1,518 pamilya magmamay-ari na ng lupa sa Payatas, Quezon City

ni Lolet Abania | September 26, 2021

Nasa kabuuang 1,518 pamilya sa Barangay Payatas sa Quezon City ang magmamay-ari na ng lupa kung saan sila nanirahan ng 40 taon.

Sa pahayag ng city government, natupad na ni Mayor Joy Belmonte ang kanyang naging pangako sa mga residente ng Ramawil 9.6 Homeowners Association Inc., dalawang taon na ang nakararaan.

Nitong weekend, nilagdaan ni Belmonte ang deed of conditional sale bilang pormal na pag-acquire ng 157 parcels ng mga lupa na dating pagmamay-ari ng Landbank.

Nagpasalamat naman ang presidente ng Ramawil 9.6 Homeowners Association Inc. na si Razul Janoras sa city government sa pagbibigay nito ng oportunidad na makakuha ng security of tenure sa mga naturang lupa na kanilang tinirhan sa loob ng apat na dekada.

Sina City Administrator Michael Alimurung, head ng Housing Community Development and Resettlement Department, at ang City Appraisal Committee, ang siyang nagkumbinse sa Landbank upang mai-settle ang mga property sa halagang P209,244,000.

Matapos na ma-acquire ito ng lokal na gobyerno ng Quezon City, ang mga benepisyaryo ay maaaring magbayad sa LGU para sa lupa na kanilang inookupa sa pamamagitan ng direct sale program na P3,000 per sq. meter.

Dahil sa bumisitang asymptomatic… 122 indibidwal, nagpositibo sa COVID-19 sa isang orphanage sa QC

ni Jasmin Joy Evangelista | September 9, 2021

Nagpositibo sa COVID-19 ang 122 indibidwal sa isang orphanage sa Quezon City, ayon kay Mayor Joy Belmonte.

Sa isang panayam, sinabi ni Belmonte na 99 sa mga ito ay mga kabataan na nasa edad 18 pababa sa Gentlehands Orphanage sa Barangay Bagumbuhay.

Ayon kay Dr. Rolando Cruz, chief ng Quezon City Epidemiology and Surveillance Unit (CESU), isa umanong tao ang bumisita sa lugar at hindi alam na siya ay positibo sa Covid dahil asymptomatic.

“Kailangang mapanatili ng mga ganitong closed long-term care facilities ang mahigpit na protocols dahil kahit isang kaso lang ang makapasok sa kanila ay madaling mahahawa ang lahat,” ani Cruz.

Samantala, sinabi naman ni Belmonte, “Mariin nating ipinapaala na ang hindi pagsunod o hindi pagpapatupad ng minimum public health protocols ay paglabag sa RA 11332. Dapat maging mahigpit ang ating persons in authority sa pagpapatupad nito para maiwasan natin ang pagkalat ng virus.”

Kasalukuyan na rin daw inaasikaso ng Quezon City LGU ang mga pangangailangan ng mga nagpositibo at buong pasilidad.

Isinasagawa na rin ang swab testing at contact tracing sa nasabing lugar.

Panggabing turukan ng Covid vaccine, sinimulan na

ni Ronalyn Seminiano Reonico | June 17, 2021

Naglunsad ang pamahalaan ng Quezon City ng panggabing COVID-19 vaccination services para sa mga manggagawang hindi magawang lumiban sa trabaho sa umaga.

Saad pa ng QC local government unit, “Layon nitong mabakunahan ang mga essential workers na hindi makapagliban sa kanilang trabaho sa umaga, lalo na ang mga no work-no pay personnel.”

Alas-6 nang gabi nagsisimula ang pagbabakuna hanggang 10 PM.

Umabot na rin umano sa 2,000 pre-registered essential workers na kabilang sa A4 priority group ang nabakunahan na sa Quezon City Hall Grounds kagabi.

Saad pa ni QC Mayor Joy Belmonte, "Ngayon, hindi na nila kailangang mamili kung arawang kita ba muna o bakuna. We will inoculate them at a time most convenient to them.”