6 tips sa panonood ng sine ngayong Pandemic

ni Jersy L. Sanchez - @Life & Style| November 28, 2021

Na-miss nating lahat ang “big screen” o ‘yung panonood ng sine. Agree?

‘Yung tipong, ito ang madalas na bonding ng mga mag-dyowa at pamilya tuwing weekend o date night, kaya naman nang magka-pandemic ay kani-kanyang diskarte na lamang para ma-experience pa rin ang “theater vibes” kahit nasa bahay lamang.

Pero ngayong pinapayagan na ulit ang panonood ng sine, anu-ano nga ba ang mga pagbabago na dapat nating asahan?

1. ITSEK ANG MGA GAMIT. Hindi lamang wallet, phone at keys ang dapat nating dalhin kung nagbabalak manood ng sine. Kailangang may dala rin tayong face masks at hand sanitizer o alcohol, gayundin ang vaccination cards dahil requirement na ito bago makapasok sa sinehan.

2. KUMAIN BAGO ANG SHOW. Karamihan sa mga sinehan ay hindi pinapayagan ang mga manonood na kumain o uminom sa loob nang sa gayun ay maiwasan ang pagtanggal ng mask. Kaya naman bago pumasok sa theater, tiyaking busog kayo para hindi magutom sa kalagitnaan ng panonood.

3. PUMILI NG PUWESTO. Hindi man tayo eksperto pagdating sa air flow, kung susuriin, ang mas ligtas na puwesto sa loob ng sinehan ay ang malayo sa mga tao o ‘yung hindi masyadong dinaraanan. Bagama’t may social distancing na ipinatutupad, ang pinakaligtas na puwesto ay ang corner seats at top row. Kung sinuwerte kang makuha ang seats na ito, make sure na nakapag-bathroom break na bago ang show nang sa gayun ay maiwasan ang pagtayo o paglabas ng sinehan habang nanonood.

4. PUMILI NG ORAS. Kung noon ay keri lang manood ng sine kahit ano’ng oras natin gustuhin, ngayon ay medyo kailangan na nating ibahin ang nakasanayan. Mas oks manood sa off-peak hours upang makaiwas sa pagdagsa ng mga tao. Kung kaya mong manood sa weekdays, mas oks dahil for sure, halos solo mo ang sinehan. Pero kung sa ticketing booth pa lang ay makikita mo nang maraming tao, mas mabuting ipagpaliban muna ang panonood.

5. SULITIN ANG EXPERIENCE. Well, given nang may risk ang paglabas sa panahong ito, kaya naman make sure na mae-enjoy ninyo ang experience na ito. Paano? Piliin ang pelikula na gusto mo talagang panoorin, ‘yun bang worth it itong makita sa big screen.

6. TEST & QUARANTINE. Bagama’t hindi ito required, kung afford mong magpa-test, go lang. Mag-quarantine lamang ng at least isang linggo o magpa-test tatlong araw matapos ang paglabas. Masyadong ma-effort man ito para sa iba, hindi naman masama na maging maingat, lalo pa’t hindi natin kilala ang mga taong nakasalamuha natin sa labas.

Totoo maraming konsiderasyon sa panonod ng sine habang may pandemya, gayundin ang risk na kasama nito. Pero dahil sobrang na-miss ito ng marami sa atin, hindi nawawala ang “magic” na ibinibigay nito sa atin kapag nanonood ng movie sa big screen.

‘Yun nga lang, kasabay nito ang dobleng pag-iingat nang sa gayun ay hindi tayo makasagap ng sakit pagkatapos mag-enjoy. Okie?

Coffee lovers, pasok! 3-4 cups ng kape kada araw, pampahaba ng buhay

ni Jersy L. Sanchez - @Life & Style| November 23, 2021

Marami sa atin ang hindi kumpleto ang araw kapag hindi nakapagkape. Agree?

‘Yung tipong, parang hindi tayo makapag-function kapag walang kape sa umaga, habang ‘yung iba naman, ginawa nang tubig ang kape, hala!

Pero mga bes, knows n’yo ba na ang “daily coffee habit” natin ay posibleng makapagpahaba ng buhay at nakapagpapababa ng tsansa na magkaroon tayo ng cardiovascular disease? Wow!

Sa isang pag-aaral na na-publish sa The Journal of Nutrition, ang “moderate consumption” o pag-inom ng tatlo hangang apat na Italian-style coffee kada araw ay may kaugnayan sa lower mortality. Sa naturang pag-aaral, inobserbahan din ang 20,000 kalahok sa loob ng walong taon.

Bago ang pag-aaral, walang kalahok na nakaranas ng cardiovascular disease o cancer, at ang kanilang coffee intake ay sinusukat gamit ang 30ml cup o standard size ng Italian espresso cup.

Natuklasan ng mga researcher na kumpara sa mga hindi umiinom ng kape, ang mga kalahok na kumokonsumo ng tatlo hanggang apat na espresso kada araw, ang mga ito ay nauugnay sa lower risks ng all-cause mortality, partikular ang cardiovascular disease.

Ito ay dahil sa partikular na compound na tinatawag na NT-proBNP, base sa mga scientist.

Gayunman, ayon sa pag-aaral na nai-publish ng grupo ng researchers sa PLOS Biology, ang health benefits na ito ay posibleng may kaugnayan sa caffeine dahil napag-alaman na ang apat na shots ng espresso kada araw ay ideal para makuha ang health benefits ng kape.

Samantala, sa isa pang pag-aaral mula sa JAMA Internal Medicine, kahit ang pag-inom ng decaffeinated coffee ay may benepisyo rin sa overall health.

Sa bagong pag-aaral mula sa New England Journal of Medicine, may nakitang ugnayan ang pagkonsumo ng kape at mababang tsansa ng pagkakaroon ng chronic illness; habang sa iba pang research, posibleng ang benepisyo nito ay reduced risk ng cancer, cirrhosis at depresyon.

Sa kabilang banda, may pag-aaral din na nagsasabing ang labis na pag-inom ng kape sa isang araw ay may masamang epekto.

Base sa research mula sa University of South Australia noong 2019, ang pagkonsumo ng anim o higit pang cup ng kape kada araw ay 22% na nakapagpapataas ng panganib na magkaroon ng heart disease.

Habang maraming pag-aaral na sumusuporta sa mga benepisyo ng kape, make sure na kontrolado ninyo ang pagkonsumo nito. At kapag may naramdamang kakaiba, upang makasigurado ay kumonsulta sa inyong pinagkakatiwalaang doktor at sundin ang ipapayo o irerekomenda nito.

Tulad ng palagi nating sinasabi, ang lahat ng sobra ay nakasasama kaya hinay-hinay lang, mapa-kape man ‘yan o anumang inumin. Copy?

Naku, dahan-dahan lang, besh! 6 signs na nasosobrahan sa pagwo-workout

ni Jersy L. Sanchez - @Life & Style| November 9, 2021

Sey ng experts, ang ‘overtraining’ o labis na pagwo-workout ay maaring makapagpabagal ng fitness progress, gayundin, nakapagpapataas ng tsansa na magka-injury, partikular sa mga baguhan sa pagwo-workout.

Well, akala siguro ng ilan sa atin, the more na nagwo-workout ay mas mabilis ma-a-achieve ang fitness goal, pero besh, kalma lang dahil hindi sa lahat ng pagkakataon, ang sobra-sobrang pag-e-ehersisyo ay may hindi rin magandang dulot. Oh no!

Kaya upang maiwasan ang mga bagay na ito, narito ang ilang warning signs na nagsasabing sumosobra ka na sa pagwo-workout:

• WALANG LAKAS O MUSCLE GAINS. Ayon sa mga eksperto, isa na sa senyales na sobra ka na sa pag-e-exercise ay ang kawalan ng progress. Ibig sabihin, kahit ilang oras ka nang nasa gym at hindi mo kayang magbuhat nang mas mabigat o wala kang nakikitang improvement, sign ito na hindi nabibigyan ng sapat na pahinga at support ang iyong muscles upang lumakas.

• HINDI NA MATAPOS ANG WORKOUT. ‘Ika nga, kapag hindi natin pinakinggan ang ating katawan, posibleng mawala ang iyong ‘hard-earned’ strength gains. Ayon sa mga eksperto, maaaring maging sanhi ng fatigue ang overtraining, kung saan masyado ka nang pagod para tapusin pa ang iyong workout routine o kaya naman, kailangang ibaba ang bilang ng sets na kailangan mong tapusin.

• PANGIT NA SLEEP QUALITY. For sure, nakaka-frustrate talaga ang kawalan ng progress, pero sey ng experts, ang pagiging moody ay senyales ng pagkapagod. Kaya kung umabot na sa puntong hindi ka na nakakatulog dahil masyado kang ‘sore’ para maging komportable, panahon na para magpahinga muna.

• LIMITADONG PAGGALAW. Isa pang senyales ng pagkapagod o burnout, nalilimitahan ng sakit ng iyong katawan ang mga galaw mo. Halimbawa, hindi ka na maka-squat nang mababa o hindi mo na magawa nang tama ang front rack position.

• FOAM ROLLING, STRETCHING O MASSAGE. Kapag gumamit ka ng foam roller sa gym, isa na umano itong senyales na nag-o-overtraining ka na. Gayunman, ang stretching at massage ay nakatutulong sa recovery at injury prevention, pero hindi ito kailangan para sa pain-free exercise. Gayundin, ang paghinto sa kalagitnaan ng workout para paginhawahin ang sakit at tension ay hindi dapat regular na gawin.

• ‘DI GUMAGALING NA INJURY. Ang tuluy-tuloy na pananakit ng ilang parte ng katawan ay maituturing din umanong senyales ng overtraining at ayon sa mga eksperto, hindi ito dapat dedmahin. Gayundin, kung ipagpapatuloy ang pagwo-workout, maaari itong magresulta sa mas malalang injury.

Ang pinakamagandang paraan upang makarekober mula sa sobrang pag-e-ehersisyo ay ang pagbabawas ng workload o pagpapahinga. Gayunman, kung mayroon kang injury o limitado ang iyong pagkilos, inirerekomenda na ihinto ang pagwo-workout. At pagkatapos ng ‘break’, oks namang bumalik nang paunti-unti upang maiwasan na maulit ang injury.

True talaga ang sinasabi na ang lahat ng sobra ay nakasasama. Kaya kung isa ka sa mga may Oplan Balik Alindog 2021, kalmahan mo lang, besh.

Mas oks nang i-achieve ito nang slowly but surely kesa nagmamadali dahil baka sa halip na maging body goals, eh, maudlot pa. Okie?