

“May mga artistang nanungkulan sa lokal na pamamahala. Isa lang ang gagawin kong ehemplo,” aniya, at iyon daw ay ang Star for All Seasons na si Vilma Santos.

“Si Ms. Vilma Santos. Wala akong narinig o nabalitaang hindi maganda. Bagkus, lahat ng nasasakupan n’ya sa Batangas na nakausap ko’y masaya sa kanyang panunungkulan at serbisyo.

“Gugustuhin ko bang magsilbi si Ms. Vilma Santos-Recto sa Senado? Sa taas ng paggalang at paghanga ko sa kanya bilang tao...

“Hindi.

“Ayoko s’yang mapalibutan ng mga buwitre at lobo,” pagtatapos ni Romnick.

Marami ang pumuri kay Romnick sa kanyang paniniwala at desisyon. Sey ng mga netizens…

“Childhood crush is crushing this! On point!”

“In a world full of actors turned clown politicians, choose a Romnick.”

“Proud of you and been rooting for you since you were 4, little Peping. And now that you have come of age, I’m glad that you are not tarnished by the rotten system in the industry and I’m proud of your stand in politics. We’re on the same boat. Keep on expressing your thoughts!”

Kahapon ay may kasunod na post si Romnick sa X (dating Twitter). 

Sabi ni Romnick, “Ang pagmumura ay usal ng mga kulang ang kakayahang mangusap ng wasto. Ng kawalan ng paggalang at pagsino. Ng kawalan ng hiya sa sarili at kapuwa. Simbolo ng paniniwalang nakakaangat sila sa iba. Ng kayabangan, ng kababawan. At ang pinakamalupit... ng kakulangan.”

Sey dito ng mga netizens…“100 porsiyentong tama!”

“Very on point.”

“Aaminin ko, ito ang artista na ‘di ko hinangaan sa sining, subali’t malaki ang aking respeto at paghanga sa kanya bilang mamamayang may malasakit sa bayan (heart emoji).”

May nag-request naman kay Romnick na i-translate sa English ang kanyang post, “English please….”

Ni-reply-an ito ni Romnick ng, “In short.... Cursing is the resort of the feeble-minded.”

O, akala n’yo, aatrasan kayo ni Romnick Sarmenta sa inglisan, ha? Bongga!

---

‘Di pa raw dyowa, dating pa lang…

BAGONG BF NA CAGER NI ANDREA, PINALAGAN NG KAMPO NI KYLE

NAG-REACT ang mga fans nina Andrea Brillantes at Kyle Echarri sa socmed (social media) pagkatapos ma-link ang Kapamilya actress sa isang basketbolista.

Ayon sa aming source, nagagalit daw ang KylDrea sa balitang boyfriend na ni Andrea ang San Beda basketeer na si Samuel Fernandez.  

Hindi pa raw dyowa ni Andrea si Samuel, nagde-date-date pa lang daw ang dalawa.  

Tsika pa ng aming source, pati sa bagong manager ni Andrea na si Shirley Kuan ay ‘di rin nagkukuwento ang aktres regarding her love life. Baka raw natuto na si Andrea at gusto na lang i-keep privately ang tungkol sa kanyang love life.

Incidentally, nag-first taping day na si Andrea sa FPJ’s Batang Quiapo (BQ) last Friday. Sa isang random na barangay lang daw nag-shoot at hindi sa Quiapo.

Belong sa poor family si Andrea at gaganap bilang anak ni Michael de Mesa sa BQ. Habang ang bidang si Tanggol played by Coco Martin ay yayaman na.

Inihahanda na raw ang pagyaman ni Tanggol sa action serye at saka unti-unti nang pumapasok ang new cast ng BQ.

Ang isa pang “alaga” ni Shirley Kuan na si Albert Martinez ay papasok na rin sa BQ. Nakapag-taping na si Albert, pati na si Jake Cuenca.

‘Di raw talaga niya in-expect… “HINDI KO ALAM NA KAY KIM PALA ANG BAGSAK KO” — PAULO

ni Julie Bonifacio @Winner | Feb. 21, 2025

Photo: Paulo at Kim Chiu - My Love Will Make You Disappear

Naiyak si Kim Chiu sa grand mediacon ng first-ever movie nila ni Paulo Avelino, ang My Love Will Make You Disappear (MLWMYD) pagkatapos ipakita ang iba’t ibang poster ng movie na gagamitin sa bawat bansa para sa international screening ng latest movie ng Star Cinema.

“Nakakaiyak,” sabi ni Kim. 

“Parang sobrang laki ng movie and sobrang thank you sa Star Cinema for giving us this story. And, sa pagpapalabas sa international release na iba-iba ‘yung poster, ‘yung effort ng lahat, nakaka-overwhelm,” ani Kim sa paos na boses habang nagsasalita and at the same time ay naiiyak. 

Para kay Kim, puwede naman daw na isang poster na lang ang gawin para sa movie nila ni Paulo.

“Pero iba-iba bawat bansa. (At) ‘Yung nakasulat pa, ‘di ko naintindihan kaya siguro naiyak ako. Pero, thank you. At, thank you rin sa ‘yo (Paulo), nangyari ‘to,” sabay tapik ni Kim sa balikat ni Paulo at napangiti.

Iba rin ang naramdaman ni Paulo nu’ng makita ang iba’t ibang latag na design sa poster ng MLWMYD.

Ayon kay Paulo, “Uh, honestly, very excited din. Medyo gulat din. Uh, hindi ko in-expect na ganoon karaming bansa ilalabas ang pelikula namin. Pero I’m very happy and very proud. Very happy for Star Cinema and everyone who worked on the film.

“Uh, actually, sa ‘kin kasi, ‘pag nakakaisip ako ng pelikulang ginagawa ko, hindi ko naaalala ang performance ko or ‘yung ganda ng cinematography. Ang naaalala ko lagi, ang lahat ng tao na nagtatrabaho sa likod ng pelikula. And kung maging successful itong pelikula — sana, maging successful itong pelikula — of course, ito ay para sa lahat ng tao na nagtrabaho sa likod ng kamera at naglako nitong pelikula. So, para sa inyo ‘to.”

Naiibang kilig ang hatid ng MLWMYD, hindi lang sa KimPau fans. Kasi naman, trailer pa lang, parang tinotoo na nina Kim at Paulo ang mga nakakakilig na eksena nila sa movie.

“A lot of times,” pag-amin ni Paulo when asked kung totoo na ang kilig na naramdaman nila ni Kim sa isa’t isa.

Aniya pa, “I think because minsan kasi, kailangan as an actor, kailangang totoo ‘yung nararamdaman n’ya, ‘yung inilalabas niya na emosyon para ‘pag pinanood ng mga tao, maniwala sila sa gusto n’yang ipakita sa kanila.”

Based on Paulo’s track record sa kanyang naging leading ladies, parang pinakapaborito niya si Kim. May special reason malamang kung bakit si Kim ang pinili ni Paulo na makapareha sa kanyang latest movie.

“Maraming rason, eh,” pahayag ni Paulo. 

Aniya, “Hindi pa kami nakakapagpelikula together. Uh, tapos, rom-com din. Parang ‘di pa ako nakakagawa ng rom-com na pelikula with me starring in it. Saka si Kim, si Kim naman ‘yun, eh. Madali s’yang katrabaho and exciting din naman ‘yung concept. Tapos nalaman ko si Direk Chad (Vidanes) ulit. Tapos, istorya ni Prime, kaya na-excite rin akong gawin.”

Never nga raw in-expect ni Paulo na magiging close sila ni Kim.

“Actually, ‘di ko ine-expect na makakatrabaho ko si Kim. But I wanted to work with her. Ah, ‘yun, never ko talaga in-expect. Kasi parang after a while, naiba na rin ‘yung tahak ng mga gusto kong gawin. So, hindi ko alam na kay Kim pala ang bagsak ko,” kasunod ang malakas na sigawan ng KimPau sa loob ng Dolphy Theater kung saan ginanap ang mediacon ng MLWMYD.

Esplika naman ni Kim, “Uh, ‘di talaga. Kasi hindi ko alam kung paano siya kakausapin, eh. Parang ang layo niya talaga, eh. Ngayon may hampasan na, ganu’n. Kasi tatlong projects na rin naman ang pinagsamahan namin. And na-experience na rin namin ang iba’t ibang klase ng intensity ng pag-arte. Kailangang kilalanin mo rin ‘yung kaeksena mo, kaya nagiging close talaga kayo.”

Kasama rin sa MLWMYD sina Wilma Doesnt, Lovely Abella, Benj Manalo, Migs Almendras, Nico Antonio, at Martin Escudero.

---

BACK-TO-BACK episodes ang record-breaking online views ng FPJ’s Batang Quiapo (BQ), matapos itong magtala ng 852,417 peak concurrent views o sabay-sabay na nanonood nang live sa Kapamilya Online Live sa YouTube nu’ng Pebrero 19.

Tinutukan sa naturang episode ang matagal nang inaabangang pambubuko at pagpapahiya kay David (McCoy De Leon), isa sa mga pinakapinanggigigilang kontrabida sa telebisyon. 

Sa harapan mismo ng pinaka-iniidolo niyang tatay na si Rigor (John Estrada), walang prenong ibinulgar ni Marites (Cherry Pie Picache) ang lahat ng panlolokong ginawa ni David bilang pekeng Tanggol (Coco Martin) upang maangkin ang buong kayamanan ng mga Montenegro.

Samantala, kinapitan din ng mga manonood ang salpukan nina Tanggol at David noong Pebrero 18 kung saan nagtala ang episode ng 818,949 peak concurrent views.

Nakatikim na rin si David ng karma niya nang maiwan itong bugbog-sarado kay Tanggol matapos nitong malaman na ninakaw ni David ang kanyang pagkatao.

Ang dami pang aabangan na maaaksiyong kaganapan sa mga susunod na episodes, at isa na rito ay ang tapatan ng mga mortal na magkaaway dahil susugod sina Ramon (Christopher De Leon) at Tanggol sa Quiapo para maghiganti sa mag-amang David at Rigor.

Nitong Pebrero 13, ipinagdiwang ng BQ ang ikalawang anibersaryo ng serye. Malapit na ring makilala ang mga bagong karakter sa serye na mapapanood gabi-gabi.