Taas-pasahe sa jeep, pinag-aaralan pa ng LTFRB

ni Lolet Abania | February 26, 2022

Pinag-aaralan pa ng Land Transportation Franchising and Regulatory Board (LTFRB) ang inihihirit na taas-pasahe sa mga jeepneys habang patuloy din ang pagtataas ng presyo ng mga produktong petrolyo.

Una nang sinabi ni Political Science and International Relations (PSIR) Professor Anna Malindog-Uy na ang presyo ng gasoline ay walong sunud-sunod na linggo nang tumataas, at asahan pa aniyang tataas habang ang Russia ay nahaharap sa economic sanctions.

“Patuloy nating inaaral, may petition na natanggap natin . . . At ito ay naka-set for hearing ngayong March 8,” ani LTFRB Executive Director Maria Kristina Cassion sa isang televised briefing sa PTV ngayong Sabado.

Umapela na ang mga jeepney drivers at operators sa mga awtoridad na gawin ang minimum fare sa P10 dahil na rin sa patuloy na pagtaas ng presyo ng gas.

Sinabi naman ni Department of Trade and Industry (DTI) Undersecretary Ruth Castelo na ang ginawang invasion ng Russia sa Ukraine ay posibleng magdulot ng pagtataas ng oil prices.

Subalit ayon kay Castelo, maaaring ipantapat dito ang TRAIN Law mechanism na posibleng magsuspinde sa mga excise taxes kung ang fuel ay lumampas sa $80.

Base sa TRAIN Law, ang pagpapaliban ng mga excise taxes ay makababawas ng P6 sa presyo ng diesel at P10 bawas naman sa gasoline.

“Ang government naman, ready na harapin kung sakaling tataas pa para ma-cushion din ang effect nito sa ordinaryong tao tulad natin,” sabi pa ni Castelo.

Pampasaherong dyip, nahulog sa bangin, 16 nadale

ni Lolet Abania | February 16, 2022

Labing-anim na indibidwal ang nasugatan matapos na bumagsak sa halos 100 metro ang sinasakyan nilang pampasaherong jeep mula sa roadside cliff o bangin sa tabing daan sa Pagbilao, Quezon bago magmadaling-araw ngayong Miyerkules.

Kinilala ng Police Regional Office-4A ang 12 sa mga biktima na sina Ronnel Francia, 28, driver ng jeep; Benz Jomar Fuentes, 23; John Cedric Gardon, 15; Gina Lozano, 52; Sharmaine Corino, 26; Noli Francia, 18; Beah Grace Camacho, 10; Anabel Camacho, Jose Camacho, Cherry Samson, Solen Samson, Analyn Arnejo na agad isinugod sa Quezon Medical Center sa Lucena City.

Sa inisyal na imbestigasyon ng pulisya, inararo ng pampasaherong jeep ang mga barrier na nasa tabi ng daan bago tuluyang mahulog sa Zigzag Road sa Barangay Silangang Malicboy, Pagbilao, Quezon.

Ayon sa director ng Quezon Police Provincial Office na si Police Col. Joel Villanueva, ang mga biktima ay nanggaling sa isang kasalan sa San Jose, Camarines Sur, at pauwi na sana sa kanilang tirahan sa Dasmariñas, Cavite nang maganap ang aksidente.

Base sa paunang impormasyon, nagkaroon ng malfunction ang brakes nito, saka inararo ng naturang sasakyan ang mga barriers at diretsong nahulog sa bangin.

Ayon sa mga awtoridad, naging pahirapan sa mga rescuers ang pagsagip sa mga biktima dahil hindi lamang sa malalim ang bangin, kundi ginawa ang rescue operation sa masukal na lugar habang madilim pa ng mga oras na iyon.

Karamihan sa mga biktima ay nagtamo ng head injury at bone fracture, kung saan ayon sa pulisya wala namang nai-report na nasawi sa insidente.

Pamamahagi sa jeepney drivers.. P7,200 fuel subsidy, start na — LTFRB

ni Lolet Abania | November 24, 2021

Sinimulan na ng gobyerno ang distribusyon ng P1-bilyon pondo para sa fuel subsidies ng mga drayber ng public utility jeepney (PUJ) na nagkakahalaga ng P7,200 upang makatulong sa kanilang problemang pinansiyal dahil sa pagtaas ng presyo ng produktong petrolyo.

“According to Landbank, as of yesterday, they were able to credit the amount of P7,200 to 78,000 beneficiaries,” ani Land Transportation Franchising and Regulatory Board National Capital Region (LTFRB-NCR) director na si Zona Tamayo sa virtual launching ng Fuel Subsidy Program ngayong Miyerkules.

Noong nakaraang buwan, inaprubahan ng Development Budget Coordination Committee (DBCC) ang paglalabas ng pondo na P1 bilyon sa LTFRB para sa cash grants ng mga public utility vehicle (PUV) drivers.

Nilinaw naman kalaunan ng LTFRB na ang fuel subsidy ay para lamang sa mga PUJ drivers dahil ang sektor na ito ang may pinakamalaking porsiyento ng public transport coverage.

Ayon kay Tamayo, iyong mayroon nang Pantawid Pasada Program cards, ang kailangan na lamang ay i-check ang kanilang account balance sa alinmang Landbank ATMs upang malaman kung ang naturang fuel subsidy ay pumasok na sa kanilang accounts.

Para naman sa mga benepisyaryo na wala pang fuel cards, sinabi ni Tamayo na kailangan nilang makipag-ugnayan sa kanilang LTFRB regional offices upang maiskedyul ang printing ng kanilang mga cards.

“Para malaman ang schedule kung kailan sila pupunta sa designated Landbank branch nila to get their cards,” sabi ni Tamayo. Ayon sa LTFRB, mahigit sa 136,000 valid franchise holders ng PUJs sa buong bansa ang mabebenepisyuhan mula sa Pantawid Pasada Fuel Program.

Bawat recipient ay makakatanggap ng isang one-time Pantawid Fuel card na nagkakahalaga ng P7,200 bilang fuel subsidy para sa taong ito.

Sinabi rin ng ahensiya na ang Pantawid Pasada Fuel card ay valid para sa mga fuel purchases lamang at mga nakiisang petroleum retail outlets o gasoline stations kung saan mayroong “Pantawid Pasada Card Accepted Here” signages.

Paliwanag naman ng LTFRB na anumang paglabag sa paggamit ng card, gaya ng pagbili ng ibang produkto maliban sa fuel na ginagamit ang card ay awtomatikong madi-disqualify ang card owner mula sa Pantawid Pasada Fuel Program at benepisyo nito.

Unang ipinatupad ang programa noong 2018 at 2019 bilang pagsunod sa mga probisyon ng R.A. No. 10963, o kilala rin sa tawag na Tax Reform for Acceleration and Inclusion (TRAIN) Law.