BIR at Agham Road sa QC, Miriam Defensor-Santiago Avenue na

ni Eli San Miguel - Trainee @News | November 11, 2023

Opisyal nang pinangalanan ng pamahalaan ng Quezon City bilang Sen. Miriam Defensor-Santiago Avenue ang BIR at Agham roads ngayong Sabado, bilang pagpupugay sa mga ambag ng yumaong senador sa bansa.

Dumalo sa seremonya ng pagbabago ng pangalan sina VP Sara Duterte, Mayor Joy Belmonte, Rep. Arjo Atayde, kasama ang balo ni Sen. Santiago na si Narciso Santiago, at kapatid na si Linnea Evangelista.

Nagmumula ang Sen. Miriam Defensor-Santiago Avenue sa North Avenue, na dumadaan sa Quezon Avenue, patungo sa East Avenue.

Sa seremonya, pinuri ni VP Duterte si Santiago bilang isa sa mga "most distinguished and admired" na lider ng bansa.

"This is a tribute to her incredible achievements and a reminder of her unwavering dedication and love of country," pahayag ni VP Duterte.

Unang nahalal si Santiago bilang senador noong 1995 at bumalik sa Senado noong 2004 at 2010 kung kailan nagsilbi siya bilang chair ng Foreign Relations Committee at Constitutional Amendments Committee sa panahon ng kanyang termino.

Mahigit 140 COVID-19 vaccination sites, pagaganahin sa Quezon City

ni Jeff Tumbado | February 1, 2022

Pinalakas pa ng pamahalaang lokal ng Quezon City ang bakunahan laban sa COVID-19 bilang paghahanda na rin sa pagsisimula na maturukan ang mas nakababatang populasyon o ang mga edad 5 hanggang 11.

Ito ay makaraang umabot na ng 140 ang vaccination sites na itinakda ng Quezon City LGU sa anim na distrito na araw-araw ang operasyon.

Ayon kay Quezon City Mayor Joy Belmonte, tinatayang 2.8 milyon ang mga eligible na residente ng Quezon City ang target pang mabakunahan laban sa COVID-19.

Hindi pa aniya kasama sa nasabing bilang ang mga manggagawa sa lungsod ngunit sa ibang lugar nakatira.

“We are expanding and intensifying our vaccination program to accommodate the city’s eligible population, estimated at 2.8 million residents, including 5-11 year old children. This figure does not include the thousands of non-resident workers who also get their shots in the city,” ang pahayag ni Belmonte, na muling kandidato sa ikalawang termino.

Kabilang sa vaccination areas sa Quezon City ay ang health centers, malls, schools, community venues, mga simbahan at iba pang special venues tulad ng Smart Araneta Coliseum at Quezon Memorial Circle.

May mga bakunahan din sa loob ng subdivision, pribadong lugar-trabaho, government agencies, care homes, at ibang institusyon. Mayroon ding home vaccinations para sa mga bedridden at drive-thru jabs sa ilang mall parking lots.

Para sa mga interesadong indibidwal o pamilya, maaaring tingnan ang schedule at lugar ng bakunahan sa opisyal na Facebook page ng Quezon City government.

Maaari ring magparehistro sa QC VaxEasy Portal www.qceservices.quezoncity.gov.ph/qcvaxeasy, sa mga barangay pero may limitadong slots para sa mga walk-in sa mall vaccination sites.

Pag-aalis ng face shield, oks kay QC Mayor Belmonte

ni Lolet Abania | November 3, 2021

Nagpahayag ng suporta si Quezon City Joy Belmonte hinggil sa pagpapatigil ng pagsusuot ng face shield, kung saan isa sa requirements pa rin ito sa gitna ng COVID-19 pandemic.

Sa isang interview ngayong Miyerkules, sumang-ayon si Belmonte sa desisyon ng ibang local government units (LGUs) na ang pagsusuot ng face shields ay gawin na lamang optional. “I believe that it is the right thing to do,” ani Belmonte.

“It doesn't actually work for the purpose it should serve. It is just there for the compliance. If that is the case, we might as well do away with it and just stress wearing facing face masks,” dagdag ng mayor.

Batay sa kanilang city ordinance, sinabi ni Belmonte na nire-require lamang ng QC government ang pagsusuot ng face shields sa mga closed spaces.

Kahapon, ayon sa Malacañang, ilang miyembro ng Inter-Agency Task Force ang pabor sa pagpapatigil ng mandatory use ng face shield kapag nasa labas dahil na rin anila sa pagbaba ng bilang ng kaso ng COVID-19.

Gayunman, giit ni Presidential spokesperson Harry Roque na wala pang pinal na desisyon IATF kung ang face shield ay tuluyang aalisin.